Wednesday, May 24, 2017

አምስተኛው የበጎ ሰው ሽልማት መርሐ ግብር


የበጎ ሰው  ሽልማት
የዜና መግለጫ
አምስተኛው የበጎ ሰው ሽልማት መርሐ ግብር
የእጩዎች ጥቆማ ግንቦት 16 ይጀመራል
ላለፉት አራት ዓመታት ለሀገርና ለሕዝብ አርአያነት ያለው ታላቅ ተግባር ያከናወኑ ሰዎችን ዕውቅና የሚሰጠው የበጎ ሰው ሽልማት አምስተኛው መርሐ ግብሩን ከነገ ግንቦት 16 ቀን አንስቶ የእጩዎች ጥቆማ በመቀበል በይፋ ይጀምራል፡፡
ለዚህ የሽልማት መርሐ ግብር በአስር ዘርፎች ማለትም
1. መምህርነት
2. ንግድና ሥራ ፈጠራ
3. ማኅበራዊ ጥናት
4. ሳይንስ
5. ቅርስና ባሕል
6. መንግሥታዊ የሥራ ኃላፊነትን በብቃት መወጣት
7. ለኢትዮጵያ የላቀ አስተዋጽዖ ያደረጉ የውጭ ሀገር ዜጎች
8. ኪነ ጥበብ (በቴአትር ጥበባት)
9. ሚዲያና ጋዜጠኛነት
10. በጎ አድራጎት ከህዝብ የእጩዎችን ጥቆማ ለመቀበል ተዘጋጅተናል፡፡

ባለፉት አራት የሽልማት ወቅቶች፤ አገራችን የምትኮራባቸውና የላቀ አርአያነት ያለው ተግባር ያከናወኑ ሰዎችን እውቅና የሰጠነው ከህዝብ በቀረቡ ጥቆማዎች መሰረት ነው፡፡ የበጎ ሰው ሽልማትን ለዚህ ያበቃውም በሽልማቱ ሂደት የህዝብ ተሳትፎ በመኖሩና ይህም ከዓመት ዓመት እያደገ በመሄዱ መሆኑን በአክብሮት እንገልጻለን፡፡ ይህ ተሳትፎ አሁንም እንደሚቀጥል ጽኑ እምነት አለን፡፡   
የበጎ ሰው ሽልማት ዓላማ ለሀገራችን ለኢትዮጵያ መልካም የሚሠሩ፣ ሀገራዊ ተልዕኳቸውን በብቃትና በልዩ ልዕልና የሚወጡ፣ የሕዝቡን ኑሮ ለማሻሻል ለውጥ አምጪ ተግባር የፈጸሙ፤ በብዙ ሰዎች የማይደፈረውን ተግባር በተነሣሽነት የከወኑ፣ ለድጋፍ ፈላጊ የማኅበረሰቡ ክፍሎች ትኩረት በመስጠት ሀገራዊ ኃላፊነት ወስደው የሠሩ፣ የሀገሪቱ ታሪክ፣ ቅርስ፣ ባሕል፣ እንዲጠበቅ፣  የሀገሪቱ  ሥልጣኔ  ከፍ  እንዲል  የሠሩ  ኢትዮጵያውያንን  በማበረታታት፣  ዕውቅና  በመስጠትና በመሸለም ሌሎችን በጎ ሠሪዎች ለሀገራችን ማፍራት ነው፡፡
ስለዚህ ይህን የበጎ ሰው ሽልማትን ዓላማ ከግምት ውስጥ በማስገባት ከላይ በተገለጹት መስኮች ከግንቦት 16 እስከ ሰኔ 11 ቀን 2009 ዓ.ም ድረስ ህዝቡ ለዚህ ሽልማት ብቁ ናቸው የሚላቸውን እጩዎች እንዲጠቁም ጥሪያችንን እናቀርባለን፡፡ ጥቆማ የምንቀበለው በስልክ፣ በኢሜይልና በፖስታ ነው፡፡ አድራሻዎቹም፤
1. ስልክ፡- 0960402990
2. ኢሜይል፡ begosew2009@gmail.com
3. ፖስታ፡ 150035 አዲስ አበባ
4. በአካል ለሚመጡ፡- ለም ሆቴል፣ ማትያስ ሕንጻ፣ ቢሮ ቁጥር 408
ጠቋሚዎች እጩዎችን በሚጠቁሙበት ጊዜ ዕጩው ግለሰብ ለአገርና ለሕዝብ ያከናወኑትን ተግባር በዝርዝር እንዲገልጹልንና የሚገኙበትንም አድራሻ እንዲጠቁሙን እንጠይቃለን፡፡ ምዝገባው ከተጠናቀቀ በኋላ አስፈላጊው ማጣራት ተደርጎ ለመጨረሻው ውድድር ተመርጠው ስማቸው ለዳኞች የሚላከውን ዕጩዎች ማንነት ሕዝብ እንዲያውቀው ለማድረግ፤ ዐውቆም ለሀገርና ለሕዝብ ባበረከቱት አስተዋጽዖ እንዲያከብራቸው ለማድረግ ዝርዝራቸውን በመገናኛ ብዙኃን አማካይነት ይፋ እናደርጋለን፡፡  
የመጨረሻውን የየዘርፎቹን የበጎ ሰው ተሸላሚ ምርጫ የሚያደርጉት ለእያንዳንዱ የሽልማት ዘርፍ በዳኝነት የተመረጡ ባለሙያዎች ናቸው፡፡ ዳኞቹ በዕውቀታቸውና በሙያቸው አንቱ የተባሉ፣ የረጅም ጊዜ ልምድ ያላቸውና በታማኝነት ምርጫውን ያከናውናሉ ተብለው የታመነባቸው ናቸው፡፡ ለእያንዳንዱ ዘርፍም ሦስት ዳኞች ተመርጠው ምርጫውን ያከናውናሉ፡፡ 
አምስተኛው የበጎ ሰው ሽልማት በደማቅ ሥነ ሥርዓት ነሐሴ 27 ቀን 2009 ዓ.ም ይካሄዳል፡፡ 
የሕዝቡ የመምረጫ መመዘኛዎች
1. ለሀገር ሰላም፣ ለሕዝቦች መቀራረብና መደጋገፍ፣ ለውጥ አምጭ አስተዋጽዖ ያደረጉ፣
2. በበጎ አድራጎትና ሰብአዊ ተግባራት ተሠማርተው የሰው ልጅን ሕይወት የለወጡ፣
3. በሥነ ጽሑፍ፣ በኪነ ሕንጻ፣ በሥነ ጥበብና በመሳሰሉት መስኮች ለኢትዮጵያውያን የሚጠቅሙ፣ የኢትዮጵያን ስም ከፍ የሚያደርጉ፣ የሀገሪቱን ሥነ ጥበብ ወደ አንድ የላቀ ደረጃ የሚያደርሱ ሥራዎች የሠሩ፣
4. በግብርና፣ በቢዝነስ፣ በኢንዱስትሪና በመሳሰሉት መስኮች አዲስ፣ የራሱ ወጥነት ያለውና ያልተደፈረ የሚመስለውን ሥራ ያከናወኑ፣ ለሀገሪቱ ዕድገትና ሥልጣኔም ለውጥ አምጭ አስተዋጽዖ ያደረጉ፣
5. በጋዜጠኛነት መስክ ተሠማርተው ሙያውን የጠበቀ፣ ለሌሎች አርአያ የሚሆን፣ የሕዝቡን ኑሮ የሚለውጥ ሥራ ያከናወኑ፣
6. በዲፕሎማሲው መስክ የሀገሪቱን ክብርና ደረጃ ያስጠበቁ፣ የሀገሪቱንም መብት ያስከበሩ፣
7. በመንግሥትና በሥራ ተቋሞቻቸው የተሰጧቸውን የተለያዩ ሀገራዊ ግዳጆችን በብቃት የተወጡ፣ መሥዋዕትነት የሚጠይቁ ተልዕኮዎችን ያከናወኑ፣ ለትውልድ አርአያ የሚሆኑ ብቁ አመራሮችን የሰጡ፣ በአመራሮቻቸውም ድርጅታቸውንና መሥሪያ ቤቶቻቸውን የለወጡ፣
8. ሀገራዊ ዕውቀቶችን በማስተማር፣ ቅርሶችንና ባህልን በማስጠበቅና በመከባከብ ለውጥ አምጭ ተግባር ያከናወኑ፣
9. በጥናትና ምርምር መስክ ተሠማርተው ችግር ፈች የሆኑ ውጤቶችን ያስመዘገቡ፣
10. በማስታረቅ፣ ግጭቶችን በመፍታት፣ ሀገራዊ የሽምግልና ሥራ የሠሩ፣
11. በሌሎችም መስኮች የሚጠቀስ፣ ለሀገር የሚጠቅም፣ ለትውልድ አርአያነት ያለው፣ የሀገርን ክብር የሚጨምር፣ ታሪክና ማንነትን የሚያጎላ ተግባር ያከናወኑ ሌሎችንም ኢትዮጵያዊ ዜጎችን ይጠቁሙ፤


በጎ ሠሪዎችን በማክበርና በመሸለም ሌሎች በጎ ሠሪዎችን እናፍራ

ለበለጠ መረጃ ይደውሉ፡ ዳንኤል ክብረት - 0911-474503  ወይም ነጻነት ተስፋዬ - 0911485961                                                         

የበጎ ሰው ሽልማት አስተባባሪ ኮሚቴ

 

No comments:

Post a Comment