ለቤተ መጻሕፍትዎ

በኢጣልያ በረሃዎች

ሻምበል አብዲሳ አጋ በአርበኛነት ጀብዱ የሠራ ኢትዮጵያዊ ታሪክ

click here for pdf

• ሁለተኛ እትም ፡- 2004 ዓም
• አሳታሚ፡- ጃዕፋር የመጻሕፍት መደብር
• ዋጋ ፡- 50 ብር

 ስለ አብዲሳ አጋ እሰማ የነበረው ሕፃን ሆኜ ነው፡፡ ይህንን መጽሐፍ ሳነብ ኀዘን ነበር የሚሰማኝ፡፡ ይህች ሀገር ግን ምን ዓይነት ሀገር ናት? እያልኩ ደጋግሜ እጠይቅ ነበር፡፡ መጽሐፉ ፋሽስት ኢጣልያ በኢትዮጵያውያን ላይ ያደረሰውን አሰቃቂ ግፍ ያሳያችኋል፡፡ ከኢትዮጵያ እስከ ሶማልያ፣ ከሶማልያ እስከ ጣልያን በወገኖቻችን ላይ የደረሰውን መከራ እንደ ፊልም ታዩበታላችሁ፡፡ የነጻነት ዋጋው ምን ያህል እንደሆነ ትተምኑበታላችሁ፡፡ እነዚያ ወገኖች ለነጻነታችን የከፈሉትን ዋጋ እና እኛ በነጻነታችን የሠራነውን ሥራ ስትመዝኑት ታፍራላችሁ፡፡

 አብዲሳ አጋ በምዕራብ ኢትዮጵያ በተረደገው ውጊያ ተማርኮ ነው ጣልያን የተወሰደው፡፡ በጣልያን እሥር ቤት ውስጥ ሰው ሊቀበለው ከሚችለው በላይ ግፍ ተውሎበታል፡፡ አንድም በእሥረኛነቱ፣ አንድም በጥቁርነቱ፡፡

በኋላ ግን ብርድ ልብሱን ተልትሎ እንደ መሰላል በመሥራት ከሌሎች ሀገር ዜጎች ጋር ከእሥር ቤት አመለጠ፡፡ በዚያው በጣልያን በማያውቀው ምድር የአርበኞችን ጦር እየመራ ወገኖቹን የሚያሰቃየውን ፋሽስት ተፋልልሞታል፡፡ በጀግንነቱ የተነሣ ጣልያኖች ስሙን ሲሰሙ ይሸበሩ ነበር፡፡ ሌላው ቀርቶ የጣልያን ጎረምሶች ጥቁር ቀለም እየተቀቡ አብዲሳ አጋ ነን እያሉ ሕዝቡን ያስጨንቁት ነበር፡፡

ጣልያንን በጣልያን ምድር ተዋግቶ አሸነፈው፡፡ ከእንግሊዝ ጦር ጋርም በድል ተቀላቀለ፡፡ ጥቁር መሆኑ ከድል በኋላ ሽልማትን ሳይሆን መከራን አመጣበት፡፡ ዜግነቱን እንዲቀይር የተጠየቀውን ጥያቄ ባለመቀበሉ በአርበኛነቱ ጊዜ ወንጀል ሠርቷል ተብሎ እንዲከሰስ አደረገው፡፡ የተከሰሰበት ሳይገለጥለት፣ እንዲከራከር ሳይፈቀድለት በነጭ ዳኞች የ32 ዓመታት እሥር ተከናነበ፡፡

በኋላ ግን  እሥሩ ወደ ገንዘብ ተለውጦለት የእንግሊዝ መንግሥት ከፍሎ አስወጣው፡፡ ከዚያም በኋላ ቢሆን ካናዳዊ፣አሜሪካዊ እና እንግሊዛዊ እንዲሆን ተለምኖ ነበር፡፡ ድኻዋ ሀገሬ ትበልጥብኛለች ብሎ እምቢ አለ፡፡

ሀገሩ ሲገባ ብዙ መከራ ነው የደረሰለት፡፡ እንግሊዞች የሻለቃ መዓርግ ቢሰጡትም ኢትዮጵያ ግን እንደገና ሠልጥነህ እቀጥርሃለሁ አለቺው፡፡ ስሙን የማጥፋት ዘመቻ ተከፈተበት፡፡ እንግሊዞች የከፈሉለትን ዕዳ የመክፈል ፈተና ገጠመው፡፡ ያ ዓለምን ያስደነቀ ጀግና፣ ያ እባክህ የኛ ዜጋ ሁን ተብሎ የተለመነ ጀግና፣ ያ ዓላም ታሪኩን ሊሰማ የሚጓጓለት ጀግና ሀገሩ ገብቶ ልጆቹን ማሳደጊያ አጣ፡፡

«ፍዳው ያላለቀለት በሬ ቆዳው ለነጋሪት ይሆናል» ይላል አብዲሳ በሀገሩ የገጠመውን መከራ ሲገልጠው፡፡

መጽሐፉን ግዙና አንብቡት፡፡ በዚያውም ግን ኢትዮጵያ ለጀግኖች የምትስማማ ሀገር ናት? ጀግና መፍጠር እንጂ ጀግና መንከባከብ የማንችለው ለምንድን ነው? አሁን አብዲሳ አሜሪካዊ ወይንም እንግሊዛዊ ቢሆን ኖሮ ዕጣ ፈንታው ይህ ይሆን ነበር? እያላችሁ ራሳችሁን ጠይቁ፡፡

በሮም አደባባይ የኢትዮጵያ ባንዴራ ሲደፈር አይቶ በጀግንነት ጠላትን ያንጎራደደው አብዲሳ አጋ በእሥር ቤት ጠያቂ አጥቶ በብስጭት እንደ ሞተ በመጽሐፉ ውስጥ ሳነብ «ሀገሬ ኢትዮጵያ ሞኝ ነሽ ተላላ» የሚለውን ግጥም የገጠመው ሥጋ እና ደም አለመሆኑን ዐወቅኩ፡፡ በወቅቱ የነበረው የኢትዮጵያ መንግሥት ዘወር ብሎ አላየውም፡፡ ዘርዐይ የደረስን የገደለው የመረሳቱ ብስጭት ነው፡፡

እስኪ አንቡና እንደኔ ተቃጠሉ፡፡