የዳንኤል እይታዎች አንደኛ ዓመት ተከበረ

 የዳንኤል እይታዎች የጡመራ መድረክ አንደኛ ዓመት በአዲስ አበባ ከተማ በአኩስም ሆቴል አዳራሽ መጋ ቢት 18 ቀን 2003 ዓም ተከበረ፡፡

በበዓሉ ላይ ጥሪ የተደረገላቸው እና በኢሜይል የተመዘገቡ ከ500 በላይ ታዳሚዎች ተገኝተዋል፡፡

በዓሉ የተጀመረው በበገና፣ መሰንቆ፣ ክራር እና ዋሽንት በተቀናበረ ጥንታዊ ዝማሬ ሲሆን በማስከተልም የአጫብር ወረብ ቀርቧል፡፡

 

የዕለቱ ፕሮግራም መሪዎች የሸገሩ ጋዜጠኛ አንዱዓለም እና የአዲስ አድማሷ ጽዮን አዲስ ከታተመው የዳንኤል መጽሐፍ አንዳንድ መጣጥፍ አቅርበዋል፡፡

የዕለቱን ትኩረት የወሰደውና በአቀራረቡ የተመሰገነው አምስት ባለሞያዎች ያቀረቡት ዝግጅት ነበር፡፡ የታሪክ ባለሞያው ብርሃኑ ደቦጭ፣ የአኩስም ዩኒቨርሲቲ የሥነ ጽሑፍ መምህር ገዛኸኝ ፀ፣ የኮተቤው የሻው፣ የኅትመት እና ዌብ ጋዜጠኝነት ባለሞያው ዐሥራት ከበደ እና የኮሙኒኬሽን ባለሞያው ነጻነት ተስፋየ በዳንኤል ጽሑፎች እና ተያያ ዥ ጉዳዮች ላይ ላይ ጥናታዊ ጽሑፎች አቅርበው በተሳታፊዎች ለሁለት ሰዓታት ያህል ውይይት ተደርጎባቸዋል፡፡

በመጨረሻም ለአዘጋጆቹ ለዐሉላ ጥላሁን፣ ኢዮብ ሥዩም፣ መንግሥተ አብ አራንሺ፣ ዲያቆን ታደሰ እና አሸናፊ ደምሴ ከዲያቆን ዳንኤል ባለቤት ከወ/ሮ ጽላት ጌታቸው ከብር የተሠራ የቁልፍ መያዣ ተበርክቶላቸዋል፡፡

ዝግጅቱ የተካሄደበት የአኩስም ሆቴል ሠራተኞች ለዝግጅቱ ያላቸውን ፍቅር ለመግለጥ በራሳቸው አነሣሽነት የውኃ ዳቦ ያቀረቡ ሲሆን ይህም በተሳታፊዎቹ ዘንድ ልዩ ስሜትን ፈጥሮ ነበር፡፡

የዝግጅቱን ወጭ በመሸፈን አባ ቴዎድሮስ አካሉ ከስታቫንገር እና አባ አብርሃም ከኦስሎ ከአዘጋጅ ኮሚቴዎቹ ምስጋና ተችሯቸዋል፡፡ የአዲስ ጉዳይ ዝግጅት ክፍልም በራሱ ወጭ ለበዓሉ የተዘጋጀውን ብሮሸር አሳትሞ አቅርቧል፡፡

 

የበዓሉ ፎቶዎች እና ፊልሞች እንዲሁም ጥናታዊ ጽሑፎቹ በተከታታይ ወደፊት ይቀርባሉ፡፡