ከአንዱ አቅጣጫ ሲሸነፍ ከሌላ አቅጣጫ ይነሣል

ወደ ዝቋላ አያሌ ወጣቶች ከአዲስ አበባ፣ ከደብረ ዘይት እና ከናዝሬት በመጉረፍ ላይ ናቸው፡፡ የእነዚህ ወጣቶች ወደ ቦታው መንቀሳቀስ ቢያንስ እሳቱን ወደ ገዳሙ ዘልቆ በመነኮሳቱ መኖርያ እና በአብያተ ክርስቲያናቱ ላይ አደጋ ከማድረስ ታድገውታል፡፡ ወደ ወንበር ማርያም ከተጓዙት የውኃ ቦቴዎች በወጣ ቶች ኃይል በማጓጓዝ፣ እሳቱ በመጣበት አቅጣጫ የሚገኙ የተወሰኑ ዛፎችን በመቁረጥ እና ሣሩን በማንሣት እሳቱ እንዳይተላለፍ አድርገውታል፡፡

ወደ አሥራ አንድ ሰዓት አካባቢ ተግ ካለ በኋላ በአሁኑ ሰዓት እሳቱ አጣብቂኝ እየተባለ ከሚጠራው ቦታ እስከ ዓርብ ረቡዕ ድረስ ባለው ቦታ ላይ ማምሻውን እንደገና የመጣ ሲሆን ወደ ገዳሙ እንዳ ይዘልቅ ለማድረግ በአካባቢው የደረሱት ወጣቶች ነቅተው በመጠባበቅ ላይ ናቸው፡፡

በአካባቢው የሚገኙ የአደጋ ተከላካዮች እንደሚገልጹት እሳቱ አንድ ጊዜ እየቆመ ሌላ ጊዜ ካልታሰበበት አቅጣጫ ይመጣል፡፡ ይህም የመከላከሉን ሥራ ከባድ ያደረገው ሲሆን እሳቱ ጠፍቷል የሚል መረጃ እንዲሠራጭም አድርጓ፡
የገዳሙ መነኮሳት እንደገለጡልኝ አሁን ችግሩን ለመቋቋም ሁለት ዓይነት ተግባራት ያስፈልጋሉ፡፡ በአንድ በኩል ከተለያዩ አካባቢዎች የሚመጡት በጎ ፈቃደኞች መጥ ረቢያ፣ አካፋ እና መቆፈርያ እየያዙ ቢመጡ የመከላከሉን ሥራ የተቃና ያደርገዋል፡፡ በተለይም አቅና የሚባለው የመቆፈርያ ዓይነት ለዚህ ሥራ አመቺ በመሆኑ ይህንን መሣርያ ይዘው እንዲመጡ ጥሪ አድርገዋል፡፡

ሁለተኛው ደግሞ በሚቻለው ፍጥነት ሁሉ እሳት የማጥፋቱን ተግባር በአውሮፕላን ወይንም በሄሊኮፕተር ለማገዝ እንቅስቃሴ ማድረግ ነው፡፡ ለዚህ ተግባርም የመንግሥትን ድጋፍ ማፈላለግ ያለበለዚያም በግል ተነሣሽነት ወጭውን በመሸፈን የእሳት ማጥፊያ አውሮፕላን ወይንም ሄሊኮፕተር ወደ ቦታው እንዲሄድ ማድረግ ወሳኝ መሆኑን በቦታው የሚገኙት የአደጋ ተከላካዮች ገልጠዋል፡፡

ከተለያዩ ከተሞች ወደ ገዳሙ የዘለቁት ምእመናን ሌሊት እና ቀን ያለ ዕረፍት የሚያደርጉትን ተጋድሎ ምግብ እና ውኃ በማቅረብ፣ በገንዘብ፣ በቁሳቁስ እና በጸሎት እንድናግዛቸው ጥሪ ቀርቧል፡፡

በእግዜአብሔር እርዳታ፣ በአቡነ ገብረ መንፈስ ቅዱስም አማላጅነት፣ በሁላችንም ትብብር አደጋውን መቀነስ ተችሏል፡፡ እሳቱ ግን ገና ፈጽሞ አልጠፋም፡፡ እናም ይበልጥ ተረባርበን ችግሩን እንዳይመለስ አድርገን መፍታት አለብን፡፡ እያንዳንዷ ሰዓት የራስዋ ዋጋ አላትና፡፡