Tuesday, August 31, 2010

ችግር ነን መፍትሔ ?

ሁለት መኪኖችን ብቻ አጨናንቃ የምታሳልፍ መንገድ ነበረች፡፡ ሁለቱ መኪኖች ሲተላለፉ ጎንና ጎናቸው ሊነካካ ለጥቂት ብቻ ነው የሚያመልጡት፡፡ ነገር ግን ሾፌሮቹ ሁሉ ለምደውታልና በቀላሉ ፈገግ እያሉ ይተላለፋሉ፡፡

አንድ ቀን አንድ ለምድር ለሰማይ የከበደ ወፍራም የትራፊክ ፖሊስ መሐል መንገድ ላይ ቆሞ በግራ እና በቀኝ የሚተላለፉትን ተሽከርካሪዎች «እለፉ እለፉ» ይላል፡፡ መኪኖቹ መተላለፍ ስላልቻሉ ከሚሄደው የሚቆመው በዛ፡፡ በተለይማ ትልልቆቹ የጭነት መኪኖች መተላለፍ አልቻሉም፡፡ የትራፊክ ፖሊሱ ግራ ገባው፡፡ ከዚያ በፊት ምንም እንኳን መንገዱ ጠባብ ቢሆንም እንደዚያ ቀን ያለ መጨናነቅ ግን ታይቶ አይታወቅም፡፡ መኪኖቹ ቀስ ይሉ ይሆናል እንጂ አይቆሙም፡፡

Friday, August 27, 2010

ባርባራ እና ስቴፈን


አንዳንድ ጊዜ በሕይወታችን የዕለት ተዕለት ተግባራት የሚያጋጥሙንን ነገሮች ካስተዋልናቸው በትምህርት ቤት የማናገኛቸውን ዕውቀቶች እንገበይባቸዋለን፡፡ መደበኛውን ሥራችንን እንኳን ቢሆን በማዳመጥ እና በፍቅር ከሠራነው ለዕድሜ ልክ የሚሆኑ ዕውቀቶችን እግረ መንገዳችንን እናገኛለን፡፡ አንዲት አሜሪካዊት ነርስን ያጋጠማት ነገርም እንደዋዛ ነበር ሕይወቷን የቀየረው፡፡

አንድ ቀን አንድ ሽማግሌ ታካሚ ሰው ከነርሷ ፊት ለፊት ተቀምጠው አሁንም አሁንም ይቁነጠነጡ ነበር፡፡ አሁንም አሁንም ደጋግመው ሰዓታቸውን ያያሉ፡፡ ነርሷ ገረማትና ረጋ ብለው ሕክምናቸውን እንዲከታተሉ ነገረቻቸው፡፡ ሃሳቧን ተቀብለው ለጥቂት ሰኮንዶች ረጋ ቢሉም አሁንም የቀደመ ነገራቸው ተመለሰ፡፡

«ለምንድን ነው ይህንን ያህል ያልተረጋጉት? ያጋጠመዎ ችግር አለ?» አለቻቸው፡፡

Wednesday, August 25, 2010

የኛን ችግር እኛ እንፍታው

ዲያቆን መሐሪ ገብረማርቆስ

እንደሚመስለኝ እኚህ ኃይለ ገብርኤል የሚባሉ ሰው ችግራችን የገባቸው አይመስለኝም፡፡ የችግራችን አንዱ ምንጭ እኮ ኃላፊነትን ከመቀበል ይልቅ “እንትና ይሥራው፡፡ ወይም እነ እንቶኔ ይከውኑት፡፡ እኔ የልጆች አሳዳጊ፣ የሽማግሎች ጧሪ፣ የእድር ዳኛ፣ የዕቁብ ጸሐፊ ወዘተ. ነኝ፡፡” እያልን መሸሻችን ነው፡፡ የቤተ ክርስቲያናችን ችግር እንዲህ ሰማይ እንዲሰቀል ያደረጉት እነማን ናቸውና? ነገሥታቱና የእነርሱ ፈቃድ ፈጻሚዎች ካህናተ ደብተራ አይደሉምን፡፡ የቤተ ክርስቲያኗ ታሪክ ላደመጠው ዛሬም ይናገራል፡፡ ያድምጡት፡፡

Monday, August 23, 2010

«መንግሥት በሃይማኖት ጣልቃ አይገባም» ምን ማለት ነው?

ኃይለ ገብርኤል - ከአራት ኪሎ

የተከበራችሁ የቅድስት ቤተ ክርስቲያን ልጆችና የዲ/ን ዳንኤል የጡመራ-መድረክ እድምተኞች ሰላመ እግዚአብሔር ከእናንተ ጋር ይሁን። አሜን።

ባለፉት ሳምንታት ወንድማችን ዲ/ን ዳንኤል በቤተ ክህነቱ ውስጥ ያሉትን፣የብዙዎቻችንን አንገት ያስደፉትንና አብዛኛው ምእመን በሆዱ ይዞ ዘወትር የሚያርበትንና የሚያለቅስበትን የቤታችንን ጉድ ዝምታ መፍትሔ አይደለም በማለት ብቻውን ነጥሮ ወጥቶ ከብዙ በጥቂቱ ለእኛ በሚገባን መልኩ ነግሮናል። ችግሮቹን ከመዘርዘር ባሻገርም መፈትሔ ሊያመጡ ይችላሉ ብሎ ያመነባቸውን ነጥቦችንም በግልፅ አመላክቷል።

እየበሉ እየጠጡ ዝም…… የሚለው የአበው ምሳሌ አንድም በኔ እንዳይተረት አንድም እንደ ቤተ ክርስቲያን ልጅነቴ የድርሻዬን መወጣት ስላለብኝ  እነሆ በውስጤ ያለውን እናገር ዘንድ ጀመርኩ።

Saturday, August 21, 2010

የሆስፒታል ቫይረስ


በሕክምና እና በሕክምና ባለሞያዎች ዘንድ ካሉት ሥጋቶች መካከል አንደኛው በሆስፒታል ውስጥ ሆስፒታሉን ለምደው እና ወድደው፤ የሚኖሩት ቫይረሶች ጉዳይ ነው፡፡ እነዚህ ቫይረሶች በተለያዩ ሕመምተኞች አማካኝነት ወደ ሆስፒታሉ ይመጡና እዚያ ያለውን ነባራዊ ሁኔታ በመላመድ፣ የሚረጩትን መድኃኒቶች፣ ኬሚካሎች እና የማጽጃ ነገሮች ሁሉ ቀስ በቀስ በመቋቋም ኑሯቸውን በሕክምና ተቋሙ ውስጥ ያደርጋሉ፡፡ በዚህም የተነሣ የሕክምና ባለሞያዎችን እንዲሁም ታካሚዎችን ያጠቃሉ፡፡

እንደዚህ ዓይነቶቹ ቫይረሶች መከላከያዎችንም ሆነ መድኃኒቶቹን ስለተለማማዷቸው እነርሱን በማከም ማሸነፍም ሆነ ማድከም አስቸጋሪ ነው፡፡ ሕክምናው ባለበት በዚያው በሆስፒታሉ ውስጥ ስለሚኖሩም ራሳቸውን እያባዙ እና እንደነርሱው ሕክምናውን የሚቋቋሙ መሰሎቻቸውን እያበራከቱ በመሄድ፣ የሕክምና ማዕከል ተብሎ የተቋቋመውን አካል የማይድኑ በሽታዎች ማምረቻ ሊያደርጉት ይችላሉ፡፡

Friday, August 20, 2010

ኳሱን አትንኩብን

በቤተ ክርስቲያን ጉዳይ ላይ የጀመርነውን ውይይት ለማሰቢያ ጊዜ እናገኝ ዘንድ ለጊዜው ዐረፍ እንበልና ማክሰኞ ደግሞ የሌሎቻችሁን አስተያየት በመጨመር እንመለሳለን፡፡ ለዛሬው ለማረፊያ እነሆ፡፡
 «ወጣቱ በአውሮፓ እግር ኳስ ነፍሱ ሊወጣ ነው፡፡ የሀገሩን እግር ኳስ እና የሀገሩን ጉዳዮች ከመከታተል ይልቅ በእን ግሊዝ፣ በጣልያን እና በስፔይን የእግር ኳስ ተጨዋቾች ልቡ ተነድፏል፡፡ ሚዲያዎችም ቢሆኑ እንዴው ለአመል ያህል የሀገራችንን ኳስ ነካ ነካ ያደርጉና እጥፍጥፍ ብለው ወደ አውሮፓ ይሻገራሉ» እያላችሁ ታሙናላችሁ አሉ፡፡


ወገኞች ናችሁ እንዴው፡፡ የጨዋታውን ዓይነት፣ የግቡን ልዩነት፣ የታክቲክ እና የቴክኒኩን ነገር ተውት ይቅር ግዴለም፡፡ የተጨዋቾቹን ዝና እና ታዋቂነት፣ የሚያሳዩትን ምትሐት ተውት አይነሣ ግዴለም፡፡ አሁን እኛ ሀገር በእግር የሚመታ ኳስ እንጂ እግር ኳስ አለ ይባላል? እንኳን የአፍሪካ እግር ኳስ ፌዴሬሽንን ከመሠረቱት ሦስት ሀገሮች አንዱ ልንመስል እግር ኳስ ከአውሮፕላን ተወርውሮ የነጠረባት ሀገር እንመስላለን? ለመሆኑ እኛ ሀገር ስለ ተጨዋቹ እና ስለ ጨዋታው ከሚነገረው በላይ ስለ ቡድኖቹ ሽኩቻ እና ስለ ፌዴሬሽኑ ውዝግብ የሚነገረው አይበልጥም?

Thursday, August 19, 2010

ከንፈራችንን መጠን ብቻ እንዳንተወው

ከአቤል ቀዳማዊ

የቤተ ክህነቱ ችግር እስከነ መፍትሄው መስታወት ሆነህ አሳይተኽናል። አልታደልንምና ብዙውን ግዜ ቤተ ክርስቲያናችን ያለችበት ነባራዊ ሁኔታ ሲነገር ሚስጥራችን በአደባባይ ወጣ የሚል ተቃውሞ ከብዙዎች ይሰማል። ተቃዋሚዎቹ የራሳቸው የሆነ ምክንያት ሊኖራቸው ይችላል፤ አንድም ጥቅመኞች ጥቅማቸው እንዳይነካ በሌላም እውነተኛ ተቆርቋሪዎች በግንዛቤ እጥረት።

Wednesday, August 18, 2010

እናንተም አትራቁን ቅረቡን

አባተ ከአዲስ አበባ

ለዲያቆን ዳንኤል ክብረት

አንዳንድ የብሎጉ አንባብያን በሰጡት ሃሳብ መሠረት ጽሑፎቹን ፕሪንት አድርጌ ለአምስት ብጹአን አባቶች አንብቤላቸው ነበር፡፡ በጣም ነው የተደሰቱት፡፡ በተለይ አንደኛው አባት «ልጆቻችን እንዲህ ማሰብ ከጀመሩ የመፍትሔው ቀን ቀርቧል ማለት ነው» አሉ፡፡

እኔ እንዳየሁት ሁሉም ልብ ውስጥ ቁጭት ይታያል፡፡ ቤተ ክርስቲያን ችግር ላይ መሆንዋን አምስቱም ሲናገሩ ነበር፡፡ አንደኛው አባትም «እስኪ መንገዱን አሳዩን፣ ምናልባትኮ ለኛ ያልታየን ለልጆች ይታያቸው ይሆናል፡፡ ከሌሎች አባቶች ጋር ሆነን እናነሣዋለን» ብለዋል፡፡

ይበልጥ ያነሡት ነገር ደግሞ ታትሞ ለቤተ ክህነት ሰዎች እና ለሌሎች አባቶች ለመን ግሥትም አካላት ቢደርስ ብለዋል፡፡ በየሄድንበት የምእመናኑ ዓይን ይጋረዳፍ፤ ጥያቄ ይጠይቁናል፤ መልሱን ግን አብረን ነው መፈለግ ያለብን፡፡ ብለዋል፡፡

Tuesday, August 17, 2010

መጀመሪያ መሰማማት ብንጀምር


ዲያቆን መሐሪ ገብረ ማርቆስ
የእነዚህ ሁሉ መፍትሔ ሐሳቦች መነሻ መሆን ያለበት መጀመሪያ መሰማማት ስንጀምር ይመስለኛል፡፡ የተማረው የቤተክርስቲያን ትውልድ ማድረግ መጀመር ያለበት ነገር መጀመሪያ ማድመጥ ነው- መጽሐፍ ለማድመጥ የፈጠናችሁ ለመናገር የዘገያችሁ ሁኑ እንዲል፡፡

የትኛውንም ችግር ለመፍታት መጀመሪያ ችግሩ ምን እንደሆነ በአግባቡ መረዳት አለብን፡፡ ከዚያ ያን ችግር ለመፍታት “ምን ምን ጥሬ ሀብቶች አሉን?” ብለን መጠየቅ ይገባናል፡፡ ከዚህ በኋላ ነው ከብዙ አማራጭ መፍትሔዎች መካከል በጥቂት ቤዛ የተሻለ ስኬት የምናገኝበትን መምረጥ የምንችለው፡፡ ይህንን ለማድረግ መጀመሪያ የዚህ ትውልድ አባላት መደማመጥ ያለብን ይመስለኛል፡፡

ምን እናድምጥ?

እንደእኔ እንደእኔ...

ሲሎንዲስ ዘአውሮፓ

 የዲ. ዳንኤል የመፍትሔ ሃሳቦች መንፈሳዊ ምክርንና ተግባራዊ አካሄዶችን ያካተቱ ነበሩ፤ለዚያም ነው አንዳንዶቹ ጥቅል የሚሆኑት።ዲ. ዮሐንስ ያነሳሀቸው ነጥቦችና አካሄዶች ለዘላቂ መፍትሔ የሚበጁ ተግባራዊ አካሄዶች ናቸው።አሁንም ግን ከእነዚህ በፊት ሊደረጉ የሚገባቸውና ወደ ተጠቀሱት መንገዶች የሚያመጡ ጅምሮች ያስፈልጉናል፤አለበለዚያ አሁንም የምንቆመው ጥቅል (abstract) የሆኑ ዕቅዶች ላይ ነው



ለምሳሌ 'እንዲህ ብናደርግ' ተብለው ለተጠቀሱት አሳማኝ መፍትሔዎች ኃላፊነቱን ወስዶ የሚሰራው አካል አሁንም ግልጽ አይደለም

ሕዝቤ ዕውቀት በማጣት ጠፋ (ሆሴዕ 4፣6)

ሰሎሞን ይኼይስ - ሚነሶታ

እንደ እኔ እምነት የቤተ ክርስቲያንን ችግሮች ከውጭ ሆኖ መፍታት አይቻልም፡፡ ውኃን ከውኃ ውጭ መዋኘት እንደማይቻለው ሁሉ፡፡ በውስጡ ያሉ አገልጋዮች ችግሩን ተረድተው የመፍትሔው አካል መሆን አለባቸው፡፡ እኛ ከውጭ ያለነው ድጋፍ ሰጭ ነው ልንሆን የምንችለው፡፡

በቤተ ክርስቲያናችን ውስጥ የሚገኙ ጳጳሳት፣ መነኮሳት፣ ካህናት፣ ሰባክያን፣ ዘማርያን እና የሰበካ ጉባኤ አመራሮች ሁሉ በቤተ ክርስቲያናችን ያሉ ችግሮች እንዲቀጥሉ የሚፈልጉ አይደሉም፡፡ የችግሩ ተዋንያን ጥቂቶች ተጠቂዎች ግን ብዙዎች ናቸው፡፡ በመሆኑም የመጀመርያው ነገር ዕውቀቱን እና ንቃቱን መፍጠር መሆን አለበት፡፡

Monday, August 16, 2010

«ጨለማን ዘወትር ከመውቀስ ቁራጭ ሻማ መለኮስ »

በዲን. ዮሐንስ መኮንን

ለውድ የዲያቆን ዳንኤል ብሎግ ታዳሚዎች

እንኳን ለጦመ ፍልሰታ በሰላም አደረሳችሁ ሱባኤው የግል እና የቤተክርስቲያናችን ችግሮቻችንን መፍቻ ያድርግልን፡፡

ወንድማችን ዲ.ን ዳንኤል ብዙዎቻችን ፈራ ተባ ስንልበት የነበረውን የቤተ ክህነቱን ጉዳይ ለአደባባይ አብቅቶታል፡፡ ምንም እንኳን ሰው ያወቀው ፀሐይ የሞቀው ጉዳይ ቢሆንም!! ለውይይት ክፍት ለማድረግ ቀዳሚውን ሰማዕትነት (ምስክርነት) ከመውሰዱም ሌላ በበኩሉ የታዩትን የመፍትሔ ሀሳቦች ሰንዝሯል፡፡

 ከቅርብ ዓመታት ወዲህ በርካታ ኦርቶዶክሳውያን ወጣት ምሁራን የመጀመሪያ የሁለተኛና የሶስተኛ ዲገሪ ማሟያ ጥናታቸውን በቤተ ክርሰቲያን ዙርያ ማድረግ እየተለመደ መጥቷል፡፡ አንድ ወዳጄ ታዲያ ጥናቱን በቤተ ክርስቲኒቱ ዙሪያ ማድረግ ፈልጎ የመነሻ ችግር (statement of the problem) ማግኘት ይቸገረው እና ፕሮፌሰሩ ዘንድ በመሄድ የገጠመውን ችግር ይነገራቸዋል፡፡ መምህሩም «እንዴት የመነሻ ችግር ታጣለህ? ቤተክስቲያን ማለት በራሱ ችግር አይደለም ወይ?» በማለት መልሰውለታል፡፡ አሁን አሁን ከችግሮቹ ብዛት፣ ስፋት እና ጥልቀት የተነሳ «ቤተ ክህነት» ማለት «ችግር» የማለት ያህል ሆኗል፡፡

Friday, August 13, 2010

የመፍትሔ ሃሳቦች ክፍል 2

8 እኔም አጥፍቻለሁ ብሎ መጀመር
የኢትዮጵያ ቤተ ክርስቲያን ለደረሰባት ፈተና ተጠያቂ የማይሆን የቤተ ክርስቲያን ልጅ የለም፡፡ ምናልባት የጥፋቱ ደረጃ ይለያይ ካልሆነ በቀር፡፡ አንዳንዶቹ በቀጥታ ሌሎቹ በተዘዋዋሪ፤ አንዳንዶቹ ስሕተት በመፈጸም ሌሎቹ ስሕተት ሲፈጸም ዝም በማለት፤ አንዳንዶቹ እኔ የለሁበትም በማለት፣ ሌሎቹ እኔን ካልነካኝ ብለን፤ አንዳንዶቹ ለዕለት ጥቅም፣ ሌሎቹ ለወገንተኛነት፤ ሲባል ለፈጸምናቸው ስሕተቶች መጸጸት አለብን፡፡ ስሕተት መሥራትም ሆነ ሲሠራ በቸልታ ማየት ሁለቱም ያስጠይቃል፡፡ በሉቃስ 10 በተጻፈው የሩኅሩኁ ሳምራዊ ታሪክ ላይ ካህኑ እና ሌዋዊው የተወቀሱት «አይተው ገለል ብለው በማለፋቸው» ነው፡፡

አሁን እንደሚታየው ነገሮችን በጥቂት ሰዎች ላይ ብቻ በመጠቆም እጅን ከደሙ ለመታጠብ መሞከር መፍትሔ ሳይሆን ችግር ይወልዳል፡፡ አንዳንዶቻችንም በአጋጣሚ ከሥልጣኑ ቦታ ዘወር በማለታችን የተነሣ የማንጠየቅ ይመስለናል፡፡ ዘወር ብሎ ሲታይ ግን እኛም በቦታው ሳለን እንዲሁ ነበርን፡፡ ልዩነቱ የአንዳንዶች ተሰምቷል የአንዳንዶች አልተሰማም፡፡ የአንዳንዶች ብሷል፣ የአንዳንዶች አልባሰም፡፡ እናም በመጀመርያ ራሳችንን ነጻ እናውጣ፡፡ በንስሐ፣ በመጸጸት፣ ለተሻለም ተግባር በመነሣት፡፡

Wednesday, August 11, 2010

የመፍትሔ ሃሳቦች

ባለፈው ሳምንት የቤተ ክህነታችንን ተግዳሮት አንሥተን ተወያይተን ነበር፡፡ በስተ መጨረሻም አጠቃላይ መፍትሔዎችን ለመጠቆም ተሞክሯል፡፡ በዚህኛው ጽሑፍ ደግሞ ዝርዝር የመፍትሔ ሃሳቦችን እናያለን፡፡ እነዚህ መፍትሔዎች በአዘጋጁ የታዩ ናቸው፡፡ አንባብያን ደግሞ የመፍትሔ ሃሳቦችን መሰንዘር አለባቸው፡፡

ሁለት ዋና ዋና ጉዳዮች

ለቤተ ክርስቲያን የሚያስፈልጋት ምን ዓይነት መፍትሔ ነው?

Friday, August 6, 2010

ኑ እንፍጠር

ግሪኮች እንዲህ ይላሉ፡፡

በድሮ ዘመን የአቴና ሰዎች መልካም መሪዎችን በማጣታቸው ምክንያት ይማረሩ ነበር፡፡ አንድ ቀን ወደ ኦሊምፐስ ተራራ ወጥተው የአማልክት ንጒሥ የሆነውን ዜውስን ለመኑት፡፡ «እባክህ ከመንደራችን እስከ ሀገራችን ድረስ ባሉት ቦታዎች በመልካም የሚያስተዳድሩ መሪዎችን ስጠን» አሉት፡፡ ዜውስም «ፊንቄያውያን መጥተው     ይግዟችሁን?»   ሲል ጠየቃቸው አቴናውያንም «አንፈልግም» አሉ፡፡ «ካርታጎዎች መጥተው ይግዟችሁን?» አላቸው ዜውስ አሁንም «በቅኝ መገዛት አንፈልግም» አሉ፡፡ እንደገናም «ሮማውያንን አምጥቼ በላያችሁ ልሹምባችሁን?» ሲል ጠየቃቸው፡፡ አቴናውያን በዚህም ሊስማሙ አልቻሉም፡፡

ዜውስ ባቢሎናውያንን፣ ፋርሶችን፣ ኬጢያውያንን እና ጢሮሳውያንን አምጥቶ በአቴና አውራጃዎች ለመሾም ፈቃዳቸውን ጠየቃቸው፡፡ አቴናውያን ግን ፈጽሞ አይሆንም አሉ፡፡ በዚህ ጊዜ ዜውስ «ታድያ ከየት አምጥቼ ነው መልካም መሪዎችን የምሰጣችሁ?» ሲል ጠየቃቸው፡፡ «ከመካከላችን ስጠን» ብለው መለሱለት፡፡ በዚህ ጊዜ ዜውስ አዝኖ እንዲህ አላቸው፡፡ «ጥሩ በሬ ለማግኘት ጥሩ ጥጃ፣ ጥሩ ጠቦትም ለማግኘት ጥሩ ግልገል፣ ጥሩ ወፍ ለማግኘት ጥሩ ጫጩት፣ ጥሩ ዶሮም ለማግኘት ጥሩ ዕንቁላል ያስፈልጋል፡፡ እናንተ በመልካም ያላሳደጋችኋቸውን ልጆች እኔ እንዴት አድርጌ በመልካም እሾማቸዋለሁ፡፡ እኔ ሰውን ፈጠርኩ፤ መሪዎቻችሁን ግን እናንተ ፍጠሩ፡፡»

መሪን ማን ይፈጥረዋል?

Thursday, August 5, 2010

መታረቅ ወይስ መታረቅ

ሰሞኑን የሁላችንንም ተስፋ ከፍ ከፍ አድርጎ የነበረ ነገር ሲጨልም አይተናል፡፡

በአባቶች መካከል የተፈጠረው መለያየት በዕርቅ ሊፈታ ነው ተባለ፡፡ ሽማግሌዎች ተሰባሰቡ ተባለ፡፡ ቅዱስ ሲኖዶስ እና በዝርወት ያሉት አበውም ፈቃደኛ ሆኑ ተባለ፡፡ ቀን ተቆረጠ ተባለ፡፡ ከአዲስ አበባ የተወከሉ ልኡካን አሜሪካ ገቡ ተባለ፡፡ አዲስ አበባ ከሚገኘው ቅዱስ ሲኖዶስ ተመድበው አሜሪካ የሚገኙት ሊቃነ ጳጳሳት ሳያውቁት እና ሳይሳተፉበት ሽማግሌዎች ተቀበሏቸው ተባለ፡፡ በሀገረ ስብከቱ መንበረ ጵጵስና ሳይሆን ሆቴል ዐረፉ ተባለ፡፡ አንዳንድ ሽማግሌዎች ራሳቸው እዚህ ከነበሩት አበው ጋር አይስማሙ ነበር ተባለ፡፡ ዳላስ አውሮፕላን ማረፊያ የደረሰውን ልኡክ ለመቀበል በነበረው መርሐ ግብር ላይ ፍቅር ሳይሆን መቃቃሩ በግልጽ ታይቶ ነበር ተባለ፡፡

Tuesday, August 3, 2010

የብርጭቆው ወይስ የምንጩ ውኃ ክፍል 2

ባለፈው ሳምንት የቤተ ክህነቱን አጭር ታሪክ እና ያጋጠመውን ፈተና ማየት ጀምረን ነበር እንቀጥላለን

ቤተ ክርስቲያን በግብጻውያን ጳጳሳት መመራቷ የራሱ የሆነ ጥቅም እና ጉዳት ነበረው፡፡ ከጉዳቱ አንዱ ጠንካራ፣ በዘመናት የተፈተነ እና ሥር የያዘ ቤተ ክህነት እንዳይኖረን ማድረጉ ነው፡፡ የቤተ ክህነቱን ሥራ ነገሥታቱ እና ግብፃውያን ጳጳሳቱ ከካህናተ ደብተራ ጋር ብቻ በመሆን ማከናወናቸው የቤተ ክርስቲያንዋን እድሜ ግማሽ እንኳን ያለው ቤተ ክህነት እንዳይኖረን አድርጓል፡፡

ቤተ ክርስቲያን የሀገሪቱ ብቸኛ የትምህርት ተቋም በነበረች ጊዜ ለራስዋም ሆነ ለሀገሪቱ የሚሆን የተማረ የሰው ኃይል ታመረት ነበር፡፡ ለቅዳሴው፣ ለማኅሌቱ፣ ለአቋቋሙ፣ ለሰዓታቱ፣ ለትርጓሜው፣ ለቅኔው፣ለድጓው የሚሆን የሰው ኃይል ራስዋ በራስዋ ታወጣ ነበር፡፡ ቤተ ክህነት በዘመናዊ መንገድ ሲቋቋም ግን የሕግ ጉዳይ፣የሂሳብ ጉዳይ፣የሥራ አመራር ጉዳይ፣ የመዝገብ አያያዝ ጉዳይ፣ የመረጃ ቴክኖሎጂ ጉዳይ ጉዳዮቿ ሆኑ፡፡