የአባ ቴዎድሮስ መንገድ

የኖርዌዩ አባ ቴዎድሮስ የሚተርኳት አንዲት ገጠመኝ አለቻቸው፡፡ በአንድ ወቅት የቅኔ መምህር ሆነው አንድ ቦታ ይመደባሉ፡፡ በተመደቡበት ቦታ አንድ የታፈሩና የተከበሩ አፈ ንቡረ እድ ነበሩ፡፡ ሰው ሁሉ ይፈራቸዋል፡፡ አባ ቴዎድሮስ የቅኔውም የመጽሐፉም ዕውቀት አለ፡፡ በዚህ ላይ ከሰው ጋር ተግባቢ ናቸው፡፡ ከዚህ ሁሉ በላይ ደግሞ ያኔ ወጣት ናቸው፡፡

አፈ ንቡረ እዱ በእኒህ ወጣት መምህር መምጣት አልተስማሙም፡፡ ዐውቃለሁ ባይ ወጣት አድርገው ቆጠሯቸው፡፡ ይህንን ያወቁ ሌሎች ሰዎች ለአባ ቴዎድሮስ አንድ ነገር ሹክ አሏቸው፡፡ ‹እኒህ ሊቅ ከባድ ሰው ናቸው፡፡ ፊት ለፊት አግኝተው እፍ ካሉብዎት ሽባ ሆነው ይቀራሉ› ይሏቸዋል፡፡ አባ ለሀገሩም ለነገሩም እንግዳ ስለሆኑ ግራ ገባቸው፡፡ እንዴት ከእፍታው እንደሚያመልጡ ሆነ የዘወትሩ ሐሳባቸው፡፡ እንዲህ እያሰቡ ሰሞነ ጽጌ ደረሰ፡፡ በሌሊቱ ማኅሌት አባ በአንድ መሥመር አፈ ንቡረ እዱ በአንድ መሥመር ለማስረገጥ ተሰለፉ፡፡ ደግሞ ይግረምዎ ብለው አባና አፈ ንቡረ እዱ ፊት ለፊት ገጠሙ፡፡

የቤተ ክህነታችን ‹ሠለስቱ አርእስተ ኃጣውእ›

ፎቶ፡- ሐራ ተዋሕዶ

ቤተ ክህነቱ ለቤተ ክርስቲያኒቱ የመከራ በር እየሆነ ነው፡፡ ወደ ሁለት ሺ ዘመን ለኖረችው ቤተ ክርስቲያን ስድሳ ዓመት የማይሞላው ቤተ ክህነት ሊመጥናት አልቻለም፡፡ እርሷ ወደፊት ስትራመድ እርሱ ከኋላ ተቸክሏል፡፡ የራሳችን ጳጳሳት እንዲኖሩንና የራሳችን ቤተ ክህነት እንዲያስተዳድረን እስከ መሥዋዕትነት የታገሉትን ቀደምት አበው ሳስብ ኀዘን ይወረኛል፡፡ ያ ሁሉ የደከሙለት ቤተ ክህነት በሙስና፣ በብልሹ አስተዳደርና በወገንተኝነት አዘቅት ወድቆ ሲዛቅጥ ቢመለከቱት ምን ይሉ ይሆን? ከዘመነ ንጉሥ ሐርቤ እስከ ዘመነ ንጉሥ ኃይለ ሥላሴ ኢትዮጵያ በራሷ ልጆች የሚመራ የራሷ ቤተ ክህነት እንዲኖራት የታገሉት ነገሥታት በዐጸደ ነፍስ ሆነው ሲመለከቱ ምን ይሰማቸው ይሆን? የአንበሳ ደቦል፣ የወርቅ እንክብል፣ ቀጭኔ ግልገል ተሸክመው ጳጳስ ለማምጣት እስክንድርያ ድረስ የተጓዙ መልእክተኞች ዐረፍን ባሉበት ዘመን ይህንን በራስ ሕዘብ ላይ የሚሠራ ግፍ ሲያዩ ከፈጣሪያቸው ጋር ምን ይነጋገሩ ይሆን?

ራእየ ዮሐንስ (ክልስ እትም)

የራእየ ዮሐንስን የማብራሪያ መጽሐፍ ስትጠይቁኝ ለነበራችሁ፡፡ ከዚህ በፊት የታተመው መጽሐፍ ሁለት ችግሮች ነበሩበት፡፡ የፊደሉ መድቀቅና በወቅቱ ከግሪክ ቋንቋ ውጭ ባለመተርጎማቸው ሊካተቱ ያልቻሉ ቀደምት አበው ትርጓሜያት፡፡ ለብዙ ዓመታት ከገበያ ጠፍቶ የከረመውም እነዚህን ችግሮች ለመፍታት ጊዜ በመውሰዱ ነው፡፡ አሁን አዳዲስ መረጃዎችንና ቀደምት አበው የሰጧቸውን ማብራሪያዎች በመጨመር ክልስ እትም (revised edition)በመታተም ላይ ነው፡፡ የገጹ ብዛት ከ600 በላይ ሲሆን የፊደሉ መጠንም ባለ 12 ፎንት ተደርጓል፡፡ የመጽሐፉ ስፋትም በአራቱ ኃያላን መጽሐፍ መጠን ሆኗል፡፡ በተለይም የፍጥሞ ደሴት የቅዱስ ዮሐንስ ገዳም ሊቃውንት ከቀድሞ ጀምሮ የነበሩ አበው በሰጧቸው ትርጓሜዎች ላይ ተመሥርተው ያዘጋጁት ባለ 4 ቅጽ ትርጓሜ ተካትቶበታል፡፡ የተወሰኑ ቅጅዎችን በጠንካራ ሽፋን (Hard cover) እያዘጋጀን ነው፡፡

በታኅሣሥ መጨረሻ ገበያ ላይ ይውላል፡፡

ስማዳ በአውስትራልያ

አውስትራልያዊው የጤፍ ገበሬ

የአውስትራልያ ዋናው ዲታ ቸርቻሪ (supermarket giant) ኮልስ (Coles) ነጩንና ጥቁሩን ጤፍ በአውስትራልያ ከተሞች እንደ ጉድ ይቸበችበዋል፡፡ በምድረ አውስትራልያ ዋናው የጤፍ ዱቄት አከፋፋይ የሆነው ኮልስ ጤፍ በአሁኑ ጊዜ የስንዴ ዱቄትን እየተካ መምጣቱንና ለዳቦ፣ ለፓስታ፣ ለፓን ኬክ መሥሪያ ከመዋል አልፎ በሰላጣ ውስጥ ከሚጨመሩ ግብዐቶች አንዱ መሆኑን ያናገራል፡፡ 500 ግራም ጤፍ በ10 ዶላር አካባቢ ይሸጣል፡፡