Wednesday, March 27, 2013

የተሳሳቱ ስልኮች


click here for pdf
‹‹አንድ ቀን ነው፤ ባለቤቴ ከበረራ የምትመለሰው ሌሊት ስለሆነ በግማሽ ልቤ ተኝቼ ስልኳን እጠብቅ ነበር፡፡ እኩለ ሌሊት ላይ ስልኬ ጮኸ፡፡ እኔም ቁጥሩን ሳላይ እንዴው በዳበሳ ስልኩን አነሣሁት፡፡ ‹ሃሎ አያ ግርማ› አለኝ የደወለው ሰው፡፡ ‹ተሳስተዋል ጌታዬ፤ ይህ የአያ ግርማ ስልክ አይደለም› ስል መለስኩለት፡፡ ‹ኧረ እባክዎን ፈልጌያቸው ነው› አለኝ፡፡ እኔም መሳሳቱን ደግሜ አስረዳሁትና ስልኩን ዘጋሁት፡፡ ከዚያ ጊዜ ጀምሮ በምሽት እየደወለ ‹አያ ግርማ የሉም› የሚለኝ ሰውዬ ሊያቆም አልቻለም፡፡ እየቆየሁ የስልክ ቁጥሩን ሳውቀው ማንሣት አቆምኩ፡፡ ነገር ግን ልጆቼ ወይም ባለቤቴ ስልኩን ሲያነሡት አሁንም ‹አያ ግርማ የሉም› ይለኛል ያ ሰው፡፡ ደጋግሜ መሳሳቱን ነግሬዋለሁ፡፡ ግን የሚሰማ አልሆነም፡፡ እንዲያውም ጓደኞቼ መቀለጃ አድርገውት ሲያገኙኝ ‹አያ ግርማ› ይሉኝ ነበር፡፡
አንዳንዴ ቀን፣ ብዙ ጊዜ ግን ሌሊት ይደውላል፡፡ አላነሣ ስለው በሌላ ስልክ ቀይሮ መደወልም ጀምሮ ነበር፡፡ እኔ ደግሞ ባለቤቴ ከበረራ የምትመለሰው ሌሊት ስለሆነ ስልኬን አልዘጋውም፡፡ ሰውዬው አሰለቸኝ፡፡ አንድ ሌሊት በሰባት ሰዓት አካባቢ በሌላ ስልክ ደወለና እንደለመደው ‹አያ ግርማ የሉም› ሲለኝ ድምፄን አስተዛዝኜ ‹አያ ግርማኮ ዐረፉ› አልኩት፡፡ ጩኸቱን ለቀቀው፡፡ ቤቱን ሲያደባልቀው ይታወቀኛል፡፡ ከዚያ አንዲት ሴትዮ ስልኩን ተቀበሉና ‹መቼ ዐረፉ› አሉኝ ‹ትናንት ዐረፉ› አልኩ በተሰበረ ድምጽ፡፡ እርሳቸውም ‹በሉ አይዟችሁ እግዚአብሔር ያጽናችሁ› ብለው ዘጉት፡፡ ከዚያ በኋላ ዐረፍኩ፡›› ብሎ ያጫወተኝ አንድ ወዳጄ ነው፡፡

Thursday, March 21, 2013

<ነቢዩ ኤልያስ> በአራት ኪሎ


 click here for pdf
ሰሞኑን በከተማችን በአዲስ አበባ ‹ነቢዩ ኤልያስ መጥቷል፣ የዓለምም ፍጻሜ ቀርቧል› የሚሉ አካላት ተነሥተዋል፡፡ እነርሱ እንደሚሉትም ነቢዩ ኤልያስ መጥቶ አዲስ አበባ ይገኛል፡፡ ቤተ መንግሥቱንና ቤተ ክህነቱን ለማጥራትም ተዘጋጅቷል፡፡ ከሚያጠራቸው የቤተ ክህነት ጉዳዮች ሦስቱ ትኩረት አግኝተዋል፡፡ የመጀመርያው ‹ኦርቶዶክስ የሚባለው ስም ስሕተት ነው፤ ስማችን ተዋሕዶ ነው፤ መለበስ ያለበት ልብስ ነጭ ብቻ ነው፤ እርሱም ቢሆን ጥለቱ አረንጓዴ ቢጫና ቀይ መሆን አለበት፤ አሁን ያደረግነውን ማተብ በመበጠስም አረንጓዴ ቢጫና ቀይ ማተብ ማሠር አለብን› የሚል ነው፡፡ በየአጋጣሚው ቤተ ክህነቱንና ቤተ መንግሥቱን በመንቀፍ፣ አሁን የሚታዩትን ችግሮች መሠረት አድርጎም ሕዝቡ መጥቷል የተባለውን ኤልያስ መከተል እንጂ ወደ ቤተ ክርስቲያን መሄዱ ጥቅም እንደሌለው እየተነገረው ነው፡፡ የሚከናወኑ ማናቸውም የፖለቲካ እንቅስቃሴዎችም የኤልያስን መምጣት የሚያመለክቱ እንጂ ምእመናኑ ሊሳተፍባቸው የሚገቡ አለመሆናቸው ይነገራል፡፡
እስኪ እነዚህን ነገሮች በዝርዝር እንያቸው፡፡
ኤልያስ ማነው?

Tuesday, March 19, 2013

የ500 ዓመቱ ዛፍ (ክፍል ሁለት)



በአቡነ አትናቴዎስ መቃብር ላይ የበቀለው ዋርካ በሩቅ ሲታይ
click here for pdf 
ደብረ ጽሞና ገዳም ውስጥ በአንዲት ጠባብ ጎጆ ለሦስታችንም መደብና ምድር ላይ ተነጥፎልን አደርን፡፡ ቤታችን ውስጥ ካለው አልጋ ይልቅ እንዴት ይመቻል መሰላችሁ፡፡ በአካባቢው ከአራዊት ድምጽ በቀር ሌላ ድምጽ የለም፡፡ ሬዲዮ፣ ቴሌቭዥን፣ ሞባይል እንዲህ ልሳናችሁ ሲዘጋ ለካስ ሰላም ይገኛል፡፡ አንዳንዴ እነዚህ የቴክኖሎጂ ውጤቶች መጠቀሚያዎቻችን መሆናቸው ቀርቶ በእኛ ላይ ሠልጥነውብን ኖሯል፡፡ አንዳንዴ ለሞባይል፣ ለኢንተርኔትና ለሚዲያ ያለን ፍቅር፣ ከፍቅርም አልፎ ያለ እነርሱ ሕይወታችን ሲጎድል፣ ከዚህ በፊት ያለ እነርሱ ኖረን የማናውቅ ነው የምንመስለው፡፡
የተነሣነው ከሌሊቱ አሥር ሰዓት ነው፡፡ አብረውን ወደ በረሃው ለመውረድ የገዳሙ ሦስት ልጆች ተዘጋጅተዋል፡፡ ጨለማው ድቅድቅ እንዳይል ጨረቃዋ ብቅ እያለች ፈገግታ ትልክበታለች፡፡ ሻምበል የያዛት ባትሪ ብርሃኗ የትራፊክ መብራት ያህል ነው፡፡ የት እንዳለን ማሳያ ትሆን ይሆናል እንጂ መንገዱን አታሳየንም፡፡ አንደኛው ልጅ ከፊት ሁለቱ ከኋላ ሆነው ወደ ሙገር በረሃ መውረድ ጀመርን፡፡ 

Friday, March 15, 2013

ኢትዮጵያውያን በጎ አሳቢዎችና ሠሪዎችን ይምረጡ


click here for pdf
 የ‹ዳንኤል ዕይታዎችን› ሦስተኛ ዓመት ምክንያት በማድረግ ኢትዮጵያውያን በጎ አሳቢዎችና ሠሪዎች ዕውቅና ያገኛሉ፡፡ 
ለዚህ ምርጫ ‹በጎ አሳቢዎችእና ሠሪዎች› ያልናቸው
  1. ዕውቀት እንዲሰፋ፣ መልካም ሥነ ምግባር እንዲጎለብት የሚሠሩ
  2. በተለይም ወጣቱ ትውልድ እንዲያነብ፣ እንዲሠራና እንዲሻሻል የሚጥሩ
  3. የኢትዮጵያ ስም በዓለም ላይ ከፍ ይል ዘንድ በየመድረኩ የሚተጉ
  4. በየሚዲያው ሀገራዊ ባህሎች፣ ዕውቀቶችና ታሪኮች በትውልዱ እንዲታወቁ የሚተጉ
  5. ቅርስ እንዲጠበቅ የሚደክሙ
  6. በበጎ ፈቃድ ተነሣስተው ለተረሱ ወይም ለተገለሉ የማኅበረሰቡ ክፍሎች በጎ ሥራዎችን የሚሠሩ
  7. የትምህርት ዕድል ያላገኙ የኅብረተሰብ ክፍሎች ዕድሉን እንዲያገኙ የሚለፉ
  8. በሞያቸው ከሚከፈላቸው በላይ የሞያን ሥነ ምግባር ጠብቀው ኅብረተሰቡን የሚያገለግሉ
  9. እንግዳና አይደፈሬ የሆኑ ነገሮችን በመሞከር አዳዲስ ሃሳቦችን ያመጡና ያስተዋወቁ
  10. ለሀገራዊ ና ሕዝባዊ ችግሮች ፈጥነው በመድረስና የዐቅማቸውን ሁሉ በመሠዋት የተመሰገኑ
ናቸው፡፡ ከእነዚህ ሁሉ አንዱን፣ ሁለቱን፣ ሦስቱን፣ ወይም ከተቻለ ሁሉንም የሚያሟሉ ኢትዮጵያውያንን ጠቁሙ፡፡
·         ስማቸውን፣ ስለ ሥራቸው የምታውቁትንና ከተቻለም አድራሻቸውን፡፡
·         የምርጫ ኮሚቴው የእናንተን ጥቆማ በመያዝ መረጃዎችን ካጣራ በኋላ ለእነዚህ ኢትዮጵያውያን በበዓሉ ላይ ዕውቅና በመስጠት ይሸልማል፡፡
·         ዓላማው በጎ አሳቢና በጎ ሠሪ ኢትዮጵያውያንን እኛው ራሳችን እንድናበረታታቸው፣ እነርሱን በማበረታታትም ሌሎችን በጎ አሳቢዎችና በጎ ሠሪዎችን ለማፍራት መቻል ነው፡፡

የዕጩ ግለሰቦችን ስም የምትልኩት በሚከተለው ኢሜይል ነው፡፡




ዕጩዎችዎን እስከ መጋቢት 25 ቀን 2005 ዓም ይላኩ፡፡

Thursday, March 14, 2013

‹የዳንኤል ዕይታዎች› ሦስተኛ ዓመት





የዳንኤል ዕይታዎች የጡመራ መድረክ ሦስተኛ ዓመት ሚያዝያ 5 ቀን ከቀኑ ሰባት ሰዓት ጀምሮ

በአዲስ አበባ ይከበራል፡፡ በዚህ ዝግጅት ላይ
  • የተለያዩ ኢትዮጵያውያን ጦማሪዎች ይጋበዛሉ
  • የዳንኤል ዕይታዎች የሦስት ዓመት ጉዞ በባለሞያዎች ይዳሰሳል
  • ከማኅበራዊ ሚዲያ ጥቅምና ተጠያቂነት ጋር የተያያዘ ውይይት ይካሄዳል
  • በሀገራችን የንባብን ባህል ለማሳደግ ወሳኝ የሆነ አንድ ሕዝባዊ ፕሮጀክት ይፋ ይሆናል፤ አባላትና ተባባሪዎችም ይመዘገባሉ
  • የተለያዩ ትምህርት ሰጭ መርሐ ግብሮች ይቀርባሉ
በዚህ መርሐ ግብር ላይ ለመሳተፍ ከፈለጉ በሚቀጥለው የኢሜይል አድራሻ ስምዎንና የኢሜይል አድራሻዎን በመላክ ይመዝገቡ

dkv3reg@gmail.com



የምዝገባ ጊዜ እስከ መጋቢት 25 ቀን 2005 ዓም
 

Wednesday, March 13, 2013

የ500 ዓመቱ ዛፍ


ወደ እንጭኒ መንገድ- ልብ የሚመስጥ የፈረስ ሜዳ

አሁን በምዕራብ በኩል በቡራዩ በር እየወጣን ነው፡፡ ሆሎታ አንድ ሰዓት ላይ ስንደርስ ከእኛ ጋር ለጉዞ የተዘጋጀውን የሆሎታ ኒያላ ሆቴል ባለቤት ያሬድን በእግር በፈረስ መፈለግ ጀመርን፡፡ ሆቴሉም አልገባም፣ በቤቱም የለም፡፡ በግቢው በር ላይ ያገኘነው ሰውም የት እንደሄደ መንገር አልፈለገም፡፡ ዘመድ አይጥፋ አፈላልገን አድራሻውን አገኘነው፡፡ ለካስ የሌሊት መርዶ ገጥሞት ሄዶ ነው፡፡
ያዘጋጀው መኪና የቤት መኪና ነው፡፡ ‹መንገዱ ቀና ስለሆነ ይህም ሊገባ ይችላል› የሚል መረጃ አግኝቷል፡፡ እኛም ይሁን ብለን መኪና ውስጥ ገባንና ከጠዋቱ ሦስት ሰዓት አካባቢ ከሆሎታ ወደ እንጭኒ ጉዞ ጀመርን፡፡ መንገዱ የተወለወለ አስፓልት ነው፡፡ እንደ አንዳንድ የመውጫ መንገዶችም ዘሎ ጥልቅ የሚል ሀገርኛ ሰውና ከብት የለም፡፡ እኔ፣ ከጀርመን የመጣው ሻምበል(ቀሲስ አብርሃም በለጠ) እና ያሬድ የሀገራችንን ወግ እያወጋን በመኪና ተወዘወዝነው፡፡
ሀገሩ የፈረስ ሀገር ነውና ሰላሌን የሚያስንቅ ሜዳ አለው፡፡ ዓይን ይታክታል እንጂ ሜዳው አያልቅም፡፡ ፈረሶቹ ደግሞ ከአንበሳና ከቀጭኔ የተዋለዱ ነው የሚመስሉት፡፡ ቁመታቸው እንደ ቀጭኔ ስፋታቸው እንደ ዳልጋ አንበሳ ነው፡፡ ጋማቸው ለ‹ሚስ› ምናምን የሚወዳደሩትን ፀጉር ያስንቃል፡፡ 

Saturday, March 9, 2013

አባድሮች፣ እናመሰግናለን



ከሀገር ወጣ ብዬ የተለያዩ ሀገሮች ስዘዋወር ከምቀናባቸው ነገሮች አንዱ የደንበኞች አያያዛቸው ነው፡፡ ‹ደንበኛ ንጉሥ ነው› የሚለው እዚያ በገሐድ ይታያል፡፡ ምናልባት ደንበኞች አገልጋዮቻቸውን ሲያመናጭቁ እንጂ አገልጋዮቹ ደንበኞቹን ሲያመናጭቁ ብዙ ጊዜ አታዩም፡፡ እኛ ሀገር ብዙ ቦታ ከፍላችሁም ለምናችሁም ነው፡፡ ከምግብ ቤት ዐቅም እንኳን ጥሩ ምግብ ቶሎ ለማግኘት የወይ ባለቤቱን ወይ አስተናጋጁን ማወቅ አለባችሁ፡፡ መክፈላችሁ ብቻ በቂ አይደለም፡፡
የደንበኞች መኖር ነው የነጋዴዎች የህልውና ምንጭ፡፡ ደንበኞችን መከባከብ ራስን መከባከብ ነው፡፡ አንድን ደንበኛ በሚገባ መያዝ ብዙ ደንበኞችን ያለ ማስታወቂያ ለመሳብ ያስችላል፡፡ አንድን ደንበኛ ማስቀየም ደግሞ ለብዙ ደንበኞች ክፉ ስም እንዲያወጣ ዕድል ይሰጣል፡፡ 

Wednesday, March 6, 2013

ደቂቀ ሰይጣን

ዐፄ ዘርዐ ያዕቆብ (1426-1460ዓ ም) በዘመናቸው አምልኮ ጣዖትን አስቆማለሁ ብለው ቆርጠው ተነሥተው ነበር፡፡ ይህንን ነገር ለማስቆምም ሦስት ዓይነት መንገድ ለመጠቀም አሰቡ፡፡ መምህራንን እየላኩ ሕዝቡን ለማስተማር፣ ለማስተማርያ የሚሆኑ ድርሰቶችን እንዲዘጋጁ ለማድረግና ራሳቸውም ለማዘጋጀት፣ በመጨረሻ ደግሞ ከዚህ ሁሉ የተሻገረውን ለመቅጣት፡፡
በተለይም በአምልኮ ጣዖት የተያዙትን፣ ይህንንም አምልኮ ከሕዝቡ ገንዘብ ለመሰብሰብና ሕዝቡን ለማታለል ሲሉ የሚያካሂዱትን ሰዎች የሚከታተሉ፤ ባለሥልጣናቱ በድብቅ ይህንን ተግባር ሲያከናውኑ፣ አንዳንድ ካህናትም ከሁለቱም ወገን ሆነው ሲያጭበረብሩ፣ ታዋቂ የሆኑ ሰዎችም በዚህ ባዕድ አምልኮ ውስጥ ሲነከሩ እየተከታተሉ ለንጉሡ መረጃ የሚሰጡ ሦስት ሰዎችን መድበው ነበር፡፡
ዘርዐ ክርስቶስ፣ ተዐውቀ ብርሃንና ገብረ ክርስቶስ የሚባሉት እነዚህ ሦስት ሰዎች ወደ ባዕድ አምልኮ የሚሄዱትን፣ በድብቅ ይህንን ተግባር የሚያከናውኑትን፣ በተለይም የቤተ መንግሥት ሰዎች ሆነው ለሕዝቡ የባዕድ አምልኮ ክፉ አርአያ የሚሆኑትን እንዲጠቁሙ፣ ተከታትለውም እንዲያሲዙ፣ አስይዘውም እንዲያስቀጡ ንጉሡ ሥልጣን ሰጥተዋቸው ነበር፡፡

Saturday, March 2, 2013

አባ ፊልጶስን ፍለጋ (የመጨረሻው ክፍል)



መኪናዋ ተገፍታ ለመጨረሻ ጊዜ ስትወጣ
የአካባቢው ገበሬዎችና አሣፍረናቸው የነበሩ ሌሎች ገበሬዎች ተባብረው መኪናዋን በዳገቱ መግፋት ጀመሩ፡፡ ድንበሩ አንዴ ገብቶ መሪ ይዞ ይነዳል፣ አንዴ ወርዶ ጎማውን በካልቾ ይማታል፡፡ ሙሉቀን በትጋትና ተስፋ ባለመቁረጥ መኪናዋን ከፖሊሶቹና ከገበሬዎቹ ጋር ይገፋል፡፡ ቀለመወርቅ መኪናዋን የሚመለከት የሕግ ዐንቀጽ የሚፈልግ ይመስል አንገቱን ደፍቶ አንዳች ነገር ያስሳል፡፡ ኤልያስ መነጽሩን ከፍ እያደረገ ለድንበሩ የመፍትሔ ሃሳብ ያቀርባል፡፡ ይህ ሁሉ ግን መኪናዋን ዳገት እንድትወጣ አላስቻላትም፡፡