Thursday, December 23, 2010

ይቅርታና ይቅር ባይነት


ኃይለ ገብርኤል ከአራት ኪሎ

ወንድም ዲ/ን ዳንኤል እንደወትሮው ሁሉ እጅግ ጠቃሚ ጉዳይ ነው ያነሳኸው። ቅዱስ እግዚአብሔር አምላካችን ይህንን ፀጋህን ይበልጥ ያብዛልህ፤ አሜን።

ይቅርታ ወይም ይቅር ባይነት የሰው ልጅ በዚህ ዓለም በሚኖርበት ወቅት በተለያዩ ማኅበራዊ ትስስሮች ወይም ግንኙነቶች አማካኝነት ከሌሎች የማኅበረሰቡ  ክፍሎች ጋር ለሚኖረው ጤናማ የኑሮ ጥምረት ትልቅ ድርሻ አለው ብዬ አምናለሁ። ይቅር መባባል ያለፈ በደልን አጥቦና አስወግዶ ለቀሪው ህይወት አዲስ ልቡናን በመፍጠር ግንኙነታችንን ወደ ተሻለ የኑሮ ምዕራፍ ያሸጋግረዋል። በአንድ ወቅት በታሪክ አጋጣሚ ተበዳድለው፣ ተቀያይመው፣ ተኮራርፈው ከዚያም ባለፈ ደም ተቃብተው እና ለቂም በቀል ሌት ተቀን በሃሳብም በግብርም ይሯሯጡ የነበሩ የኅብረተሰብ ክፍሎችን በልቡናቸው የተቋጠረውን የመጠፋፋት ሕልምና ዕቅድ ወደ ጎን ትተው  አንዱ ካንዱ በጋብቻ እስከመጣመርና አንዱ ላንዱ ዋስ ጠበቃ እስከመሆን ያደርሳቸዋል። በዚሁ መልካም አጋጣሚ ምክንያትም ሊጠፋ የነበረው ሕይወት፣ ሊፈስ የነበረው ደም እና ሊጎድል የነበረው አካል ከጥፋት፣ ከመፍሰስና ከመጉደል ይድናል።


ከዚህም ባለፈ ቂም በቀል በይቅርታ እስካልተደመደመ ድረስ ጥፋቱ መቋጫ የለውም። አንዱ ላለፈ በደሉ አዲስ በደል ሲፈፅም ሌላኛውም አፀፋውን ሲመልስ የሁለቱም ወገኖች በምድር ላይ በሕይወት እስካሉ ድረስ መጠፋፋቱ ይቀጥላል። እንዲህ ዓይነቱ ለይቅርታ ቦታ አለመስጠት በተለይ ከሌላው ዓለም በተለየ መልኩ በእኛ በኢትዮጵያውያን ይብሳል። ምክንያቱ ምን ይሆን? በምጣኔ ሃብት አለማደጋችን፣ በቴክኖሎጂ አለመበልፀጋችን ወይም ገና ያልደረስንበትና ያልተማርነው ዘመናዊ ትምህርት ይኖር ይሆን? ትልቁ መንስዔ ከእነዚህ ምክንያቶች መካከል እንዳልሆነ የምንገነዘበው እነዚህ ምክንያትች ሞልተው የተትረፈረፉላቸው ወገኖቻችን ይባስ ብለው የችግሩ ሰለባ እነሱ መሆናቸው ነው።

ያደግንበት ማኅበረሰብም ሲወርድ ሲዋረድ በመጣው በእትንኩኝ ባይነትና ክንዴን ሳልንተራስ እንዴት እደፈራለሁ? አስተሳሰቡ በደንብ አድርጎ አጥምቆናል። ገና ከእናታችን ማኅፀን ከመውጣታችንም ደም መላሽ ብሎ ስም ያወጣልናል። አንደበታችን እማማ አባባ ማለት ሳይጀምር በቂም በቀል ዲፕሎማ ከቤተሰባችን እና ከአካባቢያችን በከፍተኛ ማዕረግ እንመረቃለን። ከዚያ በኋላ ልክ ግብፃውያን እናቶች ልጆቻቸውን አባይ ሕይወትህ ነው እያሉ እንደሚያሳድጉት ሁሉ ለእኛም የስማችንን ትርጓሜ ከወደፊቱ ስራችን ዕቅድ ጋር እየተነገረን እናድጋለን። ከዚህም በተጨማሪ ሕዝብን እናዝናናበታለን በሚል ሽፋን የሚወጡ ዘፈኖችም የራሳቸው ተፅዕኖ አላቸው። የአንድን ግለሰብ አስተሳሰብ ለመግለፅ እንዲሁም ለግጥሙ ቤት መድፋት እንጂ ጭብጡ በማኅረሰቡ ላይ የሚያመጣውን አሉታዊ ተፅዕኖ ባለማስተዋል የሚዘፈኑ ዘፈኖች አሉ። “ተበድዬስ ይቅርታ አልልም የቀረው ይቅር እንጂ” የሚል ዘፈን ሲያዳምጥና አብሮ ሲያንጎራጉር ያደገ ሰው ለይቅርታ ያለው ቦታ ቢያንስ ኸረ እስከ ጭራሹም ባይኖረው ምን ይደንቃል?

ሁላችንም እንደምናስታውሰው በጀግኖች አባቶቻችን ቆራጥ ተጋዳይነት ለጥቁር ሕዝብ ሁሉ የሚተርፍ የነፃነት ፋና በዓድዋ ተራሮች ተንቦግቡጎ ባልጠበቀውና ባላሰበው መልኩ ድል የተደረገው የኢጣልያ መንግስት ይህንን በዓለም አቀፍ አደባባይ የውርደት ሸማ ያለበሰውን የኢትዮጵያውያን ተጋድሎ ቂም ለመወጣት በተጠቀመው የመርዝ ጋዝ እጅግ ብዙ ወገኖቻችን በመሪር ስቃይ አልፈዋል። እስቲ እነዚህን የነፃነታችን አምድና ለዛሬው እኛነታችን የሕይወትን መስዋዕትነት ከፍለው ስማቸውን በልባችን ፅላት ላይ በወርቅ ማኅተም ያተሙትን ወገኖቻችንን አንድ ጊዜ ቆም ብለን እናስባቸው። 

በዚያን ጊዜ እነደዚያ ያለውን የጭካኔ ርምጃ እንዲወሰድ ያዘዘውን አካል ብናገኘውና እጅና እግሩ ታስሮ ፊት ለፊታችን ቢቀርብልን ምን ዓይነት ርምጃ ይሆን የምንወስድበት? እንደው የትኛውን የቅጣት ዓይነት ብንቀጣው ነው አንጀታችን ቅቤ የሚጠጣው? ምን ዓይነት የአገዳደል ስልት ብንጠቀምና ብንገድለው ነው  ያለፈውን የወገኖቻችን ሕይወት፣ የጎደለውን አካላቸውን እና የፈሰሰውን ደማቸውን ዳግም ማግኘት የምንችለው? ቁርጥርጥ አድርገን ብንፈጨውና ወደ አፈር ብንቀይረው ከዚያም ዳግም እንደ ጭቃ አብኩተን ሰውዬውን ሰርተነው እና ሃይሉ ኖሮን እስትንፋስ እንዲኖረው አድርገን እንደገና ብንቆራርጠው ይህንንም ሂደት ሕይወታቸውን ባጡት ወገኖቻችን ቁጥር ብንደጋግመው ስንቶቹን ይሆን ዳግም በሕይወት የምናገኛቸው? ምንም። እርሱ በከፈተው የክፋትና የጭካኔ ጎዳና አብረነው እንድንጓዝ እና እርሱ ለሰራው ጥፋት በሚጠየቅበት ቦታ ብቸኝነት እንዳይሰማው ከማድረግና ከሚከፈለው ክፍያ ተቋዳሽ ከመሆን ያለፈ ጠቀሜታ የለውም።

ታድያ ቂም በቀሉ ፋይዳው ምንድነው? የመንፈስ እርካታ ይገኝበት ይሆን? በቂም በቀል ደስታና እፎይታን ብሎም እርካታን የሚያገኘው መንፈስ እንዴት ያለው መንፈስ ነው? በእውነት ነፍሳችን በእንደዚህ ያለ ድርጊት ደስታን ታገኝ ይሆን? በጭራሽ። ቂም በቀል ጊዜያዊ የሆነ እርካታን ለስጋችን ይሰጠው ይሆናል እርሱም ቢሆን ቀን አልፎ ቀን ሲተካ ይፀፀታል። ያጣሁትን መልሼ ላላገኝ ይህንን ማድረጌ ምን ጠቀመኝ? ለምንስ የሰነፎችን መንገድ ተከተልኩኝ? እያለ ራሱን መውቀሱ አይቀሬ ነው።  በደልን በበደል፣ ክፋትንም በክፋት፣ ተንኮልንም በተንኮል እንሸፍናለን በሚል የዋህ አስተሳሰብ ታስረን የነገሮችን ውል ከማጥፋት ይልቅ ጥፋትን ተራርሞ ክፍተትን በይቅረታ መሙለቱ የታላቅነትና የአስተዋይነት ብሩሕ ምልክት ነው። ይህ ይቅርታና ይቅር ባይነት መገኛው የት ይሆን?

እንደ እኔ አመለካከት ይቅርታ እና ይቅር ባይነት ምንጩ መንፈሳዊ ሕይወት ነው። ምንም እንኳን ይቅርታ መደራረግ ለስጋዊ ኑሯችንም ታላቅ ጠቀሜታ ቢኖረውም ዋናውና ከዚህ የሚበልጠው ግን መንፈሳዊው ዋጋ ነው። ይህንን መንፈሳዊ ዋጋ ያገኝ ዘንድ ዘወትር የሚተጋ ሰው ልቡናው ለይቅርታ የፈጠነ ነው። በዚህ ምድር በበዳዩ ከተበደለው በደል ይልቅ በሰማይ የሚያገኘው ክብር ሚዛን ይደፋለታል። እዚህ ላይ ግን ሁላችንም ልንገነዘበው የሚገባን ነገር አለ። ይቅር ባይነት ቀላል አይደለም እንደማንኛውም ክብርን እንደሚያጎናፅፍ ተጋድሎ ሁሉ እርሱም ከፍተኛ ተጋድሎ ያሻዋል። በአፋችን ለመናገር እንደሚቀለው ያህል ለመተግበሩ ቀላል አይደለም። ይቅር ለማለት ስናስብ ብዙ ፈተናዎች ፊታችን ይጋረጣሉ። ፈተናው ከራስ ይጀምራል የቤተሰብ ፈተናም አለው እንዲሁም የአካባቢ ተፅዕኖም አለው። እነዚህን ፈተናዎች በድል አድራጊነት መወጣት የሚችል ሰው ነው ይቅር የሚለው እና ሰማያዊውን ክብር ከእግዚአብሔር ዘንድ የሚያገኘው።

ቁርሾን በሆድ ይዞ ዘወትር መበላላትን፣ መጠፋፋትን እና ልኩን/ለኳን አሳያታለሁ ባይነትን የዘወትር መገለጫው የሆነውን ሰጋችንን ሰማያዊውን ተስፋ አሻግራ ለምትመለከተው ነፍሳችን ስናስገዛ መንፈሳዊነት በሕይወታችን በድቅድቅ ጨለማ ውስጥ እንደተለኮሰ ሻማ ከሩቅ ያበራል። የዚያን ጊዜ የበደሉንን አካላት መጥተው ይቅርታ እስኪሉን ሳንጠብቅ አስቀድመን ይቅርታን እናደርግላቸዋለን። የሰማያዊው ክብር ባለቤቶች መሆናችንን እናውቃለንና ይቅርታውን ባደረግን ወቅት ከመቼውም ይበልጥ ውስጣችን በሐሴት ይሞላል። የሰላም እንቅልፍም እንተኛለን።

ሰሞኑን ሚዲያው ሁሉ ስለ የቀድሞ መንግስት ከፍተኛ ባለስልጣናት ከእስር በይቅርታ የመፈታት ሒደት ይዘግባሉ። ስለ እውነት ለመናገር ለመጀመሪያ ጊዜ ጉዳዩን እንደሰማሁኝ ምንነቱን በውል ባላወኩት ስሜት ውስጥ ገባሁ፤ ቀስ በቀስ ወደ ልቡናዬ ተመልሼ ነገሮችን ከየአቅጣጫው መመልከት ጀመረኩ። በመጀመሪያ ደረጃ በሕይወት እያለሁ ይህንን ዓይነት ከወርቅ የከበረ ታሪክ እጅግ በምወዳት ሀገሬ ለማየት በመታደሌ ሁሉን ቻዩን አምላኬን ቅዱስ እግዚአብሔርን አመሰገንኩ። ይህንን  ታላቅ ስራ ከመጠንሰስ ጀምረው የተለያዩ ፈተናዎችን አልፈው አሁን ያለበት ደረጃ ያደረሱትን አካላት በሙሉ እስረኞቹን፣ በደል የደረሰባቸው እና በአንድም በሌላ የጥቃቱ ሰለባ የሆኑ ወገኖችን፣ የሃይማኖት አባቶችን እና መንግስትን በእውነት ምስጋና ይገባቸዋልና አመሰገንኳቸው።

በተለይ በተለያየ መንገድ ለተለያየ ስቃይና መከራ ለተዳረጉት ወገኖቻችን ይህንን ይቅርታ ማድረግ ምን ያህል ፈታኝ እንደሚሆን መቼም አያጠያይቅም። ይቅርታውን ማድረጉ ሳይሆን ገና ሲታሰብ እንኳን የቱን ያክል ስሜትን እንደሚረብሽና በስርዓቱ ወቅት ያጣነው ነገር ሁሉ በዓይነ ሕሊናችን እየመጣ እንደሚያስቸግረን እሙን ነው። እዚህ ላይ ልታስተውሉት የሚገባው ነገር በወቅቱ በደረሰው ጥቃት በደል የደረሰበት ድፍን የኢትዮጵያ ሕዝብ መሆኑን እንዲሁም ይህ ጉዳይ በእናንተ ይቅር ባይነት መጠናቀቁ በምድርም በሰማይም አሸናፊዎቹ እናንተ እንደሆናችሁ ነው። ከዚህም በተጨማሪ ይህ በሀገራችን ታሪክ ለመጀመሪያ ጊዜ የሚፈፀምና በተለይ ለእናነተ በታሪክ የክብር ባለቤት  ያደርጋችኋልና ልትኮሩ ይገባችኋል። ለትውልድ መተላለፍ ያለበት ምን መሆኑን ለሁላችንም አስተምራችሁናልና በድጋሜ ላመሰግናችሁ አወዳለሁ።

የሃይማኖት አባቶች እየሰራችሁት ያለው ነገር በእጅጉ የሚያስመሰግናችሁና ከዚህ በፊት ከእናንተ አጥተነው የነበረ በመሆኑ ጅምራችሁን ከፍፃሜ እንድታደረሱና በቀጣይም እንዲህ ዓይነቱን ስራ አበርትታችሁ እንድትቀጥሉበት  አደራዬ የጠበቀ ነው። መንግስትም እንዲሁ እንዲህ ያለ የታሪክ ምዕራፍ እንዲከፈት በመፍቀዱና ለተግባራዊነቱም ያሳየው ተነሳሽነት በእጅጉ የሚያስመሰግነው ነው። ውጤት ተኮር ስራ ማለት እንደዚህ ነው።

በጅምር ላይ ያሉ ስራዎች ከፍፃሜ ደርሰው እንድናያቸው እግዚአብሔር አምላክ ቅዱስ ፈቃዱ ይሁንልን፤ አሜን።
ቸር ያሰማን፤ አሜን።

19 comments:

  1. Selam le hulum Egizabher yistelgn.
    Ehete micheal

    ReplyDelete
  2. ቃለ ህይወት ያሰማልን። ለእግዚአብሔር እንደልቡ ልንሆንለት ያስፈልገናል። ሳኦልን ከገዳይነት የመለሰ ጌታ ሁሉንም በንስሀ እንደ ባዘቶ ያጠራዋል። እናት አባት እህት ወንድም የሞቱባቸውን እግዚአብሔር አጽናኝ መልአክን ይላክልን። ይቅር በሉ ይቅርም ትባላላችሁ።

    ReplyDelete
  3. It is great news!!!

    ReplyDelete
  4. ይቅርታ እስክይት ይቅር ማለት ብትችሉ.....ክማዶ..በሩቁም..ይጠብቃሉ..ግፉ ይደርሰባችው አሉ ይቅርታው ሙሉ ይሆናል

    ReplyDelete
  5. አዎ ኢትዮጵያን የሚበጃት እንዲህ አይነት መልካም ታሪክ ነው!!!

    ReplyDelete
  6. If we accept their forgiveness, our petition will reach to God...if not, God is trusted to accept their forgiveness and release them cuz He is merciful and nothing is impossible to Him. Due to the advantage is ours please “Yiker enibabal”

    ReplyDelete
  7. If we accept their apology, God's mercy upon us!! If not, God is trusted to accept their apology and release them. cuz He is merciful and no one is protected to do that. The advantage is ours so pls make apology to each other!!

    ReplyDelete
  8. i think u changed the template of the blog
    but the pictures are not visible in this template so try to correct the template so that to view the pictures.
    Thank you

    ReplyDelete
  9. ቃለ ሕይወት ያሰማልን። እግዚአብሔር ነገሮችን ሁሉ የሚያከናውንበት የራሱ ጊዜ አለው። እነዚህ ሰዎች በስልጣን ላይ በነበሩበት ወቅት ለሰሩተ በደል በንፁህ ልቡና ንስሃ ከገቡ ይቅር እንደሚላቸው የታመነ ነው። እነዚህ ሰዎች ቀሪ ሕይወታቸውን በምን መልኩ እንደሚያሳልፉም እረሱ ያውቀዋል እንደፈቀደም ያኖራቸዋል። የእርሱን ስራ እንገዳደር ዘንድ እኛ ማነን?ይልቅስ ይህ የታሪክና የቅድስና ጥሪ እንዳያልፈን ወንድማችን እንዳለው ስጋችንን ለነፍሳችን እናስገዛ። በተለይ እስረኝቹ ከእስር ተፈተው የሚሰጡን በመከራና በእድሜ የበሰለ ምክር እና ትምህርት ለእኛና ለመጪው ትውልድ መሰረታዊ የአስተሳሰብ ለውጥ እንዲሁም የሀገራችን መልካም ገፅታ በአለም አደባባይ ያጎላዋልና ይህንን መልካም አጋጣሚ አምላካችን አሳይቶ እንዳይነሳን ቅዱስ ፈቃዱ እንዲሆንልን ለፀሎት እንትጋ።

    ReplyDelete
  10. ቁርሾን በሆድ ይዞ ዘወትር መበላላትን፣ መጠፋፋትን እና ልኩን/ለኳን አሳያታለሁ ባይነትን የዘወትር መገለጫው የሆነውን ሰጋችንን ሰማያዊውን ተስፋ አሻግራ ለምትመለከተው ነፍሳችን ስናስገዛ መንፈሳዊነት በሕይወታችን በድቅድቅ ጨለማ ውስጥ እንደተለኮሰ ሻማ ከሩቅ ያበራል። Well said. Thank you.

    ReplyDelete
  11. Kale hiwot yasemalen.Hulachenem lebego tegbaroch betselot enetga.Thank you.

    ReplyDelete
  12. ይቅርታ ጣላቅ ነው ቃለ ሕይወት ያሰማልን

    ReplyDelete
  13. Hi foundation teresa ende?
    Mastebabre Aqatene malet newu?
    H/Gebereal Yearate kilowu ebakihin, anede hulete komite felegehe jemerewu::
    beregeti Yedaniel kititile techemero
    alemayehu Kemichigan

    ReplyDelete
  14. Ere ye foundationu neger min derese??? Eyetebekin eko new. Ebakachihu bereketachinin ataskerubin.

    ReplyDelete
  15. bengerachen laye esrebeten yemesle talake negre mene ale telalachehu sebeket meketatele kegemerku 15 amete honegne neseha gen alegebahum yasaferal bemetsehaf kedus tarik eserbet teamer yeseru bezu nachaw yosef ena paulosen leb yelual kehager betem tedi yekedemo tekelaye minseter tamerat enedihum yederge balaselatanat nesahachewn saseb yegremegnale yesew leg benetsanet sefera hono egeziabeheren kemayet yelek besekay weset mayeten yemertal sebaki sayasefelge melwete

    ReplyDelete
  16. ይቅር እንደምንል ይቅር እንደምንል በቀን ሦስት አራቴ ነው እምንለው በፀሎታችን ግን መናገር ብቻ እንዳይሆንብን እስኪ በተግባር እናውለው….. እግዚአብሔር ይቅር ይበለን

    ReplyDelete
  17. sintayehu (italy)
    dir d/dani (a/gebriel)

    ሁላችንም እንደምናስታውሰው በጀግኖች አባቶቻችን ቆራጥ ተጋዳይነት ለጥቁር ሕዝብ ሁሉ የሚተርፍ የነፃነት ፋና በዓድዋ ተራሮች ተንቦግቡጎ ባልጠበቀውና ባላሰበው መልኩ ድል የተደረገው የኢጣልያ መንግስት ይህንን በዓለም አቀፍ አደባባይ የውርደት ሸማ ያለበሰውን የኢትዮጵያውያን ተጋድሎ ቂም ለመወጣት በተጠቀመው የመርዝ ጋዝ እጅግ ብዙ ወገኖቻችን በመሪር ስቃይ አልፈዋል። እስቲ እነዚህን የነፃነታችን አምድና ለዛሬው እኛነታችን የሕይወትን መስዋዕትነት ከፍለው ስማቸውን በልባችን ፅላት ላይ በወርቅ ማኅተም ያተሙትን ወገኖቻችንን አንድ ጊዜ ቆም ብለን እናስባቸው።

    በዚያን ጊዜ እነደዚያ ያለውን የጭካኔ ርምጃ እንዲወሰድ ያዘዘውን አካል ብናገኘውና እጅና እግሩ ታስሮ ፊት ለፊታችን ቢቀርብልን ምን ዓይነት ርምጃ ይሆን የምንወስድበት? እንደው የትኛውን የቅጣት ዓይነት ብንቀጣው ነው አንጀታችን ቅቤ የሚጠጣው? ምን ዓይነት የአገዳደል ስልት ብንጠቀምና ብንገድለው ነው ያለፈውን የወገኖቻችን ሕይወት፣ የጎደለውን አካላቸውን እና የፈሰሰውን ደማቸውን ዳግም ማግኘት የምንችለው? ቁርጥርጥ አድርገን ብንፈጨውና ወደ አፈር ብንቀይረው ከዚያም ዳግም እንደ ጭቃ አብኩተን ሰውዬውን ሰርተነው እና ሃይሉ ኖሮን እስትንፋስ እንዲኖረው አድርገን እንደገና ብንቆራርጠው ይህንንም ሂደት ሕይወታቸውን ባጡት ወገኖቻችን ቁጥር ብንደጋግመው ስንቶቹን ይሆን ዳግም በሕይወት የምናገኛቸው? ምንም። እርሱ በከፈተው የክፋትና የጭካኔ ጎዳና አብረነው እንድንጓዝ እና እርሱ ለሰራው ጥፋት በሚጠየቅበት ቦታ ብቸኝነት እንዳይሰማው ከማድረግና ከሚከፈለው ክፍያ ተቋዳሽ ከመሆን ያለፈ ጠቀሜታ የለውም።
    kal h/yasmalen

    ReplyDelete
  18. ቁርሾን በሆድ ይዞ ዘወትር መበላላትን፣ መጠፋፋትን እና ልኩን/ለኳን አሳያታለሁ ባይነትን የዘወትር መገለጫው የሆነውን ሰጋችንን ሰማያዊውን ተስፋ አሻግራ ለምትመለከተው ነፍሳችን ስናስገዛ መንፈሳዊነት በሕይወታችን በድቅድቅ ጨለማ ውስጥ እንደተለኮሰ ሻማ ከሩቅ ያበራል።thx DN Daniel.

    ReplyDelete
  19. Daer Daneil!
    I think the message of the above article should be concluded by the following quotation
    በአፋችን ለመናገር እንደሚቀለው ያህል ለመተግበሩ ቀላል አይደለም። ይቅር ለማለት ስናስብ ብዙ ፈተናዎች ፊታችን ይጋረጣሉ። ፈተናው ከራስ ይጀምራል የቤተሰብ ፈተናም አለው እንዲሁም የአካባቢ ተፅዕኖም አለው። እነዚህን ፈተናዎች በድል አድራጊነት መወጣት የሚችል ሰው ነው ይቅር የሚለው እና ሰማያዊውን ክብር ከእግዚአብሔር ዘንድ የሚያገኘው።

    ReplyDelete