ሁለቴ መቸገር

      © ይህ ጽሑፍ በአዲስ ጉዳይ መጽሔት ላይ የወጣ ነው፡፡ በሌላ መሰል ኅትመት ባይወጣ ይመረጣል፡፡

«ከተራበ ይልቅ ለጠገበ አዝናለሁ» ይሉ ነበር አጎቴ፡፡ ለምን ብዬ ጠየቅኳቸው፡፡ «ሰው ተርቦ ከሚደርስበት ጉዳት ጠግቦ የሚደርስበት ጉዳት ይበልጣል» አሉኝ፡፡ «ሰው ጠግቦ ጉዳት ያደርሳል እንጂ ምን ጉዳት ይደርስበታል?» አልኳቸው፡፡ «እርሱኮ ነው ጉዳቱ፡፡ በሰው ላይ ጉዳት አደርሳለሁ ብሎ የሚመጣበት ጉዳት፡፡ ለተራበ ሰው ውድቀት ማለት ከመጀመርያው ደረጃ እንደ መውደቅ ነው፡፡ የጠገበ ሰው ውድቀት ማለት ግን ከመጨረሻው ደረጃ አጓጉል እንደ መውደቅ ነው» አሉ፡፡

ይህ የእርሳቸው አባባል የሕንዶችን ታሪክ ያስታውሰኛል፡፡ ሕንዶች ረሃብም ሆነ ጥጋብ ሁለቱም እኩል ይጎዳሉ ይላሉ፡፡ ረሃብ እና ጥጋብ ሁለቱም የጤንነት፣ የደኅንነት እና የሰላም ዕንቅፋቶች ናቸው ብለውም ይጨምሩበታል፡፡ ረሃብ እና ጥጋብ ሀገርን እኩል ነው የሚጎዷት ሲሉም የሚከተለውን ይተርካሉ፡፡

ትዝብት

click here for pdf

ደንበኛ ንጉሥ ነው፤ የት?

ጎንደር አንድ ሻሂ ቤት ተቀመጥን፡፡ አዘዝን፡፡ አልመጣም፡፡ ደግመን አዘዝን፡፡ አልመጣም፡፡ በኋላ ያዘዝናትን ልጅ ጠራንና «ተውሽንኮ» አልናት፡፡ አንገቷን ሰበቅ አደረገችና «ከቸኮልክ ማትሄድ» አለችን፡፡ ምን ይደረግ የፋሲልን እና የቴዎድሮስን ንግሥና እንጂ የደንበኛን ንግሥና ከማታውቅ ልጅ ብዙም መጠበቅ የለብንም ብለን ተውነው፡፡

አዲስ አበባ መገናኛ ካለው የኢትዮጵያ ንግድ ባንክ ቅርንጫፍ ሦስት ጊዜ ሄድኩ፡፡ ከድሬዳዋ የተላከ ገንዘብ ልወስድ፡፡ ሦስቴም አልደረሰም ተባልኩ፡፡ በተላከ በሦስተኛ ቀኑ፡፡ እዚያ ድሬዳዋ ስደውል ደግሞ ተልኳል ይሉኛል፡፡ ታድያ ምን ላድርግ? «በቃ የላከልህ ሰው ባንክ ሄዶ ይደውልልን» አሉኝ፡፡ ምን አደርጋለሁ ብዬ እንዳሉት አደረግኩ፡፡ በእኔው ስልክ ተደዋውለው ሰጡኝ፡፡ ለስልክ ግን የላከልኝ ሰው ከፍሏል፡፡ የባንኩ ደንበኛ መሆኔ ቀርቶ የባንኩ ሠራተኛ ሆኜ በስልኬ እየደወልኩ መረጃ ሳቀባብል ቆየሁ፡፡

አራት ሰው ሞተ 2

click here for pdf 
ነፍስ ኄር ብጹዕ ወቅዱስ አቡነ ሺኖዳ 3ኛን ቀርቤ የማየት ዕድል ያገኘሁት የዛሬ ዓመት ነበር፡፡ ግብጽ ካይሮ በሚገኘው አባስያ መንበረ ፓትርያርክ ግቢ ውስጥ፡፡ በመንበረ ፓትርያርኩ ግቢ አራት አብያተ ክርስቲያናት ሲገኙ ትልቁ ቤተ ክርስቲያን የቅዱስ ማርቆስ ካቴድራል ነው፡፡ ያሠሩት ከአቡነ ሺኖዳ በፊት የግብጽ ፓትርያርክ የነበሩት አቡነ ቄርሎስ 6ኛ ሲሆኑ ቅዳሴ ቤቱ የተከበረውም በ1968 ዓም ነው፡፡ እኛም ኢትዮጵያውያን በንጉሥ ኃይለ ሥላሴ በኩል አስተዋጽዖ ያደረግንበት ካቴድራል ነው፡፡

እኔ ግብጽ ስገባ በሀገሪቱ የተቀሰቀሰው አብዮት ሙባረክን አውርዶ ከፍተኛውን ወታደራዊ ምክር ቤት ተክቶ ነበር፡፡ ያም ቢሆን ግን የታሕሪር አደባባይ አሁንም ከአብዮቱ ውጥረት ነጻ አልነበረም፡፡ በተለየም ከዓርብ የጁምዐ ስግደት በኋላ ወደ ታሕሪር ማምራት የወቅቱ ልማድ ነበር፡፡

ዝቋላ ከቃጠሎው በላይ

ሐድጎ ነጋሽ እንዳዘጋጀው

ከጎላ ወደ ዝቋላ

  
ዓለማየሁ ደንድር ከጎላ ሚካኤል በፌስ ቡክ እንደ ተረከው

የዝቋላ አቡነ ገ/መንፈስ ቅዱስ ገዳም አባታችን አቡነ ገ/መንፈስ ቅዱስ ብዙ ገድላትን የተጋደሉበት ጥንታዊ ገዳም መሆኑ ይታወቃል፡፡ ይሄ ገዳም ዙሪያውን በደን የተሸፈነ ገዳም ነው ፡፡ ሰሞኑን ታዲያ አንድ አስደንጋጭ ዜና ሰማን፡፡ የገዳሙ ደን በእሳት ተያይዞ እየነደደ እንደሆነ እና ይሄንን እሳት ተረባርበን ማስቆም ካልቻልን ብዙ ዘመናት ተጠብቆ የቆየውን ገዳማችንን በጥቂት ሰዓታት ልናጣው እንደምንችል ተነገረን፡፡

እኔ ይሄንን ዜና የሰማሁት ከሚዲያ ሳይሆን ከዲ.ዳንኤል ክብረት ብሎግ «ክተት ወደ ዝቋላ » ብሎ በጻፈልን ጽሑፍ ነው ፡፡ በጥቂት ደቂቃዎች ውስጥ የፌስ ቡክ ገጾች በዚህ ዜና ተጥለቀለቁ፡፡

ለዝቋላ ነገ

በዝቋላ አቡነ ገብረ መንፈስ ቅዱስ ገዳም አሁን እሳት ሲነሣ እኔ እስከማውቀው ለሁለተኛ ጊዜ ነው፡፡ በሁለተኛው እሳት ጊዜ በምእመኑ እና በሚመለከታቸው አካላት ርብርብ ታሪክ ከፍ አድረጎ ሲናገርለት የሚኖር ሥራ ታይቷል፡፡ ነገር ግን ይህ እሳት ቢቻል ለሦስተኛ ጊዜ እንዳይነሣ፤ ከተነሣም ሥጋት በማይፈጥርበት መጠን እነዲሆን ለማድረግ ምን ይደረግ? የሚለው ወሳኙ ጉዳይ ይመስለኛል፡፡

አሁን የዝቋላ ገዳምን በተመለከተ ለዘለቄታው መሠራት ያለባቸው ዐሥር ጉዳዮች አሉ፡፡

98%

በአሁኑ ጊዜ የዝቋላ አቡነ ገብረ መንፈስ ቅዱስ ገዳም ከሥጋት 98 በመቶ ነጻ ሆኗል፡፡ አልፎ አልፎ ገደል ውስጥ ከሚታየው ጢስ በስተቀር እሳቱ ጠፍቷል ማለት ይቻላል፡፡ ገዳማውያኑ ላለፉት አምስት ቀናት በአሳት ማጥፋቱ ሥራ የተሳተፉን ወጣቶች በጸሎት ለማሰናበት በዝግጅት ላይ ናቸው፡፡

አሁን ገዳሙን በዘላቂነት ስለመርዳት፣ እሳቱ እንዳይነሣ ስለማድረግ መነጋገር ያለብን ጊዜ ነው፡፡

በዚህ ሥራ ላይ የአዲስ አበባ፣ የናዝሬት እና የደብረ ዘይት ሕዝብ በተለይም ወጣቶች ያሳዩት ኦርቶዶክሳዊ ቆራጥነት ለካስ ቤተ ክርስቲያን ሰው አላት ያሰኘ ነው፡፡ ልዩ ልዩ የመንግሥት አካላት፣ ነጋዴዎች እና የመኪና ሾፌሮች እግዚአብሔር ብቻ የመዘገበው አስተዋጽዖ አድርገዋል፡፡ ከተባበርን የማንፈታው ችግር፣ የማናመጣው ለውጥ፣ የማንራመደው ገደል፣ የማንሻገረው ሸለቆ እንደሌለ አይተናል፡፡ ይኼ በዝቋላ እሳት ምክንያት የታየው ኅብረት እና ፍቅር በሀገሪቱም ሆነ በቤተ ክርስቲያኒቱ ዕድገት ላይ ተሠማርቶ ችግር ወደሚፈታበት መንገድ መሻገር አለበት፡፡

ከዚህ በኋላ ወደ ዝቋላ መሄድ ያለብን እሳት ለማጥፋት ሳይሆን ታሪክ ለማየት እና በረከት ለማግኘት ብቻ መሆን አለበት፡፡

የረዳን እግዚአብሔር ከኛ ጋራ ለዘለዓለም ይሁን፡፡

እሳትን በፎቶ

የገዳሙ ሂሳብ

የዝቋላ አቡነ ገብረ መንፈስ ቅዱስን ገዳም ለዘለቄታው በእሳት በማይጠቃበት መልኩ ማቋቋም ይገባናል፡፡ ገዳሙ በመከላከሉ ሥራ ከፍተኛ የኢኮኖሚ እና የአካባቢ ጉዳት ደርሶበታል፡፡ እነሆ ገዳሙን መርዳት የምትፈልጉ ምእመናን የገዳሙ የባንክ አድራሻ የሚከተለው ነው፡፡

ለዝቋላ ደብረ ከዋክብት አቡነ ገብረ መንፈስ ቅዱስ ገዳም

የኢትዮጵያ ንግድ ባንክ

ቢሾፍቱ ቅርንጫፍ                    

የባንክ የቁጠባ ሂሳብ ቁጥር 19789

(በአካውንቱ የላካችሁ ምእመናን በኢሜይል አድራሻ dkibret@gmail.com መላካችሁን ብትገልጡልን ለገዳሙ መልእክቱን ለማቀበል ይረዳናል)

እስካሁን በሁለት ቦታዎች ከሚታየው ጢስ በቀር የተነሣ እሳት የለም፡፡ እግዚአብሔር ጸሎታችንን ሰምቷል፤ ድካማችንንም ተቀብሏል፡፡

ውኃ ነገር

በዝቋላ ተራራ ላይ የተነሣው እሳት አሁን ወደ መብረድ የሄደ ይመስላል፡፡ ከነጋ እሳት እንዳልተነሣ በአካባቢው የሚገኙ ተከላካዮች ገልጠዋል፡፡ አሁን የቅዱሳን ከተማ በሚባለው በኩል እና በዓርብ ረቡዕ በኩል ከገደሉ ሥር ጢስ እየታየ ነው፡፡

በመከላከሉ ሥራ ላይ የሚገኙት ወጣቶች እንደገለጡልኝ አሁን በአስቸኳይ የሚያስፈልገው ውኃ ነው፡፡ ወደ ቦታው የመጡት የፌዴራል ፖሊስ አባላትም በውኃ አለመኖር ምክንያት የሚፈልጉትን ያህል ማከናወን አልቻሉም፡

የውኃ መጫኛ መኪኖች ያላችሁ ውኃ ሞልታችሁ በመሄድ የገዳሙን የውኃ ማጠራቀሚያ እንድትሞሉ ትለመናላችሁ፡፡

የተከፈቱ የባንክ ሂሳቦች

የዝቋላ አቡነ ገብረ መንፈስ ቅዱስ ገዳም በገዳሙ ስም ተከፍተው በየመረጃ መረቡ የተለቀቁ የባንክ ሂሳቦችን እንደማያውቋቸው እና ምእመናኑ ጥንቃቄ እንዲያደርጉ አሳስቧል፡፡

አሁን በገዳሙ የሚደረገው የእሳት መከላከል ሥራ በበሚፈለገው መጠን እየተሠራ ሲሆን የአካባቢው ፖሊሶችም ዐቅም ያላቸውን ወጣቶችን በማስገባት ሥራውን እንዲያግዙ እያደረጉ ነው፡፡ በተራራው ላይ ሆነው የመከላከሉን ሥራ የሚያከናውኑት ወጣቶች በቦታው ላይ በቂ የሰው ኃይል መኖሩን እና የባሰ ነገር ካልመጣ በቀር አሁን ያለው ችግር በቦታው ላይ ካለው የሰው ኃይል ዐቅም በላይ እንደማይሆን ገልጠዋል፡፡

ገዳሙ በቀጣይ ለሌላ የእሳት አደጋ እንዳይጋለጥ የዝግጅት ሥራዎች መሠራት አለባቸው፡፡ ከፍተኛውን ገንዘብ የሚጠይቀው ሥራ ይኼ ነው፡፡ የአደጋ መጠባበቂያ መሣርያዎች በገዳሙ መቀመጥ አለባቸው፣ የእሳት ማጥፊያ መሣርያዎች ያስፈልጋሉ፤ የእሳት አደጋ መከላከያ መኮኒች የሚገቡበት መንገድ ያስፈልጋል፡፡ በቂ ውኃ የማጠራቀሚያ ገንዳዎች ያስፈልጋሉ፡፡ በዚህ ረገድ ከገዳሙ ጋር ተነጋግረን ወደፊት ለመግለጥ እሞክራለሁ፡፡ ዋናው የርዳታ ሥራ በዚህ ላይ ቢያተኩር ውጤታማ ይሆናል፡፡

ሊቀ ጳጳሱ

የሀገረ ስብከቱ ሊቀ ጳጳስ ብጹዕ አቡነ ጎርጎርዮስ በገዳሙ ሆነው የአደጋ መከላከሉን ሥራ እያስተባበሩ ይገኛሉ፡፡ አሁን በስልክ እንደገለጡልኝ እሳቱን የመከላከሉ ተግባር በወጣቶቹ በሚገባ እየተሠራ ነው፡፡  በፈቃዳቸው እና በራሳቸው ቁሳቁስ በኢትዮጵያዊ እና ኦርቶዶክሳዊ ወኔ ወጣቱ ትውልድ ያደረገውን ሃይማኖታዊ ተግባር አድንቀዋል፡፡

የአካባቢው ፖሊሶች ተጨማሪ የሰው ኃይል አያስፈልግም፣ ያለው በቂ ነው በሚል ሌሎችን ተጓዦች ያገዱ ሲሆን፣ ተጓዦቹ እንደገለጡት የያዙት ምግብ ማለፍ ባለመቻሉ እየተበላሸ ነው፡፡ ብጹዕ አቡነ ጎርጎርዮስ ከሚመለከታቸው ጋር በመነጋገር ችግሩን ለመቅረፍ እየሞከሩ ነው፡፡ ቢያንስ ውኃው እና ምግቡ እንዲያልፍ ለማድረግ፡

ብጹዕ አቡነ ጎርጎርዮስ በገዳሙ ተገኝተው ቅዳሴ በመቀደስ፣ በወጣቶቹ እና በፖሊስ መካከል ችግር በተፈጠረ ጊዜ በማረጋጋት፣ እንደ ወጣቱ እኩል እሳቱን ተጋፍጠው ያሳዩት አባትነት በቦታው በተገኙት ወጣቶች ዘንድ አድናቆት እና አክብሮት አትርፎላቸዋል፡፡