Sunday, October 31, 2010

እንማር ወይስ እንማረር

ከሰሞኑ የኢትዮጵያ ቤተ ክርስቲያን ቅዱስ ሲኖዶስ ጉባኤን በመላው ዓለም የሚገኙ ኦርቶዶክሳውያን እና የበጎ ነገር ወዳጆች ሁሉ ሲከታተሉት ነበረ፡፡ ጉባኤው በሦስት ነገሮች የተሻለ ገጽታ ነበበረው፡፡

1/ የብጹአን አባቶች አንድነት በተሻለ ጎልቶ የወጣበት በመሆኑ

2/  የቤተ ክርስቲያንን ችግሮች ሊፈቱ የሚችሉ ውሳኔዎች የተላለፉበት በመሆኑ

3/  የሃሳብ ክርክር እንጂ የጡንቻ ክርክር ያልታየበት በመሆኑ ናቸው፡፡

ጉባኤው ይህንን የመሰለ መልክ እንዲኖረው ያደረጉ ምክንያችም ነበሩ፡፡ የመጀመርያው እግዚአብሔር ከቤተ ክርስቲያን ጋር መሆኑ ነው፡፡ ቤተ ክርስቲያን እግዚአብሔር የተለያት ብትሆን ኖሮ መንፈሳችን በተስፋ መቁረጥ እንደተሞላ ይቀር ነበር፡፡ አንድ ስሙ ያልተገለጠ የኢየሩሳሌም ተሳላሚ ተናገረው ብሎ ጄምስ ብስ እንደገለጠው «ብንወድቅም እዚአብሔር ግን ከወደቅነው ከኛ ጋር ነበር»፡፡ በሌላም በኩል ደግሞ እኛ የማናውቃቸው፣ እግዚአብሔር ግን የሚያውቃቸው ቅዱሳን የጸለዩት ጸሎት መልስም ነው፡፡ ከዚህ በተጨማሪም በተለያየ መልኩ በጉዳዩ ላይ ከፍተኛ ተሳትፎ ያበረከቱ ምእመናን፣ ባለሞያዎች፣ ሽማግሌዎች ወዘተ ውጤትም ነው፡፡ እንደ ገናም አያሌ ሚዲያዎች ከወትሮው በተለየ መልኩ ችግሩን ሊፈታ በሚችል መልኩ መንቀሳቀሳቸው ያመጣው የቤተ ክርስቲያን ድል ነው፡፡

Saturday, October 30, 2010

ማስታወቂያ

ከሚቀጥለው ቅዳሜ ጀምሮ «ለቤተ መጻሕፍትዎ» የሚል አዲስ ፕሮግራም ይጀመራል፡፡ የዚህ ፕሮግራም ዓላማው አንባብያን ቢያነቧቸው መልካም ነው የሚባሉ መጻሕፍትን የምንጠቁምበት ነው፡፡ ብዙ አንባብያን የማንበብ ፍላጎት ቢኖራቸውም ምን ማንበብ እንዳለባቸው ከአጭር መግለጫ ጋር ጥቆማ ይፈልጋሉ፡፡ ምን ዓይነት አዲስ መጽሐፍ እንደታተመ መረጃም ይሻሉ፡፡ ይህ ፕሮግራም በዚህ ረገድ አስተዋጽዖ ለማድረግ ይሞክራል፡፡

የሳምንቱ ጥቅስ


ወፎች ከጭንቅላታችን በላይ እንዳይበሩ መከልከል አንችልም፤ በጭንቅላታችን ላይ ጎጆ እንዳይሠሩ መከልከል ግን እንችላለን፡፡

Thursday, October 28, 2010

ሰበር ዜና ቅዱስ ሲኖዶስ ለሕዝቡ ጥያቄ ምላሽ ሰጠ

ቅዱስ ሲኖዶስ በዛሬው ዕለት ለምእመናን ጥያቄ ምላሽ ሰጥቷል፡፡ በዚህም መሠረት የአዋሳ ሀገረ ስብከት ሊቀ ጳጳስ የነበሩት አቡነ ፋኑኤልን ወደ ሰዋስወ ብርሃን ቅዱስ ጳውሎስ ኮሌጅ ሲያዛውር በአውሮፓ እና በአሜሪካ በአገልግሎት ላይ ያሉት ብጹአን አባቶች በአገልግሎታቸው እንዲቀጥሉ ወስኗል፡፡ ለአዋሳም ብጹእ አቡነ ገብርኤልን መድቧል፡፡

የአዋሳ ምእመናን በየጊዜው ወደ መንበረ ፓትርያርክ በመምጣት በትእግሥት እና በሃይማኖት ያቀረቡት ጥያቄ ምላሽ ማግኘቱ ለሌሎችም ምእመናን አርአያ የሚሆንና ቅዱስ ሲኖዶስን የሚያስመሰግን፣ ከሕዝብም ጋር የሚያቀራርብ ነው፡፡ ቅዱስ  ሲኖዶስ በአባቶች መካከል መከፋፈልን ለመፍጠር ባለመ ሁኔታ ተቀናብሮ የነበረውን የጳጳሳት ምደባ በመተው ራሱን በራሱ መመደቡ ተነጥቆ የነበረውን ሥልጣኑን እያስመለሰ መሆኑን ያሳያል፡፡

ብጹእ አቡነ ሳሙኤል የተመደበው አጣሪ ኮሚቴ ከተወነጀሉበት ወንጀል ነጻ መሆናቸውን መመስከሩን ተከትሎ ወደ ቀድሞ ሀገረ ስብከታቸው ለመመለስ ጥያቄ አቅርበው ነበር፡፡ ሲኖዶሱ የጥያቄያቸውን ተገቢነት ተቀብሎታል፡፡ ነገር ግን ለቤተ ክርስቲያኒቱ አንድነት እና ደኅንነት ሲባል በልማት ኮሚሽን ሊቀ ጳጳስነት እንዲቀጥሉ ብጹአን አባቶች ጥያቄ አቅርበውላቸዋል፡፡ ብጹእ አባታችን ከራሳቸው ይልቅ ለቤተ ክርስቲያን ያሳዩት ወገንተኛነት የሚያስመሰግናቸው እና ታላቅነታቸውን የሚያሳይ መሆኑን የሲኖዶስ አባላት ገልጸዋል፡፡

ጀግና የናፈቀው ሕዝብ

ሰሞኑን የኢትዮጵያ ቤተ ክርስቲያን ቅዱስ ሲኖዶስ ሦስት ታሪካዊ ሊባሉ የሚችሉ ውሳኔዎችን አሳልፏል፡፡ ያለ አግባብ የቆመው የአቡነ ጳውሎስ ሐውልት እንዲፈርስ፣ በየቤተ ክርስቲያኑ የተሰቀለው ፖስተር እንዲነሣ እና በቤተ ክህነቱ ሥልጣን ሳይኖራቸው ባለ ሥልጣን የሆኑ መበለቶች እንዲገለሉ፡፡

ውሳኔው እንደ ተሰማ የሕዝቡ ደስታ ወሰን አልነበረውም፡፡ ስለ ጉዳዩ የዘገቡ ዌብ ሳይቶችን፣ ብሎጎችን፣ ፌስ ቡኮችን እና ሌሎችንም አጨናንቋቸው ነበር የዋለው፡፡ ለምን?

Tuesday, October 26, 2010

ሰበር ዜና ቅዱስ ሲኖዶስ ታሪክ ሠራ

ቅዱስ ሲኖዶስ ቦሌ መድኃኔ ዓለም የቆመው የፓትርያርኩ ሐውልት እንዲፈርስ፣ በየቤተ ክርስቲያኑ የተሰቀለው የፓትርያርኩ ፎቶም እንዲወርድ ዛሬ ጠዋት ወሰነ፡፡

አባቶቻችን እድሜ ይስጣችሁ፡፡ አባት ከሆኑ ላይቀር እንዲህ ነው፡፡ አሁን ሲኖዶስ አለን እንበል፡፡ ደግሞ የአፈጻጸሙን ነገር አደራ፡፡

እርሻውን ማን ያርመው ?

ከሀገራችን ገበሬ ከምንማራቸው ትምህርቶች አንዱ እርማት ነው፡፡ ገበሬው እንደ አካሉ የሚወደውን መሬት ገምሶ ከስክሶ፣ አርሶ አለስልሶ ይዘራዋል፡፡ ዘሩ ብቅ ሲል ከየት መጣ ያልተባለ አረምም አብሮ ብቅ ይላል፡፡ ታድያ ጀግናው ገበሬ፣ አርበኛው ገበሬ፣ ቆፍጣናው ገበሬ፣ አርሶ በሌው ገበሬ፣ ትእግሥተኛው ገበሬ አረሙን እንዳየ ለስሙ አይደለም የሚጨነቀው፡፡

የጀግናውን እርሻ እንዴት አረም ገባበት፣ የአርበኛውን ማሳ እንዴት አረም ደፈረው፣ የቆፍጣናውን መሬት እንዴት አረም ሄደበት እባላለሁ ብሎ አይጨነቅም፡፡ ሲዘራ ምርጡን ዘር እንደ ዘራ ያውቃል፤ አበጥሮ አንጠርጥሮ እንደዘራ ያውቃል፡፡ እርሱ አረሙን እንዳልዘራው ያውቃል፡፡ አረም ግን ይበቅላል፡፡

Thursday, October 21, 2010

ተማኅፅኖ /Asylum/ በኢትዮጵያ ቤተ ክርስቲያን

የኢትዮጵያ ኦርቶዶክሰ ተዋሕዶ ቤተ ክርስቲያን መሠረታዊ ዓላማዋ ከሆነው ስብከተ ወንጌልን የማስፋፋት ተልዕኰዋ በተጨማሪ ለሕዝቡ ማኅበራዊ፣ ፖለቲካዊ፣ ባሕላዊና ኤኮኖሚያዊ ዕድገት ከፍተኛ ሚና ተጫውታለች፡፡ የተጠናከሩ ማኅበራዊ ተቋማት ባልነበሩበት ጊዜ የኅብረተሰቡን ማኅበራዊ ዋስትና ሊያስጠብቁ የሚችሉ ተግባራትን ፈጽማለች፡፡ ከነዚህ ተግባራት መካከል ዕድር፣ ዕቁብ፣ ሰንበቴ፣ የማስታረቅ አገልግሎት፣ የጋብቻ አገልግሎት፣ የትምህርት አገልግሎት ወዘተ. ይጠቀሳሉ፡፡

ከማኅበራዊ አገልግሎቶቿ መካከል አንዱ ፍትሕ እንዳይዛባ፣ በስሜታዊነት ሕግ እንዳይጣስ፣ ደካሞች በኃይለኞች እንዳይጠቁ ለማድረግ ትሰጠው የነበረው የመማፀኛነት /Asylum/ አገልግሎት ነው፡፡

ተማኅፅኖ /Asylum/

Tuesday, October 19, 2010

ማኅሌት እና መክፈልት

አንድ የቆሎ ተማሪ ነበረ አሉ፡፡ ትምህርት አይወድም፡፡ ትምህርት ያደክማል የሚል ፍልስፍና ነበረው፡፡ «ትምህርት ይቀትል፣ ወምላስ የሐዩ» የሚለው አባባሉ ተይዞለታል፡፡ እግረ ተማሪ የሚሉት ዓይነት ነው፡፡ በየትምህርት ቤቱ ይዞራል እንጂ ቀለም አይዝም፡፡ እርሱ እቴ የሚፈልገው «ከየኔታ እገሌም ይህን ተምሬያለሁ፣ ከየኔታ እገሌም ይህን ቀጽያለሁ» እያለ ማውራት ነው፡፡

ታድያ የመንደሩን ወይዛዝርት እና መኳንንት ለመቅረብ እና ጠባያቸውን ለማወቅ ማንም አይቀድመውም፡፡ እያንዳንዱ ቤት ድግስ የሚደግስበትን ዝክር የሚያዘክርበትን ቀን ከባለቤቶቹ በላይ እርሱ ያውቀዋል፡፡ ክብረ በዓል ሲሆን አምሞ ጠምጥሞ ዋዜማ ይቆማል፡፡ ነገር ግን አንዲት ቀለም ከአፉ አትወጣውም፡፡ ብቻ ወይዛዝርቱ እንዲያዩት ከፊት ከኋላ እያዠረገደ ያሟሙቃል፡፡ አይመራ፣ አይመራ፣ አያዜም፣ አይቀኝ፣ መቋሚያውን ይዞ አንገቱን እንደ በግ እንደደፋ ያመሻል፣ያድራል፡፡

Friday, October 15, 2010

የሳምንቱ ጥቅስ 3



መሬቱ የሚቀበለውን   ገበሬው የሚፈልገውን ዘራ

Thursday, October 14, 2010

ከቺሊ ስማይ ሥር

ይህንን ጽሑፍ ስጽፍ የመጨረሻው የማዕድን አውጭ ከጉድጓዱ ውስጥ ወጥቶ ነበር፡፡ ከሌሊቱ ዘጠኝ ሰዓት ሆኗል፡፡ ለ69 ቀናት የጠበቅናቸው እነዚህ ሰዎች ተአምራዊ በሆነ መንገድ ከ622 ሜትር ጉድጓድ ውስጥ ወጡ፡፡ የቺሊ ፕሬዚዳንት ሴባስቲያን ፔኔራ «እግዚአብሔር ከምንወጣው በላይ የሆነ ፈተና አይሰጠንም» እንዳሉት እውነትም የሚወጡት ፈተና ሰጥቷቸዋል፡፡ የሀገሬ ሰውስ «ማከኪያውን ላይሰጥ እከኩን አይሰጥም» ይል የለ፡፡

Monday, October 11, 2010

አንድነት ይቅርብን

ብዙ ጊዜ ለኢትዮጵያውያን ችግራችን አንድ ያለመሆን ነው፤ ልዩነቶቻችንን ትተን አንድ እንሁን፤ አንድነት ኃይል ነው ወዘተ እያልን ጩኸናል፤ አስተምረናል፤ ጽፈናል፤ አንብበናል፤ አዚመናል፤ ሰብከናል፡፡ አሁን አሁን ግን ሳስበው እንዲያውም ችግራችን አንድ ከመሆን የመጣ ነው የሚመስለኝ፡፡ እንዲያውም ሀገራችንን አሁን ለደረሰችበት ውድቀት የዳረጋት አንድ መሆናችን ነው፡፡ ደግሞ መች ተለያይተን እናውቃለን? መች ልዩነት አለ በመካከላችን? ሁላችንም እንደ አህያ ጆሮ እንደ ጦር ጉሮሮ አንድ አይደለን እንዴ፡፡

ለመሆኑ እኛ ኢትዮጵያውያን የተለያየነው በምን በምንድን ነው? በዘር? በሃይማኖት? በፖለቲካ? በአመለካከት? በምንም፡፡

Friday, October 8, 2010

የሳምንቱ ጥቅስ 2


«ጊዜ፣ እድሜ፣ ቦታ፣ ፈቃድ፣ ችሎታ እና ስምምነት እነዚህ ስድስቱ ከተረዳዱ ሥራ ሁሉ ይፈጸማል»


(አንጋረ ፈላስፋ÷ ምዕ. 28)

Wednesday, October 6, 2010

የአንድ ዕብድ ትንቢት

አንድ ዕብድ አራት ኪሎ ላይ ጆሊ ባር ፊት ለፊት ቆሞ «ወደፊት የኢትዮጵያ ሕዝብ በስድስት ይከፈላል፣ በስድስት ይከፈላል» እያለ ቡትቶውን እየጎተተ ይጮኻል፡፡ አጠገቡ የነበሩ ጋዜጣ ሻጮች «ዝም በል፣ ዕብድ፣ ተነሣብህ ደግሞ፤ማን ይከፍለዋል ደግሞ፤ መዓት አውሪ» አሉና ሊያባርሩት እጃቸውን ወነጨፉ፡፡ እርሱም በተራው ከት ብሎ ሳቀና «የዕውቀት ማነስ ችግር አለባችሁ፡፡ ኩላሊታችሁ ችግር አለበት፡፡ የኛ ሰው መከፋፈል ልማዱኮ ነው፡፡ በዝባዥ እና ተበዝባዥ፤ አድኃሪ እና ተራማጅ፤ ፊውዳል እና ፀረ ፊውዳል፤ ኢምፔሪያሊስት እና ፀረ ኢምፔሪያሊስት፤ አብዮተኛ እና ፀረ አብዮተኛ፤ ሕዝባዊ እና ፀረ ሕዝብ፤ ልማታዊ እና ፀረ ልማት፤ ኮሚቴ ሰብሳቢ እና ኪራይ ሰብሳቢ» መልሶ ከት ብሎ ሳቀ፡፡

ቀጠለ «ወደፊት የኢትዮጵያ ሕዝብ በስድስት ይከፈላል» አለና የቀኝ እጁን መዳፍ ጠቅልሎ እንደ ጡሩንባ ነፋው፡፡

Sunday, October 3, 2010

ምን ዓይነት ሲኖዶስ ያስፈልገናል?

ቅዱስ ሲኖዶስ የቤተ ክርስቲያን የመጨረሻው ላዕላይ አካል፣ የትምህርተ ሃይማኖቷ፣ የሥርዓቷ እና የትውፊቷ ጠባቂ፣ ቤተ ክርስቲያኒቱን የመወከል የመጨረሻው ሥልጣን ያለው፣ መናፍቃንን እና ከሀድያንን ለማውገዝ፣ የተመለሱትንም ይቅርታ ለማድረግ ሥልጣን ያለው የቤተ ክርስቲያን አካል ነው፡፡

ከላይ ከተገለጡት ሃይማኖታዊ ተግባራት በተጨማሪ የፋይናንስ፣ የሠራተኛ አስተዳደር፣ የንብረት፣ የይዞታ፣ የማኅበራዊ ጉዳዮች፣ የቅርስ እና የቤተ ክርስቲያኒቱን ግንኙነት በተመለከተ ፖሊሲ እና መመርያ የሚያወጣ፣ አቅጣጫ የሚወስን እና የመጨረሻውን ውሳኔ የሚሰጥ አካልም ነው፡፡ ቅዱስ ሲኖዶስ ሃይማኖታዊ፣ ሀገራዊ፣ ማኅበራዊ፣ ዓለም ዐቀፋዊ እና ሰብአዊ ኃላፊነቶች ያሉበት የቤተ ክርስቲያን ሉዓላዊ አካል ነው፡፡

እነዚህን ከባድ ኃላፊነቶቹን መወጣት ይችል ዘንድ ሃይማኖታዊ፣ ኁባሬያዊ እና አስተዳደራዊ ጥንካሬዎች ሊኖሩት ይገባል፡፡

ሃይማኖታዊ

Saturday, October 2, 2010

የሳምንቱ ጥቅስ



ከደረሰብን ነገር ይልቅ የደረሰልን እግዚአብሔር ታላቅ ነው