ቦምብ ያላፈረሰው ቤተ ክርስቲያን

በማልታ ሞስታ ከተማ ውስጥ በ1860 ዓም የተገነባ የሮቱንዳ ቅድስት ድንግል ማርያም ቤተ ክርስቲያን ይገኛል፡፡ የሞስታ ነዋሪዎች ይህንን ቤተ ክርስቲያን ያነፁት በትርፍ ጊዜያቸው ሕንፃውን በመገንባት በነፃ ነው፡፡

የሮቱንዳ ቅድስት ድንግል ማርያም ቤተ ክርስቲያን ውጫዊ ገጽታ

ቤተ ክርስቲያኑ ክብ ቅርጽ ያለው ሲሆን ከወገቡ በታች ግማሽ ክብ ሆኖ ፊቱ ወደ ደቡብ የዞረ ነው፡፡ ውስጡ በልዩ ልዩ የጥበብ ሥራዎች እና ሥዕሎች ያጌጠ ነው፡፡ የቤተ ክርስቲያኑ የውጫዊ ክበብ ዲያሜትር 54. 86 ሜትር ነው፡፡ ከደቡብ ጫፍ እስከ ሰሜን ጫፍ ያለው ርዝመት 74.37 ሜትር ሲሆን የግድግዳው ስፋት 8.28 ሜትር ይሆናል፡፡ የቤተ ክርስቲያኑ ቁመት 56.38 ሜትር ያህል ሲደርስ የዶሙ ውስጣዊ ዲያ ሜትር 35.97 ነው፡፡

የዶሙ ውስጣዊ ጥበብ

በዚህ ቤተ ክርስቲያን ውስጥ ጎብኝዎችን ሁሉ የሚስብ አንድ ታሪክ አለ፡፡ በ1942 ዓም አኤአ፣ አፕሪል 9 ቀን ከሰዓት በኋላ 4፡40(10፡40) ላይ ሕዝቡ የሁለተኛውን የዓለም ጦርነት በተመለከተ ጸሎት ያደርሳል፡፡ ሕፃናት፣ ወጣቶች፣ አዛውንት፣ ተሰብስበዋል፡፡ የጀርመን አውሮፕላኖች በከተማው አንዣበቡና አራት ታላላቅ ቦምቦችን ጣሉ፡፡ ሦስቱ በአካባቢው ሳይፈነዱ ወደቁ፡፡ አራተኛው ግን የቤተ ክርስቲያኑን ጣራ ቀድዶ ይጸልዩ በነበሩት ምእመናን መካከል ወደቀ፡፡ አልፈነዳም፡፡ መሬት ላይ አርፎ ዝም አለ፡፡ ከምእመናኑ መካከል እንኳን በሞት በመቁሰል የተጎዳ አልነበረም፡፡

ያልፈነዳው ቦንብ

እነሆ ይህ ቦንብ ዛሬም በቤተ ክርስቲያኑ ተቀምጦ የድንግል ማርያምን ተአምር ይመሰክራል፡፡