«ጉዞ» ሰላማዊቷ ደሴት

ከማልታ ደሴቶች መካከል በስፋት ሁለተኛዋ ደሴት ናት ጉዞ፡፡ ከዋና ከተማው ከቫሌታ በመኪና የሰላሳ ደቂቃ ከዚያም በመርከብ የሰላሳ ደቂቃ መንገድ ያህል ትርቃለች፡፡ ሕዝቦቿ ሰላማውያን እና ሃይማኖተኞች ናቸው፡፡ አንዲያውም አንዳንድ መጻሕፍት ቅዱስ ጳውሎስ ወደ ሜዲትራንያን ባሕር ተመልሶ ቢመጣ አንዳስተማራቸው የሚያገኛቸው የጉዞን ሰዎች ብቻ ይላሉ፡፡

የማልታ እና የጉዞ ሰዎች ልዩነታቸው ከደሴቶቹ ርቀት በላይ ነው፡፡ የማልታ ሰዎች የግሪክ እና የጣልያን ሰዎች ክፉ በሽታ ተጋብቶባቸው አንድ ነገር ሲሆኑ እግዚአብሔርን እና ድንግል ማርያምን መሳደብ ይወዳሉ፡፡ ነገር ግን 90 በመቶ የማልታ ሕዝብ ክርስቲያን ነው ይባላል፡፡

የማልታ ሽማግሌዎች የሚደግሙት ዳዊት ሳይሆን የሀገር ቤት «ዱርዬ» የሚሳደበውን የእናት እና የአባት ስድብ ነው፡፡ በእያንዳንዱ ንግግራቸው ስድብ ካልጨመሩበት የተናገሩ አይመስላቸውም፡፡ የጉዞ ሰዎች ግን ከአፋቸው ክፉ አይወጣም፡፡

በሁለቱ ደሴቶች መካከል አያሌ አፍሪካውያን ስደተኞችን የበላው፣ ያሰቃየው እና ያጓጓዘው የሜዲትራንያን ባሕር ተንጣለሏል፡፡ ጠቅላላ ስፋቱ 2.5 ሚሊዮን ስኩዌር ኪሎ ሜትር የሆነውና አፍሪካን፣ እስያን እና አውሮፓን የሚያገናኘው ይህ ባሕር በዓለም ላይ የተከናወኑትን ዋና ዋና ጦርነቶች ከሰባት ሺ ዓመታት በላይ ያስተናገደ ባሕር ነው፡፡

 ሜዲትራንያን  የሚለው ቃል ከሁለት የላቲን ቃላት የተገኘ ስም ሲሆን ትርጉሙም በመሬት መሐል ያለ ውኃ ማለት ነው (from medius, "middle" and terra, "earth").

ከተወሰኑ ዓመታት በፊት የማልታ መንግሥት የጉዞን እና የማልታን ደሴቶች በድልድይ ለማገናኘት በጃፓን ባለሞያዎች አስጠንቶ ነበር፡፡ ጥናቱ ድልድዩ ሊገነባ እንደሚችል ቢያሳይም በገንዘብ እጥረት ሳይሳካ ቀረ፡፡ በዚህ ጊዜ የጉዞ ደሴት ነዋሪዎች ጮቤ ረገጡ ይባላል፡፡ ምክንያቱም ደሴቱ በቀላሉ የሚደረስበት ከሆነ የማልታ ሰዎች ክፉ ጠባይ ወደ እኛም ይጋባል ብለው ፈርተው ነበርና፡፡

የደሴቲቱን ገጽታ እና በውስጧ ያለውን ከ3000 ዓመት ቅልክ በፊት የተገነባውን የፊንቄያውያን መቅደስ ከፊልሙ ተመልከቱ፡፡