የቅዱስ ጳውሎስ ዋሻ

የማልታ ጥንታዊት ከተማ በሆነችው ምዲና (መዲና ከሚለው የዓረብኛ ቃል የተገኘ ሲሆን ከተማ ማለት ነው)፡፡ አንድ ታሪካዊ ሥፍራ አለ፡፡ ሐዋርያው ቅዱስ ጳውሎስ ለሦስት ወራት ያህል የኖረበት እና ያስተማረበት ቦታ፡፡ በሐዋርያት ሥራ ምእራፍ 27 እና 28 ላይ እንደተነገረው ቅዱስ ጳውሎስ ለፍርድ ወደ ሮም ሲሄድ በሜዲትራንያን ባሕር ላይ መርከባቸው አቅጣጫ ሳተች፡፡ ለ14 ቀናትም ያህል ተንገላቱ፡፡ ከ14 ቀናት በኋላ ወደ አንዲት ደሴት ደረሱ፡፡ ደሴቲቱም መላጥያ እንደምትባል ሰሙ፡፡

በመላጥያ የተቀበላቸው የደሴቲቱ ገዥ የፑፕሊዮስ አባት ታምሞ ነበር፡፡ ቅዱስ ጳውሎስ ፈወሰለት፡፡ በዚህም የተነሣ የአካባው ሰዎች ቅዱስ ጳውሎስን በበጎ ተቀበሉት፡፡ በደሴቲቱም ለሦስት ወራት ያህል ተቀመጠ፡፡

የማልታ እና የጉዞ ደሴት ሰዎች ክርስትናን የተቀበሉት በዚያ ጊዜ መሆኑን ይተርካሉ፡፡ ቅዱስ ጳውሎስ ወደ ምዲና መጥቶ በከተማዋ መካከል በሚገኘው ዋሻ ውስጥ ለሦስት ወር እንደ ተቀመጠ የማልታ ትውፊት ይገልጣል፡፡ ከተቀመጠበት ዋሻ አጠገብ በቅዱስ ጳውሎስ የተባረከ የዋሻ ቤተ ክርስቲያን ይገኛል፡፡ የአካባቢውን ሰዎች ሲያስተምር እና ሲያጠምቅ የነበረውም በዚህ ዋሻ መሆኑን ይናገራሉ፡፡

ከሦስት ወራት በኋላ በደሴቲቱ ከርሞ በነበረው የእስክንድርያ መርከብ ተነሣን፡፡ ይላል ቅዱስ ሉቃስ በሐዋርያት ሥራ ላይ፡፡