Sunday, July 31, 2011

የበጉ ሚስት


ብጹእ አቡነ ዘካርያስ በማኅበረ በዓለ ወልድ ሰባተኛ ዓመታዊ ጉባኤ ቺካጎ ላይ ተገኝተው እንዲህ አሉ፡፡
ወደ መዓርገ ጵጵስና ከመምጣቴ በፊት የሐዲሳት ትርጓሜ አስተምር ነበር፡፡ አንድ ቀን የዮሐንስ ራእይን ምእራፍ 19 ሳስተምር «በጉ እና የበጉ ሚስት» የሚለው ላይ ደረስን፡፡ የበጉ ሚስት ያልነው «መርዓተ በግዑ» የሚለውን ነው፡፡ ይህንን ለተማሪዎቹ አስተምሬያቸው ሊቀጽሉ ወደ ጫካ ገቡ፡፡ በጫካው አጠገብ መንገድ አለ፡፡ በመንገዱ አንድ ገበሬ ከሚስቱ ጋር ይሄዳሉ፡፡ የገበሬው ሚስት ቀደም ብላ ባሏም ተከትሏል፡፡
የሚቀጽሉት ተማሪዎች «በጉ እና የበጉ ሚስት» ሲሉ ሴትዮዋ ሰማችና ወደ ተማሪዎቹ ተጠጋች፡፡ «እናንተ ማንን ነው የበጉ ሚስት የምትሉት? እኔ ነኝ የበጉ ሚስት» ብላ ትውረገረጋለች፡፡ ይሄኔ ባልዋ ይደርሳል፡፡ «ምንድን ነው ብሎ ሲጠይቃት «የበጉ ሚስት እያሉ ይስቁብኛል» ትለዋለች፡፡ እርሱም ይባስ ብሎ «እናንተ ማንን ነው በግ የምትሉት» አለና በያዘው ሽመል ያንቆራጠጣቸው ጀመር፡፡
ልጆቹ ዱላው ሲብስባቸው «መምህራችን አስተምረውን ነው» ይሉታል፡፡ እንደ ተናደደ ሽመሉን ይዞ «እኔን በግ እያሉ የሚያስተምሯችሁ የትኛው መምህር ናቸው» እያለ መጣ፡፡ እኔም ሌላ ነገር ሳይከተል ብዬ ሸሸሁ፡፡ በኋላ የአካባቢው ሽማግሌዎች መጥተው ገላገሉን፡፡ መጽሐፍ ስመለከት ከዚህ ላይ ከደርስኩ አስታውሰዋለሁ፡፡
ችካጎ

Saturday, July 30, 2011

ፖሊስ ሆኖ ቀረ


አንዲት እናት ቤት ሄጄ ነበር ይህንን የሰማሁት፡፡ ልጆቻቸውን አስተምረው ለወግ ለመዓርግ ያደረሱ እናት ናቸው፡፡ እነዚህን ልጆች እዚህ ቦታ ለማድረስ እርሳቸው ከቅጠል ሻጭነት እስከ አስመጭ እና ላኪነት ተጉዘዋል፡፡
ቤታቸው ተጋብዘን ሄድንና ልጆቻቸውን ያስተዋውቁን ጀመር፡፡ «ይሄ ሐኪም ሆኗል፡፡ ይሄም መምህር ነው፡፡ ይህችም ነርስ ናት፡፡ ይህችኛዋ ደግሞ አካውናታንት ሆናለች፡፡ ያቺ ደግሞ ጋዜጠኛ ናት፡፡ እርሱ እሳት የላሰ ነጋዴ ሆኗል» አሉና አበቁ፡፡ እሴይ ሳሙኤል በጠየቀው ጊዜ ዳዊትን እንደዘነጋው ሁሉ አንደኛውን ልጃቸውን ዘነጉት፡፡ ደግነቱ እርሱም እንደ ዳዊት ቤት ውስጥ አልነበረም፡፡

Thursday, July 28, 2011

ላዘናችሁ ሁሉ

ማኅበረ ቅዱሳንን በተመለከተ ያወጣሁት ጽሑፍ ያሳዘናችሁ መሆኑን የገለጣችሁልኝ ወዳጆች አላችሁ፡፡ በእውነቱ ኀዘናችሁን እረዳለሁ፡፡ ይሰማኛልም፡፡፡ ይህ እንዳይሆንም የበኩሌን ሁሉ ጥረት አድርጌያለሁ፡፡ ግን ጥረቱ ሁሉ መና ሆኖ ቀረ፡፡

ማኅበሩ ብዙ የሠራ፣ ብዙም ይሠራል ተብሎ የሚታመን ነው፡፡ በቤተ ክርስቲያን አገልግሎት ላይ ለውጥ አምጥቷል፡፡ ምንም የሚጠበቅበትን ያህል ባይሆን፡፡ ነገር ግን የሰዎች ማኅበር ነውና ያጠፋል፡፡ ይሳሳታልም፡፡ ለእኔ ከባዱ ችግር ማጥፋቱ አይደለም፡፡ ጥፋቱ የሚታረምበት ውስጣዊ አሠራር ከሌለው እንጂ፡፡

Tuesday, July 26, 2011

ተመንሱስ

የሺወርቅ ወልዴ አትሮንስ በተባለ መጽሐፏ አያቷ ያጫወቷትን ተረት ነግራናለች፡፡

ሳጥናኤል አንድ ልጅ ነበረው ይባላል፡፡ ተመንሱስ የሚባል፡፡ የኔ ልጅ ከማን ያንሣል አለና ትምህርት ቤት አስገባው አሉ፡፡

ተመንሱስ ትምህርት ቤት ከገባበት ቀን ጀምሮ አርባ ስድስት ተማሪዎችን የያዘው ክፍል ቀውጢ ሆነ፡፡ የተማሪ ደብተር ይጠፋል፣ የአንዱ ደብተር ከሌላው ጋር ይቀላቀላል፤ ድንገት የአንዱ ተማሪ ወንበር ወደ ኋላ ይሄድና ተማሪው ይወድቃል፡፡ አንዱ ተማሪ ሳያስበው ሌላውን ተማሪ ይመታዋል፡፡ ጎን ለጎን በፍቅር ሲያወሩ የነበሩ ተማሪዎች ድንገት ጭንቅላቶቻቸው ይጋጫሉ፡፡

Friday, July 22, 2011

ረጅም ዕድሜ ለማንዴላ! ረጅም ዕድሜ ለሰው ልጆች መብትና ነፃነት ለሚታገሉ ሁሉ!!!


በፍቅር ለይኩን -ከደቡብ አፍሪካ
የ93 ዓመቱ አዛውንትና የነፃነት ታጋይ የኔልሰን ማንዴላ የልደት በዓል ሰኞ ሐምሌ 18 2011 እ.ኤ.አ በዚህ በደቡብ አፍሪካ በታላቅ ስሜት ነው የተከበረው፡፡ በሀገሪቱ የሚገኙ በርካታ ጋዜጦች፣ መጽሔቶች፣ የዜና አውታሮች እና ዓለም አቀፍ የመገኛኛ ብዙሃን ለእኚህ ታላቅ አባት የእንኳን አደረሰዎ መልእክትና የመልካም ልደት ምኞት መግለጫ ተጨናንቆ ነበር የዋለው፡፡
መሰረቱን በዚህ በደቡብ አፍሪካ ያደረገው DSTVም በዕለቱ የማ ንዴላንና የትግል አጋሮቻቸውን የነፃነት ተጋድሎ የሚያዘከሩ ሁለት ጥናታዊ ፊልሞች አቅርቦ ነበር፡፡ በሀገሪቱ ከሚታተሙና በርካታ አንባቢ ካላቸው ጋዜጦች መካከል ታይምስ የተባለው ጋዜጣ እንደዘገበው በመላው ደቡብ አፍሪካ የሚገኙ ወደ 12 ሚሊዮን የሚጠጉ ታዳጊ ህፃናት ለኔልሰን ማንዴላ ሰኞ እለት በትምህርት ቤታቸው 93ኛ ዓመት የልደት በዓላቸው እንኳን አደረስዎ የዘመሩት መዝሙር ከህጻናቱ ፎቶግራፍ ጋር አውጥቶት ነበር፡፡ የመዝሙሩ መልእክት የህፃናቱን ከልብ የሆን ፍቅራቸውን የሚያነጸባርቅና በእጅጉ ልብን የሚነካ ነው፡፡

Wednesday, July 20, 2011

የሃይማኖት ፖሊሲ፣ ሕግ እና ተቋም የሌላት ሃይማኖተኛ ሀገር


 
ኢትዮጵያ ታሪኳም ሆነ ሕዝቧ ሃይማተኛ ነው፡፡ ቅርሷ እና ባህሏ፣ ዘይቤዋ እና ሥነ ምግባርዋ ሃይማኖተኛ ነው፡፡ በቅርቡ በተደረጉት ቆጠራዎች 90 በመቶ በላይ ሕዝቧ ሃይማኖተኛ መሆኑ ተረጋግጧል፡፡ ይህ ደግሞ በኢትዮጵያውያን ኑሮ ውስጥ ሃይማኖት ዋናው ነገር መሆኑን አሳይቷል፡፡ የኢኮኖሚ፣ የባህል፣ የሕግ፣ የአሠራር፣ የውጭ ግንኙነት፣ የትምህርት፣ ወዘተ ፖሊሲዎች እና ዐዋጆች ሲወጡ የሚዘነጋው ነገር ግን መዘንጋት የሌለበት ነገር ኢትዮጵያ ሃይማኖተኛ ሀገር መሆንዋ ነው፡፡

Monday, July 18, 2011

ስሙ ከብዶት ሞተ

ኃይለ ገብርኤል (ከአራት ኪሎ)
የጥቁር ህዝቦች ሁሉ መመኪያ እና መኩሪያ የሆነውና በትውልድ ለትውልድ ቅብብሎሽ በደማቅ አሻራነቱ ዛሬም የሚወሳው ታላቁ ታሪካችን ሀገራችን ባህር ተሻግሮና ድንበር ጥሶ በመጣው የጣልያን ጦር ላይ ያስመዘገበችው ድል ነው። በወቅቱ ለጣሊያኖች ሽንፈት ለኢትዮጵያውያን ደግሞ የጀግንነት ኩራት ከነበሩት የጦር መሪዎች መካከል ግንባር ቀደም ተጠቃሹ አሉላ አባ ነጋ ናቸው። አንድ ጣልያናዊ ዜጋ በአጠቃላይ በኢትዮጵያውያን ጀግኖች የደረሰባቸውን ሽንፈት በተለይ ደግሞ የጦር መሪው የአሉላ አባ ነጋን አንፀባራቂ ገድል ከመጻሕፍት ካነበበ በኋላ አንዳች የሀፍረት ስሜት ይወረዋል። ይህንን ስሜት ለማስወገድም በውስጡ የበቀል ስሜት ይፈጠርበታል። ከዚያም ቁጭቱን ለመወጣት የሚያስችሉትን አማራጮች ሲያወጣ እና ሲያወርድ ከቆየ በኋላ ዓላማዬን ያሳካልኛል ያለውን አማራጭ መረጠ። ከዚያም በቤቱ የሚያሳድገውን ውሻ “አሉላ” ብሎ ስም ያወጣለታል።

Saturday, July 16, 2011

አንድ ነገር አለ


ዓርብ ዕለት ማታ ነው ለቅዳሜ አጥቢያ፣ ድሬዳዋ እምብርት ላይ ቆመን፡፡ ከአንድ የምሽት ፕሮግራም ተመልሰን ከኛ ከሚለዩ ወንድሞች ጋር እያወራን፡፡ ከኛ ራቅ ብሎ አንድ ወጣት ዘና ኮራ ብሎ ይሄዳል፡፡ ሌሎች ወጣቶች ደግሞ ከርሱ በግምት ሃምሳ ሜትር ርቀው ከኋላው ይከተሉታል፡፡
«ግን ነፍሱ ምን አግኝቶ ነው በዚህ ሰዓት እንዲህ የሚጀነነው» አለ አንዱ፡፡
«ምናቅለታለሁ» ሌላው መለሰ
«አንድ ነገርማ ሳይኖረው እንዲህ አይሆንም»
«እርሱማ ያለ አንድ ነገር እንዲህ በማታ ይጀነናል»
«አዎ አንድ ነገር ይኖረዋል፡፡»
ወጣቶቹ ወጣቱን በዚያ ማታ ስለ ጀነነው ነገር ምንም የሚያውቁት ነገር አልነበረም፡፡ ግን «በአንድ ነገር» ተስማሙ «አንድ ነገር ሳይኖረው አይቀርም» ብለው፡፡ እርግጠኛ ነኝ ወደ ዝርዝር ቢገቡ ኖሮ አይስማሙም ነበር፡፡ በምሥጢራዊው ጥቅለላ ግን ተስማሙ «አንድ ነገር አለ» በሚለው፡፡

Friday, July 8, 2011

ለቤተ መጻሕፍትዎ


ጳውሎስ ኞኞ፡- አጤ ሚኒሊክ በሀገር ውስጥ የተጻጻፏቸው ደብዳቤዎች

አዘጋጅ- ጳውሎስ ኞኞ
አሳታሚ- አስቴር ነጋ አሳታሚ ድርጅት፣
አታሚ- ርኈቦት አታሚዎች
ዋጋ፡- 120 ብር
ገጽ- 622
በኢትዮጵያ ዘመናዊ ታሪክ ውስጥ ጉልሕ ሥፍራ ያላቸው ዐፄ ምኒሊክ የተጻጻፏቸውን ደብዳቤዎች ጳውሎስ ኞኞ ከሃያ አምስት ዓመታት በፊት አዘጋጅቶ ነበር፡፡ 1978 ዓም በፊት፡፡ በዚሁ ዓመት መጽሐፉ ይታተም ዘንድ ለመነጋገር ጳውሎስ ለኩራዝ አሳታሚ ሰጠው፡፡ በኋላ ሲጠይቅ «የበላይ አካል ወሰደው» ተባለ፡፡ የበላዩ አካል ማነው? ብሎ ቢጠይቅ ግን መልስ ሰጭ አላገኘም፡፡

Thursday, July 7, 2011

የገና በዓል ወደ ሰኔ እና ሐምሌ መዛወሩን ሰምተዋል?

እኔ የምለው የገና በዓል ወደ ሰኔ እና ሐምሌ መጣ እንዴ? መቼም በዚህ በዘመናችን በተከሰተው የአየር ንብረት መዛባት ምክንያት ያልተዛባ የለምኮ፡፡ ይኼው የገና በዓለ በሀገራችን በድምቀት እየተከበረ ነው፡፡ እድሜ ለመብራት ኃይል፤ የገናን በዓል ምክንያት በማድረግ መብራቱን ቦግ እልም ብልጭ ድርግም ያደርግልን ጀምሯልኮ፡፡
እንዴው ሁል ጊዜ በጃፓን እና በቻይና፣ በኒውዮርክ እና በፓሪስ የገና መብራቶች ከመቅናት እኛም የራሳችን የመብራት ቦግ እልም ይኑረን እንጂ፡፡ በተለይ ማታ ማታ ወደ ቤታችን ስንገባ የመብራቱን ትርዒት በደንብ ለማየት እንድንችል መብራት ኃይል በደንብ ቦግ እልም ያድርግልን፡፡
መብራት ኃይል ከጀመረ ላይቀር የገና በዓል ወደ ሰኔ እና ሐምሌ መዛወሩን እንዲያውጁ ለእምነት ተቋማት እና ለፓርላማ የውሳኔ ሃሳብ ቢያቀርብስ፡፡

Monday, July 4, 2011

መኪና ያባለጋቸው


ከጓደኛዬ ጋር እያወራን በቤት መኪና እንጓዛለን፡፡ አዚህቺው አዲስ አበባ ውስጥ፡፡ እኛ በወሬያችን በጣም ስለተመሰጥን ጓደኛዬ ለካስ በቀስታ ነበር የሚነዳው፡፡ ከኋላችን ያለው መኪና ጥሩንባ ሲነፋ አልሰማ ነውም፡፡ በመጨረሻ ከኋላ ወደ ጎናችን መጣና መስተዋቱን ዝቅ አድርጎ «እናትክን እንደዚህ ላድርጋት» ብሎ ተሳደበ፡፡ ከስድቡ ይልቅ የደነገጥኩት የተሳደበውን ሰውዬ ሳየው ነበር፡፡ እንተዋወቃለን፡፡ አገሪቱ አሉኝ ከምትላቸው ትልልቅ ሰዎች አንዱ ነው፡፡ በየሚዲያው በቀን አንድ ጊዜ አታጡትም፡፡
ሲያየኝ ከመደንገጡ የተነሣ እንደ ጉም በንኖ እንደጢስ ተንኖ ነው ከአካባቢያችን የጠፋው፡፡ ለብዙ ሰዓታት ያህል ድንጋጤዬ ሊያባራ አልቻለም ነበር፡፡ እኔ ሳውቀው በጣም ጨዋ፣ ሰው አክባሪ እና ሲናገር የተረጋጋ ነበር፡፡ ክፉ ቃል ከአፉ ሲወጣ ገጥሞኝ አያውቅም ነበር፡፡ ዛሬ ምን ነካው