Tuesday, October 4, 2016

ኑ! ሀገሬን እናዋልዳት


አዋላጇ ጠፍታ ልጁም በእግሩ መጥቶ
እናቲቱ ሞተች ልጅዬውም ሞቶ

የሚል የልቅሶ ግጥም አለ። ነፍሰ ጡር እናት ስትወልድ ልጁ በእግሩ ከመጣ አደጋ ነው ይባላል። ጎበዝ አዋላጅ አግኝታ ልጁ በአናቱ እንዲመጣ ልታግዛት ይገባል። ያ ካልሆነ ግን ባልተስተካከለ መንገድ የመጣውን ልጅ ለመውለድ የምታምጠው እናት፣ ለረዥም ጊዜ በማማጧ የተነሣ ደክማ ለሞት ትዳረጋለች። ልጇም የመሞት ዕጣ ፈንታ ይገጥመዋል። መውለድ ደስታ የሚሆነው ልጁ በሰላም ተወልዶ፣ ለእናቱ ጤናና ደስታ ካመጣ ነው። መውለድ ካልተስተካከለ ማርገዝ ብቻውን ድካም ነው። ለዚህ ነው ነፍሰ ጡሮች በሕክምና እርዳታ ሲታገዙ ቆይተው፣ በሕክምና እርዳታ እንዲወልዱ የሚመከረው።



ሀገር ለውጥን ልትወልድ የምትችለው የለውጥን ጽንስ በጤናማ መልኩ አርግዛ በጤናማ መልኩ እንድትወልድ የሚረዷትን ሐኪሞች ካገኘች ነው። ጽንሱ ጤናማ መሆኑን በየጊዜው የሚከታተሉ፤ ችግር ሲፈጠር ወዲያው መፍትሔ የሚሰጡ። ስትወልድም ልጁም እናቲቱም ጤንነታቸው በተጠበቀበት መንገድ እንድትወልድ የሚረዱ አዋላጅ ሐኪሞች ያስፈልጓታል። ይህ ሲጠፋ ልጁም እናቲቱም ለሞት ይዳረጋሉ።
ኢትዮጵያ ብዙ ጊዜ ለውጥን ፀንሳ ታውቃለች። ብዙ ጊዜ የማታገኘው ጎበዝ አዋላጅ ሐኪም ነው። በዚህ ምክንያትም ብዙ ጊዜ ልጇ ሞቶባታል። ያውም በእርሷም ላይ ከባድ አደጋ አድርሶ። ማኅፀኗን ጎድቷት ስለሚሄድ፣ ሌላ ልጅ ለመጸነስ ዘመናትን እንዲፈጅባት አድርጎ።

የቅርቡ ታሪካችንን እንኳን ብንመለከተው፣የልጅ ኢያሱን ዘመን ፀንሳ ነበር። ነገር ግን ካለፉት ዘመናት በተለየ ሁሉም ኢትዮጵያዊ በሀገሪቱ ሂደት ባለቤት እንዲሆን ከዘመኑ በቀደመ ሐሳብ የተነሣውን ወጣቱ ንጉሥ ሐሳቡን የሚያዋልድለትና ፅንሱ በእግሩ መጥቶ እናቱንም ራሱንም እንዳይገድል የሚያደርግ ሐኪም አጥቶ፣ ሀገሪቱ ያንን ዕድል አመከነችው። የተገኙት አዋላጆች ሳይሆኑ አምካኞች ነበሩ። ልክ ፈርዖን በግብጽ፣እሥራኤላውያን ላይ አሠማርቷቸው እንደነበሩት የአዋላጅ አምካኞች።

በ1953 ዓ.ም ኢትዮጵያ እንደገና ሌላ የለውጥ ልጅ ፀንሳ ነበር። ነባሩ ንጉሣዊ ሥርዓት ከመሠረቱ ሳይናጋ ነገር ግን ዘመኑ የሚጠይቀውን ሥርዓታዊ ለውጥ ለመውለድ ፀንሳ ነበር። አዋላጅ ግን አላገኘችም። ያንን ሐሳብ በሚገባ ፀንሳ በሚገባ እንድትወልድ የሚያደርጉ አዋላጆች ብታገኝ ኖሮ፣የጥንቱን ከዘመኑ ያጣጣመ ሥርዓት ገንብታ ለመጓዝ ትችል ነበር። ግን ምን ዋጋ አለው፤ ጨነገፈ።

በ1966 ዓ.ም ሌላ የለውጥ ልጅ ፀነሰች። ሀገሪቱን ወደተሻለ ሥርዓት ሊወስድ የሚችል ተስፋ የሰነቀ ልጅ። ምን ዋጋ አለው። አዋላጆች አላገኘችም። ልጁን ጤናማ ሆኖ እንዲወለድ ከማገዝ ይልቅ አዋላጆቹ እርስ በርሳቸው ሲጨፋጨፉና ሲቧቀሱ፣ ልጁ ‹ታሪክ የጣለብንን ኃላፊነት ለመወጣት› ብለው በተነሡ የወታደር አጨናጋፊዎች እጅ ወደቀ። አንዲት የገጠር ሴት ለመውለድ ደርሳ አዋላጅ ጠራች። የቀን ጎደሎ ሆኖባት የማይችል ሰው እጅ ወደቀችና እርሷም ልጇም ሞቱ። አልቃሽ፡-

እንዲህ ያል ክፉ ቀን ክፉ ሰው ላይ ጥሏት
እንኳን ልጅ ልታገኝ እርሷንም ገደሏት፤

ብላ ገጠመች ይባላል። ኢትዮጵያም በ66 እንዲህ ነው የሆነቺው። ሐኪሞች ልጆቿ፤ የራስዋን ልጅ ማዋለድና ማሳደግ ሲገባቸው፣ የማደጎ ልጅ ከሶቪየት አምጥተው ልጅሽ ይሄ ነው አሏት። በማኅፀንዋ የተፀነሰውን የራስዋን ልጅ ገድለው የሰው ልጅ አሳቀፏት። የአዋላጆቹ ጠብም ልጇን እንዴት እናዋልዳት? መሆኑ ቀርቶ፣የትኛውን ልጅ ትታቀፍ? የሚለው ላይ ሆነ። እንኳን አዲስ ልጅ ልትወልድ እርሷም በወሊድ ምክንያት በተከሠተ ሕመም ለዘመናት ትሰቃይ ጀመር።

ያ ዘመን አልፎ 1983 ዓ.ም መጣ። ሁሉንም ያሳተፈ፤ የኅብረተሰብም የሐሳብም ብዝኃነትን የተቀበለ፤ ሀገሪቱ ስትመኘው የኖረቺውን ልጅ ልትወልድ የምትችልበት ዕድል ገጠማት። አሁንም ግን አዋላጆች ጠፉ። ያንን ለውጥ በፖለቲካ ብስለት፣ በዕውቀትና በትዕግሥት፣ በአመራርና በጥበብ አዋልደው፣ሀገሬ ዴሞክራሲና ዕድገትን ከነ ቃጭሉ ዱብ እንድታደርግ የሚያስችሉ አዋላጆች ጠፉ። ሁሉም የራሱን ብቻ ሲሰማና ‹ልጁ እንዲፀነስ የታገልኩት እኔ ነኝና እኔ ብቻ ልወስን› ሲል ሀገሬ ልጇን አጣችው። እርሷ ለመፅነስ እንጂ ለመውለድ ሳትታደል ቀረች።

ከሕዝቡ አብራክ ተከፍሎ በኢትዮጵያ ማኅፀን የተፀነሰውን ያንኑ ልጇን ተባብሮ ከማዋለድና እርሱኑ ተከባክቦ ከማሳደግ ይልቅ አሁንም ኮሚኒዝሙን፣ ማኦኢዝሙን፣ ዴሞክራሲውን፣ ቀያይጠንን እንደ አሻንጉሊት ሰፍተን፣ ‹ልጅሽ ይሄ ነው› አልናት። የብሔረሰቦችን ጥያቄ ልንግባባበትና ሀገር ልንመሠርትበት በምንችለው መንገድ መፍትሔውን መውለድ ሲገባን፣ ዘወትር የሚያጣላንንና የሚያበጣብጠንን የማደጎ ልጅ አመጣን። ከራሳችን አብራክ በራሳችን ማኅፀን ለኛ የሚሆን የፌዴራሊዝም ልጅ ልንወልድ ሲገባን የማደጎ ልጅ አመጣን። ይኼው አሁን በሂደት ልጁ የኛ ልጅ አለመሆኑን፤ ኢትዮጵያ የወለደችው ልጅ አለመሆኑን እየነገረን ነው። ከኛ ፍላጎት፣ ባህል፣ አስተሳሰብና ታሪክ ጋር መኖር አቅቶታል። የገዛ ልጃችን ዕዳ ነው የሆነብን። ሀገሬ ልጅ አልወጣላትም።

በ1997 ዓ.ም ሀገሬ ሌላ ልጅ ፀንሳ ነበር። ዴሞክራሲን። የአስተሳሰብ ብዙኅነትን ልትወልድ ነበር። እኛም ትወልዳለች ብለን የገንፎውንና የአጥሚቱን እህል አዘጋጅተን ነበር። ግን ምን ያደርጋል፤ ሐኪም አላገኘችም። ‹እኔ ብቻ› የሚል ሐኪም ገጥሟት፤ የዛሬውን እንጂ የነገውን የማያይ ስግብግብ አዋላጅ ገጥሟት፤ ምንጊዜም በሆስፒታሉ ውስጥ ‹ብቸኛው ስፔሻሊስት ሐኪም› እየተባለ መኖር የሚወድ ራስ ወዳድ ሐኪም ገጥሟት፤ ጊዜያዊ ችግሮችን ለዘላቂው ጥቅም ሲል መታገሥ የማይችል ሐኪም ገጥሟት፤ ወይ ‹ሁሉን ማግኘት አለያም ሁሉን ማጣት› የሚባል የማዋለጃ መሣሪያ የያዘ ሐኪም ገጥሟት ሀገሬ ልጇ ሞተባት።

እርሷም ትፀንሳለች እኛም እንፈጫለን
ለልቅሶ ነው እንጂ ለእልልታ አልታደልን፤

አለ አሉ፤ ኀዘን የጎዳው ባል። ሚስቱ በፀነሰች ቁጥር ለአራሷ የሚሆን እህል በቤቱ ይፈጫል። ነገር ግን ወለደች ተብሎ እልል ሳይባል፣ ሞተባት ተብሎ ይለቀሳል። ይሄ ነበር ባልን እንዲህ እንዲያንጎራጉር ያደረገው። ሀገሬም እንዲህ ነው የሆነቺው።

አሁንም ሀገሬ ፀንሳለች። እኛም ሊያግባባንና ሊያስማማን የሚችል ሥርዓተ መንግሥት፤ የብዙኃኑን ውክልና የሚያረጋግጥ ዴሞክራሲያዊ ሂደት፤ የትብብር መነሻ የሚሆን፣ ከአጥር ይልቅ ድልድይ የሚገነባ ፌዴራሊዝም፣ ሰብኣዊና ዴሞክራሲያዊ መብቶችን የሚያከብርና የሚጠብቅ የፖለቲካ ምኅዳር ትወልዳለች ብለን ተስፋ እያደረግን ነው። ይህ እንዲሆን ግን ማዋለድ ያስፈልጋል። ኃይልና ጉልበትን፣ ዘረኝነትና ጽንፈኝነትን፣ እኔ ከሞትኩ ሰርዶ አይብቀልና እኔ ብቻ ዐውቅላችኋለሁን፣ እኔን ምን አገባኝና እኔ የለሁበትምን፣ አግላይነትንና ጠቅላይነትን፣ ጥገናዊነትንና ጊዜያዊነትን ትተን ሀገሬ ለሁላችንም የሚሆን፣ ሁላችንም እልል ብለን የምንቀበለው፤ ሁላችንም የአራስ ጥሪ የምናመጣለት፣ ሁላችንም በመወለዱ ገንፎ የምንበላበት፣ ሁላችንም ልደቱን የምናከብርለት፣ ከሩቅ ያሉት እንደ ሰብአ ሰገል ገሥግሠው፣ ከቅርብ ያሉት እንደ እረኞቹ ነቅተው ሄደው የሚያመሰግኑት ልጅ እንዲወለድልን ማዋለድ አለብን። ምሁራኑ፣ የፖለቲካው ልሂቃን፣ ደጋፊዎች፣ ተቃዋሚዎች፣ የእምነት መሪዎች፣ የሚዲያ ተዋንያን፣ ነጋድያን፣ ወጣቶችና ሴቶች፣ የሀገር ሽማግሌዎችና ወታደራዊ አለቆች፤ ሀገራችን የፀነሰቺውን ልጅ በሰላም እንድትገላገል እንርዳት። አንዱ እግሩን፣ አንዱ እጁን፣ አንዱ ጆሮውን፣ አንዱ ጭንቅላቱን እየሳበ፣ ለራሱ ብቻ የሚጠቅመውን የየራሱን ልጅ ለማዋለድ ቢጥር ልጁ ይሞታል እንጂ ልጅ አይሆንም። ሀገሬም ፀንሳ በወለደች ቁጥር እየተጎዳች፣ እየደከመች ትሄዳለች።

እናት በተደጋጋሚ ልጆች ሞተውባት በስተመጨረሻ ተወልዶ የሚያድግላትን ልጅ ‹ማስረሻ› ትለዋለች። ያለፈውን መከራና ስቃይ ሁሉ የሚያስረሳ ማለቷ ነው። ሀገሬ ማስረሻ የሆነ ልጅ ትፈልጋለች። እልህና ኃይለኝነት አልጠቀመንም። ዘረኝነትና መከፋፈል አልፈየደልንም፣ ጥላቻና ሽኩቻ አላሳደገንም፤ ግዴለሽነትና ራስ ወዳድነት አላራመደንም። አሁን ሰከን ብሎ፤ ከስሜታዊነትም ወጥቶ፣ሀገሬ የፀነሰቺውን ልጅ እንዴት በሰላም ልትገላገል እንደምትችል መነጋገር፣ መመካከርና መተባበር ያስፈልጋል። ኑ! ሀገሬን እናዋልዳት፤ ኑ፡፡ እስከ መቼ ልጅ ይሙትባት?

ካልጋሪ፣ ካናዳ

28 comments:

  1. እስከ እስከ መቼ ልጅ ይሙትባት ?
    በእውነት ከልብ እግዚአብሔር ይጠብቅህ ሥራህንም ያቅናልህ / እኛም ከዘር ከጎሳ ከቋንቋ ከክልልና ከጠባብ አስተሳሰብ ተላቀን የአንድ እናት ብዙ ልጆች መሆናችንን ተገንዝበን ለበላዮቻችን በፍቅር የምንገዛ የምንታዘዝ የበላዮቻችንም ሁላችንን ያለ አድሎ ያለ ልዩነት እንደሚገባ የሚመሩበት ይልቁንም ምዕራባዊያን የሰው ስብዕና አክብረው አስከብረው ወደ እንስሳት መብት ማክበር እንደደረሱ የእኛም መሪዎች ክቡሩን የሰው ልጅ እንደሚመሩ ሊረዱ ተረድተውም ሊተገብሩ ይገባል ።
    የአንድን ሕዝብ የመብት ጥያቄ በመሳሪያ አፈሙዝ ማፈን መጨቆን ለጥቂት ጊዜ ሊቻል ይችላላል ለዘመናት ግን በፍጹም አይቻልም ። ለምን መሪዎቻችን ከጎረቤቶቻችን አይማሩም በሌሎች ሃገራት የደረሰው በእኛ እስከሚደርስ ዝም ብለን እንመለከታለን ? ሀገር ጥሩ ልጅ እንድታፈረ ጥሩ አዋለጅ እንሁን እከመቼስ ልጅ ይሙትባት /
    ዲያቆን ዳንኤል ክብረትን እግዚአብሔር ይስጥልን ።

    ReplyDelete
  2. እናመሰግናለን ወንድማችን!

    ከሚረብሽ የትርምስ ዜና እንዲህ ተስፋ የሚታይበት ፅሁፍ ማንበብ እንዴት መልካም ነው።

    ReplyDelete
  3. እርሷም ትፀንሳለች እኛም እንፈጫለን
    ለልቅሶ ነው እንጂ ለእልልታ አልታደልን፤
    ምሁራኑ፣ የፖለቲካው ልሂቃን፣ ደጋፊዎች፣ ተቃዋሚዎች፣ የእምነት መሪዎች፣ የሚዲያ ተዋንያን፣ ነጋድያን፣ ወጣቶችና ሴቶች፣ የሀገር ሽማግሌዎችና ወታደራዊ አለቆች፤ ሀገራችን የፀነሰቺውን ልጅ በሰላም እንድትገላገል እንርዳት። አንዱ እግሩን፣ አንዱ እጁን፣ አንዱ ጆሮውን፣ አንዱ ጭንቅላቱን እየሳበ፣ ለራሱ ብቻ የሚጠቅመውን የየራሱን ልጅ ለማዋለድ ቢጥር ልጁ ይሞታል እንጂ ልጅ አይሆንም። ሀገሬም ፀንሳ በወለደች ቁጥር እየተጎዳች፣ እየደከመች ትሄዳለች።
    ኑ! ሀገሬን እናዋልዳት፤ ኑ፡፡ እስከ መቼ ልጅ ይሙትባት?

    ReplyDelete
  4. አሜሪካ ከጥቅሟ ጉዳቷ የሚያመዝን ሀገር ነች!!! ታዲያ ምን እናድርግ?

    ብዙዎች አሜሪካን ሲማጸኑ ስመለከት እጅግ ያሳስበኛል። የወደፊቱ ዕጣችን ጭምር። በዓለም ላይ በአሜሪካ ዕርዳታ ዲሞክራሲን ሰላምን እና ዕድገትን ያገኘ አንድም የ3ኛው ዓለም ሀገር የለም። አሜሪካ ለሰው ህይወት ደንታ የሌላት ግን በማታለል በሴረኝነት ወደር የሌላት፤ ከሰለጠኑት ሀገራት ጋርም ሆነ በ21ኛው ክፍለ ዘመን ሰውን አንገት እያረደ ከሚገድል ሳኡዲ አረብያ ያሉ ሃገራትም ጋር ትሰራለች። ዲሞክራሲን እና ሰላምን በተመለከተ በፍጹም አንድ አቋም የሌላቸው፡ ለእንቅስቃሴዋ ሁሉ ስሌቱ የራስ ጥቅም ብቻ ነው።

    የኛ ቢጤ አላዋቂ ህዝቦች ለለውጥ የሚያደርጉትን ትግል ታዳምጥ ታዳምጥ እና ህዝቦች ወደአሸናፊነት ሲመጡ አጅባ በመግባት ቀጣዩ መንግስት የሷ አሻንጉሊት እንዲሆን አድርጋ ታቋቁማለች። በወያኔ መንግስት የተፈጸመው ይኸው ነው።

    ነፍሰ ገዳይም ሆንክ ወይም ጻድቅ ለነሱ ልዩነት የለውም። ዋናው አሸናፊ ከሆንክ አንተን የራሳቸው አሻንጉሊት ለማድረግ ያላቸውን ሁሉ ይጠቀማሉ።
    ዛሬ አሜሪካን አሜሪካን የሚሉ የፖለቲካ አስተባባሪዎች፡ ነገ ለውጥ ቢመጣ በተራቸው ሀገራችንን የአሜሪካ አሻንጉሊት ላማድረግ ከወዲሁ ልባቸውን የሰጡ ናቸው።

    ስለዚህ ድል ማሸነፍ መመንጨት ያለበት ከውስጣችን ነው፤ካራሳችን ብቻ። በየቀበሌው ያለውን፤ በየአቅራቢያችን ያለውን ወያኔ እና ተላላኪ ሁሉ በሃይል ብናስወግድ፤ንብረቱን ብናወድም፤ ማህበራዊ መገለል ብናውጅበት፡ መንግስት በአጭር ጊዜ ሀገር ጥሎ ይጠፋል። ከዚህ በኋላ የሚመጣ አስተዳደር የህዝብን ሃይል ስለሚረዳ ዳግም አይቀልድም።

    ከታች ወያኔን ከህዝቡ ጋር የሚያገናኙትን ካስወገድን፤ ግፈኛው መንግስት ያከትምለታል። ከዚያ የራሱ ወታደር ባለስልጣኖቹ ላይ መሳሪያውን ያነሳል።

    እኛ በውስጥ ማሸነፋችን ሲታወቅ አሜሪካ እንደልክስክስ ውሻ አጃቢ ሆና እንደገና ልትታበቅብን ትሯሯጣለች። ያንጊዜ እውን የሀገር ፍቅር ካለን፤ የራሳችንን ጥቅም በሚያስጠብቅ መልኩ ግንኙነት ማድረግ እንችላለን። ጠንካራ ከሆንን አሜሪካንን መቋ ቋምም እንችላለን።

    አሜሪካ ሃገራችን ስላልሆነች ምንም ልንጠብቅ አይገባም። ለሰብአዊ መብት ቢጨነቁ ኖር ሃገራቸው ያለውን ዘረኝነት ባስወገዱ ነበር ወይም . ሶርያውያን እንዲህ ባላለቁ ነበር።

    ከአሜሪካ የምንናገኘው ብቸኛ ጥቅም ለመናገር ለመደራጀት የተመቸ መሆኑ ብቻ ነው። ከዚህ ያለፈ ግን አሸናፊዎች ካልሆንን በስተቀር ጠብ የምትል ነገር የለችም፤ ብናሸንፍም ቀዳሚ ዓላማቸው እኛን በነጻ የነሱ አሽከር ማድረግ ነው። የነሱ ጥቅም ይከበር እንጂ እኛ በነርሱ ምክንያት ከአካቢያችን ሀገራት ጋር ያማያቋርጥ ግጭት ውስጥ ብንገባ ጉዳያቸው አይደለም።

    ከጠነከርንባቸው ግን ትንሽ ተመጣጣኝ ክፍያ ለማድረግ ይገደዳሉ። በቃ አሜሪካ ይኸው ነው።
    የሀገር ፍቅር ይኑረን እንጂ ያለአሜሪካ እገዛ ጠንካራ ፍትህ ሰላም እኩልነት የሰፈነባት ሀገር መመስረት እንችላለን። በብሄረሰቦችም ሆነ በዕምነቶች መካከል ሰላም ሊያሰፍን የሚችል ሀገር በቀል የሆነ አኩሪ ትሥሥር አለን። በውጭ ግንኙነትም በኩል አሜሪካን እና አውሮፓውያንን የራሳችንን ጥቅም ሚዛናዊ በሆነ መልኩ ባስጠበቀ መልኩ ብቻ ግንኙነት እንዲኖራቸው ማድረግ ይቻላል። ሀገሩን የሚወድ እና የገባው ትውልድ ብቻ ያስፈልጋል።

    ያኔ የአሜሪካን ተላላኪ ሆኖ ሶማሌን የሚወጋ ወታደር አይኖርም። ያኔ ለአሜሪካ ገብጋባ ካፒታሊስቶች ገንዘብ ብለን የምናፈናቅለው ደሃ ወገናችን አይኖርም። ያኔ ህዝባችን የአውሮፓውያን እና የአረብ ሃገራት የቻይና የማይጠቅሙ፤ ለጤናም ጠንቅ የሆኑ ሸቀጥ ማራገፊያ አይሆንም። ጥንካሬያችን ከውስጥ ከመነጨ ብቻ!!!!!!

    አቦ ወገን እንንቃ ሌሎችንም እናንቃ። የአሜሪካን ጥቁሮች ህይወት ያየ፤ ኢራቅን፤ አፍጋኒስታንን፤ ሶርያን ያየ፤ የነሳኡዲ አረብያን የአሜሪካ ልብ ወዳጅነት ያየ፤ አሜሪካ የጥፋት፤ እንጂ የዲሞክራሲ የሰላም ምሳሌ ልትሆን እንደማትችል ፍንትው ብሎ ይታየዋል።

    ReplyDelete
    Replies
    1. የዚህ ጽሑፍ አቅራቢ የፖለቲካ ጥልፍልፍና ልፊያው በደንብ የገባው ይመስላል፡፡ በግሌ አንድም ቀን ዋይት ሐውስና ካፒቶል ፊት ለፊት በሰልፍ ስም ድዴን አስጥቼ አላውቅም፡፡ ምክንያቱ ደግሞ አንተ ያልከው ነው፡፡ አሜሪካኖቹም ሆኑ እንግሊዞች ሁሉንም ያውቃሉ፡፡ ገንዘብ የሚሰጡት፣ መተኮሻውን የሚሰጡት፣ ጥይቱን የሚያቀብሉት፣ ሥልጠናውን የሚሰጡት፣ ባቀረቡት አረር ኢትዮጵያዊ ሲሞት ከማንም በፊት ቀድመው ስንት፣ መቼ፣ የት፣ እንዴት እንደሞተ እንኳን የተሟላ መረጃ ያላቸው እነርሱ ናቸው፡፡ ታዲያ ለቀባሪው ለማርዳት፤ ወይም በገዛ ምድራችን እያሳረዱን ያሉትን ኃያላን መንግሥታት "ታደጉን" ብሎ ጩኸት፤ ረብ ያለው አይደለም ለእኔ፡፡ አሜሪካኖቹ የሚመኩበት ትልቅ የሊደርሺፕ ፍልስፍና አላቸው The strategic leadership environment components, strategic thinking and future orientation. በእግጥም ይህ የዘላቂ ህልውናና ጥቅም አመራር መርህ ጥልቅና ዛሬ ታላላቆቹ አገራት አሜሪካንን ጨምሮ ራሺያ፣ቻይና፣ሕንድ፣ደቡብ ኮሪያ፣ ወዘተ አገራቸውን የሚመሩበት ፍልስፍናቸው ነው፡፡ ይህ ፍልስፍና በተለምዶ አጠራር ማኔጅመንት ከምንለው የትምህርት ዘርፍ ውስጥ የሚገኝ ቢመስልም ፍልስፍናው ጥልቅና የራሱ የልህቀት ፍልስፍና ያለው ነው፡፡ ይህንን የአመራር ፍልስፍና በቅጡ ያልተገነዘበውን እንጭጭ የፖለቲካ ጎራ አሜሪካ በስቴት ዲፓርትመንቷ አማካይነት እየጠራች እያወያየች ነው፡፡ አስተያየት ሰጪው እንዳሉት አሜሪካኖቹ የጨዋታው ሚዛን ወደየት እያደላ መሆኑን በማወቃቸው እንደ ውሻ እየተልከሰከሱ የኢትዮጵያን ዘላቂ ህልውናና ዘላቂ ጥቅም ከላይ በገለጽኩት መርህ መሠረት ለማስጠበቅ የማይችሉ በቂ ልምድ፣ጥልቅ አሳቢነት፣ የጋራ ርእይ የሌላቸውን ቡድኖች እየሰበሰቡ እያነጋገሩ ይገኛል፡፡ የስትራቴጂክ ሊደርሺፕ አስተምህሮ ከማኔጅመንት መርሆ ይለያል፡፡ (for Management - Managers are not made but born ሲል for Leadership - Experiential attributes are essential to goal achieving decision making) ሊደርሺፕ ለመሪነት የሚጠይቀው መሥፈርት ከማኔጅመን በእጅጉ ይለያል፡፡ ማኔጅመንት በተዘጋጀ ቦይ ውስጥ፣ በመዋቅር በተጠረ ሜዳ ውስጥ የመጫወት ያህል ነው፡፡ ሊደርሺፕ ደግሞ ጥልቅ እሳቤን ይፈልጋል፤ ሜዳውን ከማዘጋጀት ጀምሮ የማዋቅሩን ዋልታና ማገር ከኀልዮ አፍልቆ መሬት ላይ መተግበርን የሚጠይቅ በጣም ፈታኝ ተግባር በመሆኑ ነው፡፡ የሚያሳዝነው ግን አሁንም የአሜሪካንን ጥቅም ብቻ አስጠባቂ ቡችሎችን ለመቀበል ያረገዘ ለውጥ በራችንን እያንኳኳ መሆኑን ሳስብ የኢትዮጵያውን ወገኖቼ እየከፈሉት ያለው መስዋእትነት ከንቱ መሆኑ በጣም ያማል፡፡
      ተስፋዬ

      Delete
  5. እልህና ኃይለኝነት አልጠቀመንም። ዘረኝነትና መከፋፈል አልፈየደልንም፣ ጥላቻና ሽኩቻ አላሳደገንም፤ ግዴለሽነትና ራስ ወዳድነት አላራመደንም።

    ReplyDelete
  6. ማርያም ማርያም ማለቱንም አንርሳው!!!

    ReplyDelete
  7. ሀገሬ ማስረሻ የሆነ ልጅ ትፈልጋለች

    ReplyDelete
  8. ኑ! ሀገሬን እናዋልዳት፤ ኑ፡

    ReplyDelete
  9. Dani, you should take this responsibility.

    ReplyDelete
  10. ድሮ…
    ነፍሰ―ጡር…
    የአባትነት ክብር
            የቤተሰብ ተድላ
    ፅንስ ስትሸከም
            ማህፀን ሲላላ
    በምጥ ስትጨነቅ
            "እናቴን! እናቴን!"
    ጥሩልኝ ትላለች
          የምጥ ታሪክ ካላት
    ምክር እየሻተች።
    ባለተራው አባት
          ከወለደው ሰምቶ
           ቀበቶ ያላላል
       በምክር ቀለበት
            ህይወት ይቀጥላል።
             አዲስ ይወለዳል።
    ይሔስ አዲስ ትውልድ?
    ከተጨናገፉ ብዙ ፅንሶች መሀል
               ለዘር የተረፈው
    (በማላላት ፋንታ)
    በአዲስ ፅንሰ ሀሳብ
    ከታሰረ ወገብ
             አፈትልኮ የወጣው
    ይሔስ አዲስ ትውልድ?
              ሀገር ያክል ነገር
    አርግዞ ሲጨነቅ
            ከማን ይማከራል?
            ማንን ይጠይቃል?
                                                            ነሐሴ ፪፻፰
                                                                 ሰደ

    ReplyDelete
  11. That's exactly I am feeling about Ethiopia & so much worried about the possibility of having a stolen revolution for the 3rd time in my life.
    May God help us to have true governance that will create a country for all of us to live in true democracy, equality, justice, freedom...

    ReplyDelete
  12. አመተ ምህረት ወይስ ዓመተ ምኅረት።
    ሁሉን በአግባቡ መጠቀም መልካም ነው።

    ReplyDelete
  13. እግዚአብሔር በምህረቱ ይጎብኘን፣ አስተዋይ ልቦና ይስጠን፡፡

    ReplyDelete
  14. ሁላችንም እልል ብለን የምንቀበለው፤ ሁላችንም የአራስ ጥሪ የምናመጣለት፣ ሁላችንም በመወለዱ ገንፎ የምንበላበት፣ ሁላችንም ልደቱን የምናከብርለት፣ ከሩቅ ያሉት እንደ ሰብአ ሰገል ገሥግሠው፣ ከቅርብ ያሉት እንደ እረኞቹ ነቅተው ሄደው የሚያመሰግኑት ልጅ እንዲወለድልን ማዋለድ አለብን።

    ReplyDelete
  15. እኛም ሊያግባባንና ሊያስማማን የሚችል ሥርዓተ መንግሥት፤ የብዙኃኑን ውክልና የሚያረጋግጥ ዴሞክራሲያዊ ሂደት፤ የትብብር መነሻ የሚሆን፣ ከአጥር ይልቅ ድልድይ የሚገነባ ፌዴራሊዝም፣ ሰብኣዊና ዴሞክራሲያዊ መብቶችን የሚያከብርና የሚጠብቅ የፖለቲካ ምኅዳር ትወልዳለች ብለን ተስፋ እያደረግን ነው። ዶ/ር ዲ/ን ዳንኤል ክብረት እግዚአብሔር አምላክ ይባርክኸ፡፡

    ReplyDelete
  16. እልህና ኃይለኝነት አልጠቀመንም። ዘረኝነትና መከፋፈል አልፈየደልንም፣ ጥላቻና ሽኩቻ አላሳደገንም፤ ግዴለሽነትና ራስ ወዳድነት አላራመደንም።

    ReplyDelete
  17. melkam new memihr, huliem yemitinagerachew astaraki hasaboch nachew. long life for u.

    ReplyDelete
  18. Dn Daniel, Kale hiwot yasemalen"እናት በተደጋጋሚ ልጆች ሞተውባት በስተመጨረሻ ተወልዶ የሚያድግላትን ልጅ ‹ማስረሻ› ትለዋለች። ያለፈውን መከራና ስቃይ ሁሉ የሚያስረሳ ማለቷ ነው። ሀገሬ ማስረሻ የሆነ ልጅ ትፈልጋለች። እልህና ኃይለኝነት አልጠቀመንም። ዘረኝነትና መከፋፈል አልፈየደልንም፣ ጥላቻና ሽኩቻ አላሳደገንም፤ ግዴለሽነትና ራስ ወዳድነት አላራመደንም። አሁን ሰከን ብሎ፤ ከስሜታዊነትም ወጥቶ፣ሀገሬ የፀነሰቺውን ልጅ እንዴት በሰላም ልትገላገል እንደምትችል መነጋገር፣ መመካከርና መተባበር ያስፈልጋል። ኑ! ሀገሬን እናዋልዳት፤ ኑ፡፡ እስከ መቼ ልጅ ይሙትባት?"

    ReplyDelete
    Replies
    1. ሀገሬ አንደወትሮ ምሬት በገፋቸው ወጣቶች (ቄሮዎች፣ፋኖዎች፣ዘርማዎች…..) ሀይል ተገፍታ እና ፀንሳ መፍትሄን ወልዳለች፡፡ የወለደችው መፍትሄ ልጅ ሆኗት በሁለት እግሩ ቆሞ እንድንጋራው አቅፈን እንድንስመው አካላችን እንዲሆን እኔ ነኝ የመፍትሄ አባት ብሎ ከመታበይ ይለቅ ያለበትን ብዙ ደዌ በርብርብ ነቅለንለት አስከ መጨረሻው ኸልው ሆኖ ማይቀለበስ መፍትሄ ለሀገራችን እናበርክት ፡፡፡
      ሀገሬን በሰውኛ ከመሰልነናት ዘንዳ እኔ አካሏ ነኝ ለህይወቷ መሰረት ፤ ካለኔ ህይወት ያላትምና ሁሉም በኔ ፍላጎት ይነዳ ብለን ማን አህሎኝ ከማለት ይልቅ ያንዱ አካል መጎደል ወይም በአግባቡ አለመስራት ምን ያህል ጤናዋን ሊያናጋው እንደሚችል አስበን ፤ጤናዋ ሲነጋ መላ አካሏ እንደሚታመም እና የችግሩ ገፈት ቀማሽ መሆኑን ተገንዝበን መረባረብ እና የድርሻችን መወጣት አብይ ጉዳያችን ይሁን፡፡ አካላችን ባትሆን የከፋ ጉዳት የለውም ብለን እሷም ያንኑ አስባ የሸኘናት ኤርትራ እሷን በማጣታችን ወደድንም ጠላንም ዋጋ ከፍለናል ምን አልባት በህይወት ለመኖር የልብን እና የእጅን ዋጋ እኩል ላናረግ እንችላለን ኤርትራ እግራችን ነበረች ብንል ያለ እግር መኖር ይቻላል መሮጥ ግን አይቻልም፡፡ ለመራመድ እንኳ ሰው ሰራሽ ድጋፍ ያስፈልጋል ፡፡ የሆነውም የኸው ነው ፡፡ የኤርትራ መሄድ በኢኮኖሚያችን ፣በማህበራዊ መስተጋብሮቻችን በህዝቦች ስነ ልቦናና በሔራዊ ኩራታችን ለይ የራሱን ጠበሳ ጠሎ አልፏል ፡፡ እግር ከሌለክ ሮጠክ ጉዳይክን አትፈፅምም ያ ካልሆነ ገቢክ ለይ ተፅዕኖ ተፈጥራለክ ዊሊችር ብትገዛ እንኳ የተመቻቸ መንገድ ከሌለክ ዊልቸሩ ብቻውን ዋጋ የለውም ስለዚህ ኤርትራን ማጣታችን ብዙ ማንከሶችን እንድናስተናገድ አድርጎናል፡፡
      ለህልውና መሠረት እኔ ሳንባ ነኝ፣ ያለኔ ኩላሊት እንዴት ሊኖር፣ ልብ ነው እንጂ የህለውና መሰረት እያልን አንዴ በታሪካችን ሌላ ግዚ እንዳጋጣሚ እጃችን ለይ ባለው ተፍጠሮ ምንኩራራ ከሆነ፤ እኔ ካንተ በልጣለሁ እያልን ምንጠላለፍ ከሆነ ፤ ሌላው በኛ መልካም ፍቃድና ቸርነት እንደ ሚኖር ምናስብ ከሆነ ለሀገራችን ሁነኛ የመፍተሄ አካል መሆን አይቻለንም ፡፡ ያንዱ መኖር ከሌላው ጋር እኩል አስፈላጊ ነው ፡፡ ሁሉም የራሱን ድርሻ ነው የሚሰራው ሚኖረው ፡፡ ሣንባ የልብን ልብ የኩላሊትን አይን የጆሮን ጆሮ የአፍንጫን ሚና ሊተኩ አይችሉም፡፡ ቢተኩ እንኳ ያንዱ ሥራ ጫና ላንዱ ሰለሚደረብ በተዝናኖት ሚወጡትን ተግባር በድካምና በእንግልት መግፋት ግድ ነው ፡፡
      ሀገሬ የተጠናወታት ችግር ክፍ ለማድረግ በሚል ቀዳሚ ምክንያት የተፈጠረ አይደለም በሰውነታችን ውስጥ ገብቶ የጤና እክል ሚፈጠርብን ቫየረስ ወይም ባክቴሪያ ሰውን ለመጉዳት አላማው አርጎ ሚንቀሳቀስ አየደለም ፡፡ የራሱን ህይወት እየኖረ ነው ዛሬ ሀገራችን የተጣባት የሌብነት ፣የብሔር ማን አህሎኝነት፣ የክፉ መሰሪነት እና ውሸት መሰረት ራስን በድሎት ለማኖር ሀያል ለመሆን በሚደረጉ መንቀሳቀሶች የተፈጠሩ ናቸው፡፡
      ብዙ ችግሮቸ በማሰተናገድ ክፍኛ የተጎዳችው ሀገሬ፣ ገመምተኛዋ ሀገሬ እነዚህን በሽታዎች በመቋቋም ድንቁርናን፣ አለማወቅን አለማወቅ፣ ስህተትን አለማመን፣ ማን አህሎኝነት፣ ሰጋ አደልቦ ሰው አለመሆን(ባዶነት)፣ ሌብነት አራዊትነት እና አለማመን የመሳሰሉ አደገኛ ባክቴሪያዎች ቀስ በቀስ ከሰራ አከካላቷ ጋር ተዋህደውና አካሏ ሆነው የሷም የወለደችው መፍትሔም የኸልውና ችግር ሆነውባታል፡፡ በሀገራችን በተለያዩ ጊዜያት ተስፋ ተጥሎባቸው የነበሩ ችግር ፈቺ ሀሳቦች የሚጨነግፉት በሽተታዎቿ መድሀኒቱችን የለመዱ እና መድሀኒቱን የሰውነቷ ዋና አካል መስለውና ሆነው ከሰውነት በመጣበቅ ከሁኔታዎች ጋር በመቀለባበሰ መድሀኒቱን ሰለሚያታልሉት ነው፡፡ (medication resistance) ያደረገ በሽታ አደገኛ ነውና ልዩ ጠንቃቄ እና ከተለመደው ውጪ ለዩ ክትትል አድርጎ ማከምን ይጠይቃል፡፡

      Delete
    2. አራሱ ምፍትሄ የተወለደው ሀገሬ በመላ አካሏ ህመሟ በጠናበት ሰዓት ምጧ ተፋፍሞ የተገላገለችው እና ጠላፊ ህመሞቿን ያመለጠ ነው፡፡ አራሱን የሀገሬን የበኩር ልጅ ህይወት ለመቅጠፍ ሚደረግ ግብ ግብም አለና ነፍስ አጥፊዎችን መንግሎ መንቀል ቀድሚያ ሚሰጠው ተግባር መሆን ይርባታል፡፡
      መፍትሄ ልጃችን ህይወቱ ኸልው ሆኖ እንዲዘልቅ ጤናማ ሆኖ እንዲቦርቅ እንዲፋፋና እና መኞታችን እንዲሰምር ሀገሬም አፍይ ትል ዘንድ ኑ ሀገሬን እናርሳት፡፡ ለጊዜው የግል እና የተናጠል ቡድን ጥያቄዎችን እናቁም እና በሀገሬ እና በመፍትሄ ልጇ ኸልውና ለይ ብቻ እናተኮር የግል የተራራቀ ጥያቄዎች መለስ መሻት አራሱን አጥንት ጋጥ እንደማለት ይቆጠራል፡፡ አሁን አራሱ አጥንቱን ሚያጠንክርበት በሁለት እግሩ ሚቆምበት ጥንካሬን አንስጠው ጥርሱን በደንብ አናጠንክርለት ከዛ አጥንቱንም ቆሎውንም ሳይንገዳገድ ማስተናገድ ይችላል፡፡ ዛሬ ቀላል ብለን የምነተዋቸው ብዙ ችግሮች ቀስ በቀስ እግር እያወጡ ነው ትልቅ ችግራችን ለመሆን በመንፈራገጥ ለይ ናቸው፡፡ አንድ ነን ተብሎ ሲጮኸ ብዙ አንድነቱን ያልተቀበለ ጨኸት ውስጡ ይሰማ ነበር እና ይህንንም ድምፅ አጥፍቶ ተጊቢውን መልስ መመለስ የነገን አደጋ መቀነስ ነው፡፡ ከህብረት ጩኸት ውስጥ ከሚደበቅ ሰርሳሪ ልዩነት አንድ ፊቱኑ ተለይቶ የተቀመጠ የተሻለ ነውና ፡፡ ነገ ፀጉራም ውሻ አለ ሲሉት አንዳይሆን ዳበስ እያረጉ መፈተሸ ያባት ነው፡፡ ዛሬም ብዙ የፅንፈኝነት የሀይማኖትና የዘር ቡድን የማደራጀት እንቅስቃሴ ይስተዋላል፡፡ እነ እከሌ ብሎ ወደ ሩቅ ማየት ብቻውን በቂ አይደለም በራስ ውስጥም ያሉ አፍራሾችን አንቅሮ መትፋት በግልፅ ማውገዝ ተገቢ ነው እነ እክሌ ብለን በሙሉ አፋ የምንናገር በረሳችን ውስጥ ያሉትን ጮክ ብለን ለማውገዝ የማይቻለን ከሆነ እራስንም መመርመር ከእውነቱ ጋር መጋፈጥ ተገቢ ነው፡፡ በብሄሩ ወይም በሀይማኖት ማንነቱ የሚኮራ የሱ ማንነት አካላት የሚፈፅሙትን አኩይተ ተግባር ከማንም በፊት ጮክ ብሎ በማጋለጥ የለበሰው ማንነት በኮራበት እሴት አንዲቀጥል መሟገት መቻል አለበት ዛሬ ያልቻልነው ይህንን ነው ፡፡ የሱ ማንነት ሲነካ(ነ) እና ሲነካ አኩል ህመም ካላስተናገደ የተባለው ህብረትም አንድነትም ዋጋ ቢስ ነው፡፡ ዛሬ አኩይ ምግባር ሚፈፅሙ ወጣቶችን ትንንሽ ልጆች ናቸው ትንሽ ቡድን ናቸው እኛን አይወክሉም ብለን በደፈናው መተው በቂ አይደለም፡፡ በሰሩት ተግባር እስኪታረሙ የሸፈናቸውን የልዩነት መስመር ንደው በሙሉ ልብ ወደ አውንታዊው ጎዳና አስኪወጡ አንቅሮ መትፋት ተገቢ ይመስለኛል፡፡ ቀን ቆጥሮ የአካል ክፍልን እየሰነጣጠቀ ሚገድለውና ለአሸማቃቂ ጠረን ለአካል አለመታዘዝ የሚዳርገው ስጋ ደዌ በሽታ መንስኤ አነስተኛ ባክቴሪያ መሆኑ መዘንጋት የለበትም፡፡

      ዛሬ ለይ ያለብን ትልቅ ችግር የድህነታችን አስከፊነቱ ሚጀምረው ከሆድ መሆኑ ነው፡፡ መበላታችንን ነው ማስተማመን ያልቻልነው፡፡ የተትረፈረፈ ምግብ ሳይኖረን የምናነሳው የፖለቲካ ጥያቄ በሆድ ተገዝቶ ወደ ስሜት መነዳቱ እና አጀንዳችን ተጠልፎ ብዙ መናጋት መፍጠሩ አይቀርም፡፡ የሀይማኖት እና የፖለቲካ ቡድኖች እያንዳንዳቸው ለምነው የማብላት እና እርካሽ የፖለቲካ ትርፍ ስለማግኘት ከማንሰላሰል እጃቸው ለይ ያለውን የአውቀት እና የቁስ ሀብት አስተባብረው መጀመሪያ ሀገራቸው በሀብት ለማጥለቅለቅ ይረባረቡ ሚመጣው ውጤት የከሌ ሊባል ነው ብሎ ምቀኝነት መቆም የምነፈልገውን ስልጣን ያርቅብን እንደሆን እንጂ አንድ እርምጃ ፈቀቅ አያረግልንም ፡፡
      የዛሬ ወጣቶች በፊት ካለው ትውልድ አንፃር የትምህርት አድል ያገኘን ቢያንስ ማንበብ እና መፃፍ ሚያስችለን የትምህርት ደረጃ የደረስን ነን በርግጥ የትምህርት ስርዓታችን ሥር የሰደደ ችግር ስላለበት ማንበብ ማይችል የ10ኛ ክፍል ተማሪ እና ምሩቅ ማየት ብዙም ማያስገርም ሆኗል፤ ትልቁ ሞት ይሄ ነው፤ ለወጥ ፈላጊ ሀይል ቅድሚያ ራሱን ከመለወጥ ነው መጀመር ያለበት መጀመሪያ ራሱ ማንንም ተጠያቂ ማያረግበትን ጉድለቱን ያሽት፡፡ (ቄሮአችን ዘርማችን ፋኖአችን…) ራሱን በንባብ አደርጅቶ አመክኖያዊ ሙግት አንስቶ በየመንደሩ ያሉትን ተሚዎች ይሞግት በየአካባቢው ያሉ የአስተዳደር አካላትን ኃላፊነታቸውን በአግባቡ እንዲወጡ ይጫናቸው፡፡ ዛሬ በሀገራችን ሥልጣንና ሀላፊነት ከአደራ ይልቅ የድሎት ሁሉ በር ስለሆነ ማንም ምን እንደሚሰራ ባያቅም ለመሾም አይፈራም፡፡ ይህ የሆነው ተጠያቂነት ልል ስለሆነ ነው ተቋዋሚ (አሁን ተፎካካሪ) ፓርቲዎቻችን አራት ኪሎ ስር ቁጭ ብለው ቤተ መንግስቱ አሰኪለቀቅ ስለሚጠብቁ ታች የሀሳብ ልዩነት ሚያነሳ ጠፋ ለሽንፈት እና ትግል አለመቻል እየተበደልን ነው ብሎ ማሰበብ እና መርካት አጥጋቢ መልሳቸው ስለሆነ አነሱ ይላፉ እንጂ ምን በወጣቸው የታገላሉ እነሱስ ተሚ አይደሉ?
      የበላይ አካል ብቻ ሳይሆን ሁሉም ማህበረሰብ የሱም የሌላውም መብቱ ሲነካ ለራሱ ጠባብ ቡድን ሳያደራጅ ለሁሉም ሰው እኩል መሞገት መቻል አለበት፡፡ አመፅ የወጣነውና የታገልነው ሌላውን አባረን አንግዳ ዝንብ ለመሆን ከሆነ የጠገበን ሸኝቶ ጋጩን ለማምጣት ስለሆነ ለህዝቡ ጠጋቢው ይበጀዋል ከመላስ ወደ መጋጥ ስለሚሸጋገር ፡፡ ከስር ከስር በመሞገት ስልጣንን ተፈሪ እና ብዙ ጥያቄ መመለስ ካላደረግነው ህገ ወጡና ሌባው ሁሉ ላይ መውጣቱን የቀጥልበታል፡፡ ከስር ከስር ሳናስተካክል ቆይተን አጠራቅመን ሆ! ብለን ስንወጣም የራሱ የጎንዮሽ ችግር አለው ፡፡ የሀገር ሀብትና የሰው ህይወት መገበር ግድ ይለናል በለውጡ ሂደትም ያየነው ስለሆነ፡፡ ከሥር ከሥሩ መፍትሄ ስናበጅ ሀመም ሳናስተናግድ ቅድመ መከላከል በማድረግ ድህነታችንን አስጠበቅን ማስቀጠል ይቻለናል፡፡
      ትላንት በነበረው በብዙ ችግሮች የተጠላለፈ ሥርዓት ውስጥ ከሥርዓቱ የበልሽት ዘዋሪዎች ጋር ገጥመው ህዝብን ሲነጥቁና የነጠቀን ጀብደኛ አርገው ሲያሞካሹ የተነጠቀ ሲጎርሱ የነበሩ ሆዳሞች ዛሬ የላይ ገፅታቸውን ለውጠው እና ስልፋቸውን አስተካክለው ትላንት የጋጡትን ገበሬና የገበሬ ልጅ ዛሬ ሀያል ለመሆን በሚያደርጉት ግብ ግብ ወገን መስለው ለጥቅማቸው ፍጆታ ሲያውሉት ማየት እጅጉን ዘግናኝ ጭካኔ ነው፡፡ አሁንም ወደ ላይ እየወጡ እና መቆጣጠር ወደ ማይቻልበት እርካብ ሊፈናጠጡ በመሆኑ የገጠሩ ማህበረሰብ ገለል ብሎ ሽፋናቸውን ሊገልጥባቸውና ከመሰሪነት ዋሻቸው እንዲወጡ ተገቢውን ቅጣት እንዲያገኙ ለማድረግ የነቃው ተንኮሎ ላልገባው ንቃት መስጠት ይገባዋል፡፡ የመሰሪነት ማልያው በሀይማኖት እና በሔር ማንነት ስለሆነ ቅርብ ወዳጅ መስሎ መጠጋት የአራዊቶቹ ባህሪ ነው፡፡ በእውነተኛ ጎዳና ከሚጓዝ ኢትዮጵያዊ እህት ወንድማችን ውጪ በብሄር እና ሀይማኖት ቅርብ ስለሆነ ብለን ምንሰጠው ሽፋን ሊኖረን አይገባም፡፡ የትኛውም ብሔር እና ሀይማኖት አራዊትንትን ይፀየፋል ማንነታችን ሲቆሽሽ ቆሞ ማየት ቆይቶ እንድናወልቀው እና ለማንነት ቀውስ ሊዳርገን ይችላል እና፡፡

      Delete
    3. ትላንት ከትላንት ወዲያ በነበረው የሀገራችን ፖለቲካ ስም መለጠፍ እና ያንን ተቀባበሎ ማስተጋባት የተለመደ ነው ዛሬም እየደገምነው ነው፡፡ የቀን ጅብ ሰሞንኛችን ናት መሪያችን ከሚሊዮኖች መሀከል ለመጥራት ብሎ ቃሉን መጠቀሙ ተገቢ ሊሆን ይችላል በቀበሌ ደረጃ ግን ያንኑ ድፍን ቃል ከመጠቀም አቶ ወ/ሮ ወ/ሪት እከሌ ብሎ እቅጯን መናገር የሀገራችንን መድህን ማፍጠን ነው፡፡
      አሁን ያለብን ትልቁ ሥራ ከተፍጠሮ ጋር ግብ ግብ ፈጥሮ ድህነትን ማሸነፍ ነው በሰው እጅ ያለውን ማየት እናቁም እና ለሀገራችን ብልፅግና ለማምጣት እንስራ በአንድ ለሌት ሚመጣ ብልፅግና ፅን አስወግዶ ብልግና አንደሆነ ማስተዋል ያባት ነው ፅን የከተተው ብልፅግና ፅዳትንም ፅናትንም ያቀፈ ነውና ዘላቂ ሰለም አለው አድሜ በከፋ ጊዜም ተኝተው ሚበሉት ነው፡፡
      ዛሬ ኢትዮጵያዊ ኩራታችን እየተወገደ የሞራል ዝቅጠት እየከበበን ነው የዚህ ምክንያቱ የከፋ ድህነታችን ነው ለሆድና ለኢኮኖሚ ጥየቄያችን አፋጣኝ ምላሽ እንስጥ እራት መብላታችንን እናስተማምን ያኔ የደበዘዘው ኢትዮጰያዊ ኩራታችን ይደምቃል ለመብታችን ካላሆነ በቀር አለኝ ያለ ሁሉ ለእኩይ ምግባሩ የማያሰማራን እንሆናለን፡፡ በዚህ ሁኔታ ከቀጠልን ችግራችን ቀስ በቀስ ከቦን ያባሪያና የጉልት ሥርዓት መልሰን ለጉልበተኞች ሆድ አደር እንሆናለን የተጋረጠብን ችግር እና ድህነት የከፋ ነው ያውም መኖር ማያስመኝ ጥይት ሚያሳቅፍ፡፡ ርሀብ በሰውነት ሲነግስ አካል የራሱን መፍትሔ በማበጀት መበላላት እንደሚጀምረው ሁሉ ድህነትን ካላሸነፍን አርስ በእርስ በመባላት ሀገር አናጠፋለን፡፡
      እንደ ግለሰብም አንደ ህዝብም ስንኖር ምክንያታዊ አንድንሆን እናንብብ ሆዳችን በምግብ ምንሞላው ለመኖር ሀይል ስለሚያስፈልገን ነው ኖረንስ? ሰው አእይምሮውን ለማሰራት ይበላል እንጂ የመኖር ምክንያት መብላት አይደለም፡፡ አእይምሮም ጥሩ ምግብ ይፈላጋል ፡፡ ዛሬ በወጣቶች ዘንድ በገዛ ፍቃዳችን የአእይምሮ ቀለብ አድማ አስፍነናል፡፡ ላለማንበብ ማንደረድረው ምክንያት የለም መክንያታችን ሲለጠጥም ‹‹ማንበብ ያሳብዳል›› ብሎ ባዶ ጭንቅላት ይዞ መዞር ይደርሳል እውቀት ለመመገብ የተፈጠረ ጭንቅላት በግብስባሽ ተባራሪ ወሬ ተሞልቶ ታሪኩ ፀጉር መሸከሚያ በእርጅና ጊዜ ደሞ ኮፍያ መጫኛ እንዳይሆን የመፀሀፍ ገፆች ይገለፁ ፡፡ ለሆዳችን ጥሩ ምግብ እንደምንሻው ለአእምሮአችን ለምን ምርጥ ምርጡን ለመመገብ እንነፍገዋለን በወሬ በአሉባልታ በእግረ መንገድ ከሚገኙ እና አእይምሮን ከማያጠየረቁ ትርክምክም ይልቅ ከንባብ የሚገኘው ከማጠርቃትም አልፈው ያረሰርሱናል ሰብዕናችን ለይ የሚጥሉት አሻራም ላቅ ያለ ነው፡፡ ዛሬ የከፍተኛ ትምህርት ተቋም ሰርተፈኬት በያዘ እና ባልተማረ መካከል ያለው ልዩነት ጠፍቷል ሰው ከ 14 ዓመት በላይ በቆየው የትምህርት ታሪኩ ምንም ጥበብ ሳይዝ ከወጣ መኖር ትርጉም አጥቷል ሰርተፍኬት ሰጪውም ተቀባዩም ሰው ለመሆን የጎደላቸውን ክፍል ቢዳስሱ እና ራሳቸውን ቢያክሙ አልያ ምንምነታቸውን አምነው ቦታ ቢለቁ (በተለይ መምህር ሆኖ ለዳቦ ሚሰራ) መልካም ነው፡፡ የዚህ ውደቀታችን መንስኤ አለማንበባችን ነው ዛሬ ትምህርት ምንሰማውና ካነበብንም ምናነበው ለፈተና ብቻ ሆኗል ከዛ ወዲያ ፋይዳ የለውም እና አሱን ጥለን ሌላውን ፈተና ሽምደዳ እልፍ አእላፍ ማጠራቀሚያ ተሰጥቶን በገዛ ፍቃዳችን የራሳችን የተዘክሮ አቅም 1 ጂቢ አወረድነው፤ ይህን መማጤን ተገቢ ነው፡፡
      ዛሬ ሀይማኖቶችን የሚመሩ ሰዎች አብዛኞቹ ከፈጣሪ ይልቅ ራሳቸውን አብዝተው ስለሚሰብኩ በምዕመኑ ዘንድ ፈሪሀ አግዚያብሔር ጠፍቷል (እየሱስን እናስተዋውቃለን ብለን እኛ ታዊ ሆንን እንዳሉት መጋቢ ሀዲስ) የሰውን ህይወት መቅጠፍ መዋሸት ሌብነት ኩራት የሆነውና እንደ ጀብድ የነገሰው ለዛ ይመስለኛል፡፡ ለዚህም ንባብ አመክኖያዊ ያረገናል በምክንያት ነገሮችን ስንፈትሽ ተፈጥሮን እናደንቃለን ተፈጥሮን ስናደንቅ ፈጣሪን እናገኛለን ፈጣሪን ካገኘን ፍቅር ይኖረናል ፍቅር ካለን አንኳን ከኢትዮጵያዊ ከየተኛውም ዓለም ከመጣ ሰው ዘር በወንድምነት ለመዋሀድ እና ለማስተናገድ አንቸገርም ነባሩ ትህትናና ኢትዮጵያዊ ኩርታችን ወደ ክብር ሞገሱ ይመለሳል እኛም ፍቅርን እንረጫለን በመትታደሰው ኢትዮጵያ በአፍሪካ እና በዓለም ለትውልድ የሚተርፍ ሀብትና ታሪክ ፈፀመን ኢትዮጰያዊነት መከበር፣ ኢትዮጵያዊነት ማከበር እና መስጠት ሆኖ ሀገራችንን የዓለም ህዝብ መጠጊያ ለማድረግ ይቻለናል ፡፡ያኔ እውነትም ሀገራችንን የቃል ኪዳን ሀገርነቷን እናረጋግጣለን አስከ ምድር ፍፀሜም ማይቀለበስ ሆኖ እንዲቀጥል የቀጣዩ ትውልድ ሥራ ይሆናል፡፡
      ውድ እናት ሀገር ኢትዮጵያ ለዘላለም ትኑር

      Delete
  19. ኑ! ሀገሬን እናርሳት
    ቅዱስ ወልደማርያም ሰኔ 2010 ጅማ
    ሀገሬ ከ19ኙ መጀመሪያ ጀምሮ ብዙ መፍትሔ ፀንሳ ‹‹ጎሽ! እስኪ ሰምሮላት›› ተብሎ ሲጠብቅ እየጨነገፈባት ማርገዝ እንጂ መውለድ ያልታደልች ሆና መስንበቷን ጉምቱ ብዕረኛው ዳንኤል ክብረት አስመልከቶን ነበር፡፡ ያለውን ሁሉ በአውንታዊ እንድወስድ ምገደደው ሀገሬ ታሪክ እንጂ ሁነኛ መፍተሔ ኖሯት ከችግር ወጥታ ስላላየሁ ነው፡፡ ብዙ ፅንስ መጨንገፍ የተደጋገመባት ሀገሬ በብዙ በሽታ የተጠቃችው ሀገሬ እናውቅልሻለን ብለው በየፊናቸው መድሐኒት የሞከሩባት ሀገሬ ከድህነት(ድ) ይልቅ የጎንዮሽ ህመም ያከማቹላት ሀገሬ ዛሬ ከምዕተ ዓመት በኃላ ለመጀመሪያ ጊዜ በብረቱ በሚጥሩ አዋላጆች እጅ ወድቃ ፅንሱም ሳይሞት መፍትሔ ልጇን ተገላግላለች፡፡
    ግና ምን ያረረጋል የወለደችውም እሷም ጤና የላቸውም ፡፡ ለካ ሁነኛ አዋላጅ ብቻ በቂ አይደለም! ከወሊድ በኃላ የወለደቺው እንዲንፈራገጥ፣ ፈገግ እንዲል፣ እንዲድህ ፣ ድክ ድክ እንዲል፣ ወፊ ቆመች እንዲባል፣ ተደጋግፎ እና ታግሎ እንዲቆም እና ጎበዛ!! እንዲባል እንዲቦርቅ እና የናቲቱ ሁነኛ ተስፋና የደስታ ምንጭ እንዲሆን ጤና ይፈልጋል ፡፡ ከተፈጥሮአዊ መውለድ የሀገሬ መውለድ ልዩ ሚያረገው እሷ ከሌለች የተወለደው አይኖርም የተወለደው ባይኖር መቼም ቻይ ያላት ናት እና እሷ መኖር ትችላለች፡፡ እስከ ዛሬስ ፅንሷ ሲጨነግፍ አቅፎ መሳም እንዳማራት ኖራም አይደል?
    ሀገሬ የተገላገለችው የበኩር ልጇ እንዲሆን ኑ! ሀገሬን እናርሳት:: የሀገሬና የተገላገለችው ልጅ ምፍትሄ ደዌ መንስኤ ከዚህ በፊት የተሞከረባት እኔ አውቅልሻለሁ መድህኒት ና ተደጋጋሚ የፅንስ መጨንገፍ የወለደው ነው፡፡ ማህፀኗና የሰራ አካላቷ ይህን ልጅ ለማግኘት ስትዳክር ክፍኛ ተጎድቷል መቼም ከገመምተኛ የተወለደ እንዴት ጤና ይሆናል? ፡፡ እናም አራሶቹ በህመም እየተንገላቱ ነው ፡፡የሀገሬ ህመም በመከራ የተገላገለችው ልጇ ለይ ህይወቱን ሊያጨልም የሚችል ጋሬጣ ሆኖባታል ሀኪሙ የማዋለዱን ሚና ከተወጣና ተገቢውን ክትትል ካደረገ የማረሱ ሚና የህዝብ ነውና ኑ! ሀገሬን ተባብረን የሚበጀውን እያዋጣን እናርሳት፡፡
    ሀገሬ መፍትሔ ልጇን የታቀፈችው ቀድሞ ፅንሷን ሁለቴ ባጨነገፈባት እጅ ነው ይህ አዋላጅ በ1983 እና በ1997 ደረሰ የተባለለትን ፅንሷን ያጨነገፈባት ነው፡፡ አሁን መሻሻል እና እኩይ ባህሪውን አድሶ አፍርሽነቱን በገንቢ ባህሪያት ተክቶ ሀገሬን የልጅ እናት አርጓታል አሰዮ!! ይህ የሀገሬ አዋላጅ የክፋት ገፁ አሁን ልውጣ እያለ እየታገለው ነው፤ አሁን አሸንፎት ፍቅርና ህብረትን የገለፀበት ክንዱ ሲዝል የቀድሞ ክፋቱ ያየለ እለት ፡፡ አሁንም በኔ አውቅልሻለው ህክምና ብልሽት ፈፅሞ ልጇን የሞት ፅዋ ማቅመሱ አይቀርም ሀገሬም እንደለመደችው ማቅ ለብሳ የተረገመ ማህፀኔ ስትል ፈጣሪዋን ማማረሯን መቀጠሏ ነው፡፡ ይህ እንዳይሆን ኑ ሀገሬን እናርሳት!!

    ሀገሬ አንደወትሮ ምሬት በገፋቸው ወጣቶች (ቄሮዎች፣ፋኖዎች፣ዘርማዎች…..) ሀይል ተገፍታ እና ፀንሳ መፍትሄን ወልዳለች፡፡ የወለደችው መፍትሄ ልጅ ሆኗት በሁለት እግሩ ቆሞ እንድንጋራው አቅፈን እንድንስመው አካላችን እንዲሆን እኔ ነኝ የመፍትሄ አባት ብሎ ከመታበይ ይለቅ ያለበትን ብዙ ደዌ በርብርብ ነቅለንለት አስከ መጨረሻው ኸልው ሆኖ ማይቀለበስ መፍትሄ ለሀገራችን እናበርክት ፡፡፡
    ሀገሬን በሰውኛ ከመሰልነናት ዘንዳ እኔ አካሏ ነኝ ለህይወቷ መሰረት ፤ ካለኔ ህይወት ያላትምና ሁሉም በኔ ፍላጎት ይነዳ ብለን ማን አህሎኝ ከማለት ይልቅ ያንዱ አካል መጎደል ወይም በአግባቡ አለመስራት ምን ያህል ጤናዋን ሊያናጋው እንደሚችል አስበን ፤ጤናዋ ሲነጋ መላ አካሏ እንደሚታመም እና የችግሩ ገፈት ቀማሽ መሆኑን ተገንዝበን መረባረብ እና የድርሻችን መወጣት

    ReplyDelete
  20. ኑ! ሀገሬን እናርሳት
    ቅዱስ ወልደማርያም ሰኔ 2010 ጅማ
    ሀገሬ ከ19ኙ መጀመሪያ ጀምሮ ብዙ መፍትሔ ፀንሳ ‹‹ጎሽ! እስኪ ሰምሮላት›› ተብሎ ሲጠብቅ እየጨነገፈባት ማርገዝ እንጂ መውለድ ያልታደልች ሆና መስንበቷን ጉምቱ ብዕረኛው ዳንኤል ክብረት አስመልከቶን ነበር፡፡ ያለውን ሁሉ በአውንታዊ እንድወስድ ምገደደው ሀገሬ ታሪክ እንጂ ሁነኛ መፍተሔ ኖሯት ከችግር ወጥታ ስላላየሁ ነው፡፡ ብዙ ፅንስ መጨንገፍ የተደጋገመባት ሀገሬ በብዙ በሽታ የተጠቃችው ሀገሬ እናውቅልሻለን ብለው በየፊናቸው መድሐኒት የሞከሩባት ሀገሬ ከድህነት(ድ) ይልቅ የጎንዮሽ ህመም ያከማቹላት ሀገሬ ዛሬ ከምዕተ ዓመት በኃላ ለመጀመሪያ ጊዜ በብረቱ በሚጥሩ አዋላጆች እጅ ወድቃ ፅንሱም ሳይሞት መፍትሔ ልጇን ተገላግላለች፡፡
    ግና ምን ያረረጋል የወለደችውም እሷም ጤና የላቸውም ፡፡ ለካ ሁነኛ አዋላጅ ብቻ በቂ አይደለም! ከወሊድ በኃላ የወለደቺው እንዲንፈራገጥ፣ ፈገግ እንዲል፣ እንዲድህ ፣ ድክ ድክ እንዲል፣ ወፊ ቆመች እንዲባል፣ ተደጋግፎ እና ታግሎ እንዲቆም እና ጎበዛ!! እንዲባል እንዲቦርቅ እና የናቲቱ ሁነኛ ተስፋና የደስታ ምንጭ እንዲሆን ጤና ይፈልጋል ፡፡ ከተፈጥሮአዊ መውለድ የሀገሬ መውለድ ልዩ ሚያረገው እሷ ከሌለች የተወለደው አይኖርም የተወለደው ባይኖር መቼም ቻይ ያላት ናት እና እሷ መኖር ትችላለች፡፡ እስከ ዛሬስ ፅንሷ ሲጨነግፍ አቅፎ መሳም እንዳማራት ኖራም አይደል?
    ሀገሬ የተገላገለችው የበኩር ልጇ እንዲሆን ኑ! ሀገሬን እናርሳት:: የሀገሬና የተገላገለችው ልጅ ምፍትሄ ደዌ መንስኤ ከዚህ በፊት የተሞከረባት እኔ አውቅልሻለሁ መድህኒት ና ተደጋጋሚ የፅንስ መጨንገፍ የወለደው ነው፡፡ ማህፀኗና የሰራ አካላቷ ይህን ልጅ ለማግኘት ስትዳክር ክፍኛ ተጎድቷል መቼም ከገመምተኛ የተወለደ እንዴት ጤና ይሆናል? ፡፡ እናም አራሶቹ በህመም እየተንገላቱ ነው ፡፡የሀገሬ ህመም በመከራ የተገላገለችው ልጇ ለይ ህይወቱን ሊያጨልም የሚችል ጋሬጣ ሆኖባታል ሀኪሙ የማዋለዱን ሚና ከተወጣና ተገቢውን ክትትል ካደረገ የማረሱ ሚና የህዝብ ነውና ኑ! ሀገሬን ተባብረን የሚበጀውን እያዋጣን እናርሳት፡፡
    ሀገሬ መፍትሔ ልጇን የታቀፈችው ቀድሞ ፅንሷን ሁለቴ ባጨነገፈባት እጅ ነው ይህ አዋላጅ በ1983 እና በ1997 ደረሰ የተባለለትን ፅንሷን ያጨነገፈባት ነው፡፡ አሁን መሻሻል እና እኩይ ባህሪውን አድሶ አፍርሽነቱን በገንቢ ባህሪያት ተክቶ ሀገሬን የልጅ እናት አርጓታል አሰዮ!! ይህ የሀገሬ አዋላጅ የክፋት ገፁ አሁን ልውጣ እያለ እየታገለው ነው፤ አሁን አሸንፎት ፍቅርና ህብረትን የገለፀበት ክንዱ ሲዝል የቀድሞ ክፋቱ ያየለ እለት ፡፡ አሁንም በኔ አውቅልሻለው ህክምና ብልሽት ፈፅሞ ልጇን የሞት ፅዋ ማቅመሱ አይቀርም ሀገሬም እንደለመደችው ማቅ ለብሳ የተረገመ ማህፀኔ ስትል ፈጣሪዋን ማማረሯን መቀጠሏ ነው፡፡ ይህ እንዳይሆን ኑ ሀገሬን እናርሳት!!

    ReplyDelete