ስለ አቡነ ተክለ ሃይማኖት ያልሰማነው ታሪክ

ካይሮ  በምሥር ኤል ካዲማ በሚገኘው የቅድስት ባርባራ ቤተ ክርስቲያን የአቡነ ተክለ ሃይማኖት የአጽማቸው ክፋይ ይኖራል እየተባለ በትውፊት ይነገር ነበር፡፡ ነገር ግን ስለ እርሱ የሚናገር ማስረጃ ማግኘት አልተቻለም፡፡

በቅድስት ባርባራ ቤተ ክርስቲያን የሚገኘው የዐፅም ክፋይ

 ይህ በዚህ እንዳለም በአስክንድርያ በሚገኘው የአቡነ ተክለ ሃይማኖት ቤተ ክርስቲያን የሚገኙ ምእመናን የጻድቁን የአጽም ክፋይ ማግኘትና በመንበሩ ላይ ማስቀመጥ ይመኙ ነበር፡፡ በግብጽ ቤተ ክርስቲያን ትውፊት መሠረት የቅዱሳንን ዐጽም በመንበራቸው ማድረግ እና ማክበር የኖረ ልማድ ነውና፡፡

 በወቅቱ አቡነ ሺኖዳ የትምህርት ጉዳዮች ሊቀ ጳጳስ ነበሩ፡፡ የእስክንድርያ ምእመናንም የአባታችንን አጽም ለማግኘት እንዲረዷቸው ለመኗቸው፡፡ እርሳቸውም «ይህ በእኔ ሥልጣን ሥር አይደለም» በለው መለሱላቸው፡፡ ምእመናኑም በወቅቱ የፓትርያርክ ምርጫ ሊደረግ አቡነ ሺኖዳ ከእጩዎች ወገን አንዱ ሆነው ነበርና «እስኪ እግዚአብሔር ይፍቀድ» ብለው ዝም አሉ፡፡

አቡነ ሺኖዳ ፓትርያርክ ከሆኑ በኋላ በካይሮ ቅድስት ባርባራ ቤተ ክርስቲያን የሚገኘውን የጻድቁን የአጽም ክፋይ ወደ እስክንድርያ እንዲያመጡላቸው ምእመናኑ እንደገና ጠየቋቸው፡፡ እርሳቸውም «ይህ ጉዳይ በቃል የሚነገር እንጂ ማስረጃ የለውምና ያስቸግራል፡፡ አሏቸው፡፡

ዮሴፍ ሐቢብ የተባሉ ምእመን በዚህ ጉዳይ ላይ ማስረጃ ማፈላለግ ጀመረ፡፡ በቅድስት ባርባራ ቤተ ክርስቲያን በሚገኙ መዛግበት ላይ ለስድስት ወራት ባደረገው ጥናትም የዐጽሙ ክፋይ እንዴት ወደዚያ እንደመጣ የሚያሳይ መረጃ አገኘ፡፡

በጥንት ጊዜ ኢትዮጵያውያን መነኮሳት ወደ ኢየሩሳሌም ሲመላለሱ ከሚያርፉባቸው ቦታዎች አንዱ በግብጽ በኤል ናትሩን የሚገኘው ገዳም ነበር፡፡ ኢትዮጵያውያን መነኮሳት በዚህ ቦታ ገዳም ነበራቸው፡፡ ከደብረ ሊባኖስ የመጡ መነኮሳት የአቡነ ተክለ ሃይማኖትን ዐፅም ክፋይ ይዘው መጥተው በዚህ ቦታ ይጸልዩበት ነበር፡፡

በአንድ ወቅት ገዳሙ በወራሪዎች ሲጠፋ ንዋያተ ቅድሳቱ፣ የቅዱሳኑ ዐጽም እና መጻሕፍቱ በወቅቱ የፓትርያርኩ መንበር ወደ ነበረው ወደ ቅድስት ባርባራ ቤተ ክርስቲያን ተወስደው ተቀመጡ፡፡

ዮሴፍ ሐቢብ ይህንን ግኝቱን ለአቡነ ሺኖዳ አቀረበላቸው፡፡ እርሳቸውም ከሌሎች ማስረጃዎች ጋር ካመሳከሩት በኋላ እውነተኛነቱን አረጋገጡ፡፡

በቅድስት ባርባራ ቤተ ክርስቲያን የሚገኘው የዐፅም ክፋይ በአቡነ ጳኩሚስ አማካኝነት እኤአ በ1972 ዓም ታኅሳስ ሃያ ስድስት ቀን የተወሰነው ክፍል ተከፍለ፡፡ ወደ እስክንድርያው የአቡነ ተክለ ሃይማኖት ቤተ ክርስቲያንም መጣ፡፡

ይህንን ታሪክ እስካሁን ከኢትዮጵያውያን ምንጮች ማረጋገጥ አልቻልኩም፡፡