አምላክ እየረዳን ነው

ከገዳሙ አካባቢ የተገኘው መረጃ እንደሚያሳየው እሳቱ ገዳሙን በማያሰጋበት ደረጃ ላይ ደርሷል፡፡ ነገር ግን አሁንም ከተለያዩ አቅጣጫዎች ይነሣል፡፡ በተለይም ከገደሉ አካባቢ የሚነሣውን እሳት እስካሁን መቆጣጠር አልተቻለም፡፡ ይህንን እሳት ፈጽሞ ማጥፋት ካልተቻለ ደግሞ መልሶ ለገዳሙ አሥጊ መሆኑ የማይቀር ነው፡፡ አሁን መዘናጋት አያስፈልግም፡፡ እሳት ሲተኛ የሞተ ይመስላል፡፡

የአደጋ መከላከል እና ዝግጁነት ኮሚሽን ወደ አካባቢው አንድ የልዑካን ቡድን አሠማርቶ እገዛ እያደረገ መሆኑ ተገልጧል፡፡ ኮሚሽኑ ጉዳዩን በንቃት እየተከታተለው ሲሆን በአካባቢው ለሚገኙ ሰዎች አስፈላጊ የሆነውን ርዳታ ለማድረግም ወደ አካባቢው ተነቃንቋል፡፡ የአየር ኃይል አባላት ገዳሙን ከሚደርሰው አደጋ ለመጠበቅ በተራራው ላይ በንቃት እየጠበቁ መሆኑ ተሰምቷል፡፡
አሁን የሚያስፈልገው እሳቱ እንዳይሻገር እና በገዳሙ ላይ አደጋ እንዳያደርስ በቦታው ከሚገኙ የአደጋ መከላከል እና ዝግጁነት ባለሞያዎች ምክር በመውሰድ በገዳሙ ዙርያ የእሳት መከላከያ fire break መሠራት እንዳለበት የአደጋ መከላከል እና ዝግጁነት ባለሞያዎች እየተናገሩ ነው፡

ወደ አካባቢው መምጣት ያለባቸው ሰዎች ውኃ የመሸከም፣ ዳገት ቁልቁለቱን የመቋቋም ዐቅም ያላቸው መሆን እንዳለባቸው አስተባባሪዎቹ እየገለጡ ነው፡፡  አንዳንድ ወጣቶች ያለ ልምድ እና ያለ ዐቅም በመምጣታቸው ራሳቸውን እስከ መሳት ደርሰው እንደነበር ነግረውኛል፡፡ አሁን በዋናነት የሚያስፈልገው ከሥር ውኃ ተሸክሞ መውጣት የሚችል ኃይል እና የውኃ ማጓጓዣ ዕቃዎች ናቸው፡፡ ቀደም ብሎ በገለጥነው መሠረት ብዙዎች የእሳት ማጥፊያ መሣርያዎቸን ይዘው መሄዳቸው ታውቋል፡፡