አንድ አፍታ ከ ፖፕ ሺኖዳ ጋር

                  የፓትርያርኩ መኖርያ

ጠዋቱ ቁርስም አልቀመስን፡፡ በግብጽ ቤተ ክርስቲያን የኢትዮጵያ ኦርቶዶክስ ተዋሕዶ ቤተ ክርስቲያን ወኪል የሆኑት አባ ገብረ ሕይወት ወይንም ግብጻውያን እንደሚጠሯቸው አቡነ ሐያት ከፖፕ ሺኖዳ ጋር የተያዘው ቀጠሮ ከጠዋቱ ሦስት ሰዓት መሆኑን ትናንት ማታ ነግረውናል፡፡

እኛ ያረፍነው መዲናት ናስር ከሚገኘው የቅድስት ድንግል ማርያም እና የቅዱስ አትናቴዎስ ቤተ ክርስቲያን አጠገብ ነው፡፡ ከቤተ ክርስቲያኑ አጠገብ የእንግዶች ማረፊያ ባለ አራት ፎቅ ሕንፃ አለ፡፡ እኛ ሁለተኛው ፎቅ ላይ ነው ያረፍነው፡፡

          መንበረ ፓትርያርክ ቅዱስ ማርቆስ፣
 

ከመዲናት ናስር ወደ መንበረ ፓትርያርኩ ወደ አባስያ ለመጓዝ የተጨናነቀውን የካይሮ ትራፊክ ማለፍ ይጠይቃል፡፡ እዚህ ሀገር መኪናው ከሰው ቁጥር ይበዛል፡፡ እስካሁን የትራፊክ መብራት ሲበራ እንጂ በመብራት መኪና ሲቆም አላየሁም፡፡ ክላክስ እያደረጉ መጓዝ ብቻ ነው፡፡ መኪኖቹ ክላክስ እንጂ ፍሬን ያላቸው አይመስሉም፡፡

 

                  በእንግዶች ማረፊያ

ከጠዋቱ ሁለት ሰዓት ላይ ግቢያችንን ለቅቀን ወጣን፡፡

አባስያ ስንደርስ አቡነ ሐያትን አገኘናቸው፡፡ ከዚያም ተያይዘን ወደ መንበረ ፕትርክናው አመራን፡፡ መንበረ ፕትርክናው ከመንበረ ማርቆስ ግቢ ውስጥ አነስተኛውን ቦታ ነው የያዘው፡፡ ሰፊውን ቦታ የያዘው የቅዱስ ማርቆስ ቤተ ክርስቲያን ነው፡፡ ባለ ሦስት ፎቅ ሆኖ የተገነባው ይህ ካቴድራል ርዝመቱ የአራት ኪሎውን ቅድስት ሥላሴ ካቴድራል ሦስት እጥፍ ያህላል፡፡

ይህ መንበረ ፕትርክና የተገነባበት ቦታ ጥንት የግብጻውያን ክርስቲያኖች መቃብር የነበረበት ቦታ ነው፡፡ ቦታው ለቤተ ክርስቲያኒቱ የተሰጠው በ969 ዓም ለቤተ መንግሥቱ መሥሪያ ተብሎ በተወሰደባት ቦታ ምትክ ነው፡፡ በቦታው ላይ ጥንታዊው የአባ ሮዩስ ቤተ ክርስቲያን ነበረበት፡፡

በ12ኛው መክዘ በአካባው 12 አብያተ ክርስቲያናት ነበሩ፡፡ በ1280 ዓም አጽራረ ቤተ ክርስቲያን ተነሥተው አብያተ ክርስቲያናቱን አቃጠሏቸው፡፡ ከዚያም በቦታው ሁለት አብያተ ክርስቲያናት ተሠሩ፡፡

ቤተ ክርስቲያኑን ያሠሩት ፖፕ ቄርሎስ 6ኛ ሲሆኑ ቅዳሴ ቤቱ የተከበረውም በ1968 ዓም ነው፡፡

መንበረ ፕትርክናው የሚገኘው ከቤተ ክርስቲያኑ ፊት ለፊት ነው፡፡ ወደ መንበረ ፕትርክናው ልትደርሱ ስትሉ ከግራ እና ከቀኝ ተራራ የሚያህሉ ሁለት ውሾች አሉ፡፡ በቅርብ ጊዜያት በግብፃውያን ክርስቲያኖች ላይ አደጋዎች እየበዙ ሲመጡ ለጥበቃ የገቡ ናቸው አሉን፡፡ እውነትም በየትኛውም የግብጽ ቤተ ክርስቲያን ስትገቡ ተፈትሻችሁ ነው፡፡ በብዙ አብያተ ክርስቲያናት እንዲያውም የኤሌክትሪክ መፈተሻዎች አሉ፡፡

ወደ ውስጥ ስንዘልቅ አያሌ እንግዶች ተኮልኩለዋል፡፡ ለካስ ቤተ ክህነት የትም ሀገር ጠባዩ አንድ ነው አልኩ በልቤ፡፡ ወደ እንግዶች መጠበቂያ ቤት ወሰዱንና አንድ ሠላሳ ደቂቃ ተቀመጥን፡፡ ከዚያም ወደ ልዩ ጸሐፊያቸው ወደ አቡነ ኤርምያስ ቢሮ ገባን፡፡

ፖፕ ሺኖዳ ሦስት ልዩ ጸሐፊዎች አሏቸው፡፡ ሦስቱም ኤጲስ ቆጶሳት ናቸው፡፡ ሃያ ደቂቃ ያህል በልዩ ጽሕፈት ቤቱ ካረፍን በኋላ ተራችን ደርሶ ገባን፡፡

                            ከፖፕ ሺኖዳ ጋር

አቡነ ሺኖዳ አጭር ናቸው፡፡ መንበራቸውም እንደ እርሳቸው አጭር ነው፡፡ በእድሜ እና በአገልግሎት ብዛት መዳከማቸውን የፊታቸው ገጽታ ይመሰክራል፡፡ ይህም ሆኖ ግን ረቡዕ እና ዓርብ በካይሮ እና በእስክንድርያ ምእመናኑን ማስተማራቸውን አልተውም፡፡ እኤአ ኦገስት 3 1923 ዓም በላዕላይ ግብጽ አስዩት የተወለዱት ሺኖዳ ዛሬ በሰማንያ ስምንተኛው እድሜ ላይ ይገኛሉ፡፡ የጻፏቸው ከአንድ መቶ በላይ መጻሕፍት በመንበረ ፓትርያኩ ቤተ መጻሕፍት ልዩ ቦታ ተሰጥቷቸዋል፡፡

በ1971 ኖቬምበር 14 ቀን በመንበረ ማርቆስ የተቀመጡት ፖፕ ሺኖዳ በመንበረ ማርቆስ ለ40 ዓመታት አገልግለዋል፡፡

«ኢትዮጵያውያን አባቶችን ለማየት በመቻሌ እጅግ ደስ ብሎኛል፡፡» አሉን ከዚያ ሰውነት የሚወጣ በማይመስል አስገምጋሚ ድምፅ፡፡

«ቤተ ክርስቲያን በኢትዮጵያ እንዴት ናት? ገዳማቱስ?» ብለው ጠየቁን፡፡

«በግብጻውያን ክርስቲያኖች ላይ በደረሰውና በሚደርሰው መከራ ሁሉ የኢትዮጵያ ቤተ ክርስቲያን አባቶች እና ምእመናን እያዘኑ» መሆኑን ብጹዕ አቡነ ያሬድ ገለጹላቸው፡፡

ከእርሳቸው ጋር ፎቶ ለመነሣት አስፈቅጄ ስቀርብ የወጣቱን እንቅስቃሴ በተመለከተ ጠየቁኝ፡፡ እኔም በአጭሩ ነገርኳቸው፡፡ «እንደ አባቶቻችሁ ለእግዚአብሔር ብቻ ስትሉ አገልግሉ፡፡ የናንተ አባቶች ለእግዚአብሔር ብቻ ሲሉ የሚያገለግሉ ነበሩ» አሉ፡፡

ስንለያቸው ለእያንዳንዳችን ፊርማቸው ያረፈበት ስጦታ ሰጡን፤ ከዚያም

ፊርማቸው ያረፈበት ስጦታ ሰጡን

«አሁን ለሕክምና ወደ አሜሪካ በቅርብ እጓዛለሁ፡፡ እግዚአብሔር ጤና እንዲሰጠኝ እና በሚገባ እንዳገለግል ጸልዩልኝ» አሉ ሺኖዳ፡፡

እስኪ ሁላችንም እንጸልይላቸው፡፡

አባስያ፣ ካይሮ፣ ግብጽ