Friday, February 17, 2017

ፓንክረስት ሞተ ይላሉ


ፓንክረስት ሞተ ይላሉ
አያፍሩም ደግሞ ይዋሻሉ፤
ታሪክን እንደነዳጅ ቆፍሮ
ለቅርስ እንደ ውርስ ተከራክሮ
ላልተወለደባት ምድር ከተወላጅ በላይ ለፍቶ
በደም ከወረሷት በላይ በፍቅር ልቧ ውስጥ ገብቶ
ከእናቱ እስከ ልጁ - ለጦቢያ ልቡን ሠውቶ
በትውልድ ማማ ላይ ቆሞ የጸናውን ጌታ
ሞቷል እያለ ይዋሻል ታሪክ የጠላ ቱማታ፡፡
ኢትዮጵያዊነት ቅኔ ነው
ብርቱ እንደ ፓንክረስት የሚነጥቀው
ሞኝ እንደ ከመዳፉ የሚቀማው፡፡
ኢትዮጵያዊነት ጸጋ ነው
ልባም እንደ ዐሉላ የሚቀባው
ሞኝ እንደ ባንዳ የሚነሣው፤
ስንቱ ከማዕዘናተ ዓለም
እንደ ኦሎምፒክ ከትሞባት
ባተወለደባት ምድር
እትብቱን አምጥቶ ሲቀብርባት
ከደጁ ሞፈር ሲቆረጥ
ጅላጅል ቆሞ አንጎላጀ
ኢትዮጵያ ውስጥ ተወልዶ
ሐበሻ ሳይሆን አረጀ፡፡
እንዲህ ያለው ልብ አልባ
ልባሙን ሞተ ይለዋል
በትውልድ ማማ ላይ ያለ
መቼ ልብ ሰጥቶ ይሰማዋል፡፡
ፓንክረስትማ አልሞተም
በኢትዮጵያ ልብ ይኖራል
በዐጸደ ነፍስ ሆኖ
ጠላቷ ፍግም ሲል ያያል፡፡
የካቲት 10 ቀን 2009 ዓም

7 comments:

  1. እግዚአብሔር ያጽናሽ ሀገሬ ዛሬ ታላቁን ልጅሽን አጥተሸልና አሁንማ ታሪክ ታሪክ እየሆነብን ነው:: የመገናኛ ብዙሀኖቻችን ስለ የካቲተ 12 በቂ ሽፋን መስጠተ የቸገሪቸው ጊዜ ላይ ደርሰናል:: ሌላ ምን ይባላል አምላክ ሁሉንም ይመለከታልና ፍርድ ከእሱ ይሁን:: ታላቁን ልጅ ነፍሱነ ይማርልን:: አሜን!!

    ReplyDelete
  2. እውነት ብለሃል ዳኒ፣
    ፓንክረስት የሲልቪያን ልጅ እንዴት ሞተ ይሉታል፣
    ጽኑ የጽኑዋ ዘር እንዴት በሞት ይረታል?
    የሚሞት ሲሞት የኖረ ፍቅር የሌለው እንጂ፣
    መዋቲ ሀገር የሚሸጥ ባንዳ ምንደኛው እንጂ፤
    “ሀገርሽ ሀገሬ” ብሎ እምነቷን የተከተለ፣
    ታሪኳን ታሪኩ አድርጎ ከእናቱ ያልተነጠለ፤
    እድሜ ዘመኑን ሙሉ የፈረንጅ ሐበሻ ሆኖ፣
    ድንበር በማይገድበው በኅያው በፍቅር አምኖ፤
    በሰው ዘር የታሪክ ፈሳሽ ገብቶ በተጠመቀ፣
    እንዴት ሞተ ይሉታል በሕይወት ባሸበረቀ?!
    እውነት ብለሃል ዳኒ፣
    ፓንክረስትማ አልሞተም!
    የሞቱስ እነርሱ ናቸው “ፓንክረስት ሞተ” የሚሉ፣
    ታሪክ የሚያጠለሹ ትውልድ የሚበክሉ፤
    የሞቱስ ዜጋ ነን ባዮች ማንነት የጠፋባቸው፣
    ታሪክ በደም ይመስል መወለድ የሚያኮራቸው፤
    ከሥራው አንዱን ሳይነኩ “ሐበሻ! ሐበሻ!” ሲሉ፣
    ስንዴ ሆነው ተዘርተው እንክርዳድ ሆነው ሲበቅሉ፤
    “የሞትን እኛ ነን” ማለት ማመን የተሳናቸው፣
    “ሀገሬ! ሀገሬ!” ሲሉ ሀገር የጠፋባቸው፤
    የሞቱስ እነርሱ ናቸው!
    ቃል ኪዳን አፍራሽ ሲሆኑ ትንቢት ለእኛ ነው ሲሉ፣
    ማመን መቀበል አቅቷቸው ታሪክን ሰቅለው ሲገድሉ፤
    የፈረንጅ ልጅ በሥጋ ሐበሻው ፓንክረስት ግን፣
    የቃል ኪዳን ምድር ኢትዮጵያን እናቴ ሀገሬ ብሎ፣
    በፍቅሯ ቃል ኪዳን ተስቦ በተስፋዋ ገመድ ተፈትሎ፤
    ለታሪኳ መላ ዘመኑን ሕይወቱን ሰጥቶ በኖረ፣
    ሙዚየም በመሰረተ የትውልድ ሐውልት ባኖረ፤
    ታሪኳን በጽሑፎቹ መዝግቦ ትቶ ባለፈ፣
    የማይሞት ኅያው ታሪኩን በወርቅ ቀለም በጻፈ፤
    ሙትቻ ተልካሻ ሁሉ እንዴት ሞተ ይሉታል፣
    ፍቅር የፍቅር ልጅ ነው እንዴት በሞት ይረታል?
    እውነት ብለሃል ዳኒ፣
    ፓንክረስትማ አልሞተም!
    እንዴት ፍቅር ይሞታል?
    ሰነፎች ጥሩንባ ነፍተው ሞቱን ቢያውጁበትም፣
    በሥራው ኅያው ነውና ጀግናው ሞቶም አይሞትም፡፡
    ፓንክረስት መቼም አይሞትም!
    ፓንክረስትነት አይሞትም!





    ReplyDelete
  3. TPLF does not want history. They want generation to forget Ethiopian History and historian. I will never forget Ethiopian History. They are not normal. One day God will destroy them. OUR history and historian will live forever.
    God bless Ethiopia! We are one and one, that is Ethiopia!

    ReplyDelete
  4. TPLF does not want history. They want generation to forget Ethiopian History and historian. I will never forget Ethiopian History. They are not normal. One day God will destroy them. OUR history and historian will live forever.
    God bless Ethiopia! We are one and one, that is Ethiopia!

    ReplyDelete
  5. ዘይገርም!

    ከደጁ ሞፈር ሲቆረጥ
    ጅላጅል ቆሞ አንጎላጀ
    ኢትዮጵያ ውስጥ ተወልዶ
    ሐበሻ ሳይሆን አረጀ፡፡
    እንዲህ ያለው ልብ አልባ
    ልባሙን ሞተ ይለዋል
    በትውልድ ማማ ላይ ያለ
    መቼ ልብ ሰጥቶ ይሰማዋል፡፡

    ReplyDelete