ሻካራ እጆች

የአንድ ኩባንያ ባለቤት ለደርጅቱ ብቁ የሆነ ሥራ አስኪያጅ ለመቅጠር ማስታወቂያ አወጣ፡፡ ላወጣው ማስታወቂያ ባቀረቡት ማስረጃ ተወዳድረው ካለፉት ሦስት ሰዎች መካከል በዕድሜ ትንሽ የሆነውን ለቃለ መጠይቅ ጠራው፡፡

ወጣቱ በተጠራበት ቀን አለባበሱን አሳምሮ መንፈሱንም አንቅቶ ጠበቀ፡፡ የኩባንያው ባለቤት የወጣቱን የትምህርት እና የሥራ ሁኔታ የሚገልጠውን መረጃ አገላብጦ አየው፡፡ የተማረው በሀገሪቱ ውስጥ አንቱ በሚባሉ ት/ቤቶች ነው፡፡ የመጀመርያ እና ሁለተኛ ዲግሪውን የሠራው እጅግ በጣም ሀብታሞች በሚማሩባቸው ኮሌጆች ውስጥ ነው፡፡ ያገኛቸው ውጤቶች ምርጥ ከሚባሉት ውጤቶች ውስጥ ናቸው፡፡ በየደረጃው ከነበሩ መምህራን እና የትምህርት ባለሞያዎች ሽልማቶችን እና ማበረታቻዎችን አግኝቷል፡፡

የዳንኤል ክብረት እይታዎች አንደኛ ዓመት

         ጡመራ በአማርኛ

ይህ ብሎግ የተጀመረበት አንደኛ ዓመት በመጭው መጋቢት ወር በአዲስ አበባ እና በዋሽንግተን ዲሲ ይከበራል፡፡

በዝግጅቱ ላይ ልዩ ልዩ መርሐ ግብሮች ይቀርባሉ፡፡ 

  

ይቅርታና ይቅር ባይነት

ኃይለ ገብርኤል ከአራት ኪሎ

ወንድም ዲ/ን ዳንኤል እንደወትሮው ሁሉ እጅግ ጠቃሚ ጉዳይ ነው ያነሳኸው። ቅዱስ እግዚአብሔር አምላካችን ይህንን ፀጋህን ይበልጥ ያብዛልህ፤ አሜን።

ይቅርታ ወይም ይቅር ባይነት የሰው ልጅ በዚህ ዓለም በሚኖርበት ወቅት በተለያዩ ማኅበራዊ ትስስሮች ወይም ግንኙነቶች አማካኝነት ከሌሎች የማኅበረሰቡ  ክፍሎች ጋር ለሚኖረው ጤናማ የኑሮ ጥምረት ትልቅ ድርሻ አለው ብዬ አምናለሁ። ይቅር መባባል ያለፈ በደልን አጥቦና አስወግዶ ለቀሪው ህይወት አዲስ ልቡናን በመፍጠር ግንኙነታችንን ወደ ተሻለ የኑሮ ምዕራፍ ያሸጋግረዋል። በአንድ ወቅት በታሪክ አጋጣሚ ተበዳድለው፣ ተቀያይመው፣ ተኮራርፈው ከዚያም ባለፈ ደም ተቃብተው እና ለቂም በቀል ሌት ተቀን በሃሳብም በግብርም ይሯሯጡ የነበሩ የኅብረተሰብ ክፍሎችን በልቡናቸው የተቋጠረውን የመጠፋፋት ሕልምና ዕቅድ ወደ ጎን ትተው  አንዱ ካንዱ በጋብቻ እስከመጣመርና አንዱ ላንዱ ዋስ ጠበቃ እስከመሆን ያደርሳቸዋል። በዚሁ መልካም አጋጣሚ ምክንያትም ሊጠፋ የነበረው ሕይወት፣ ሊፈስ የነበረው ደም እና ሊጎድል የነበረው አካል ከጥፋት፣ ከመፍሰስና ከመጉደል ይድናል።

«እንጀራ ከአልጫ እና ከቀይ ወጥ ጋር ወይንም ሞት»

 የዛሬ ሁለት ዓመት በ2000 ዓም ነው፡፡ የገና በዓል አልፎ በቀጣዩ እሑድ፡፡ ከዚህ በፊት አጋጥሞኝ የማያውቅ አንድ አዲስ መርሐ ግብር ላይ ለመሳተፍ ጓጉቻለሁ፡፡ ባለፉት ሃያ ዓመታት በተለያዩ መድረኮች ላይ የዐቅሜን ያህል «አስተምሬያለሁ»፡፡ የዚህኛው ግን ይለያል፡፡

በጠዋቱ ዲያቆን ምንዳየ ብርሃኑ ቤቴ ድረስ መጥቶ በመኪናው ይዞኝ ሄደ፡፡ ስለ መርሐ ግብሩ እየተነጋገርን እና ይህንን ዕድል በማግኘታችን ዕድለኞች መሆናችች እያነሣን በቀለበት መንገድ ከነፍን፡፡ መርሐ ግብሩን ለፈቀዱት የማረሚያ ቤት ባለ ሥልጣናትም ምስጋናችንን አቀረብን፡፡ በማረሚያ ቤቶች ውስጥ እንዲህ ያለ የማናስበው ነገር በመደረጉ እዚህች ሀገር ውስጥ ሳናውቃቸው የተቀየሩ ነገሮች አሉ ማለት ነው) እያልን ነበር የምንጓዘው፡፡

እንደ በጎች ወይስ እንደ ፍየሎች

አንድ ጊዜ በጎች እና ፍየሎች ከተለያየ አገር ለቅቀው ሲሄዱ ከሁለት ወገን የመጡት በጎች እና ፍየሎች አንድ ድልድይ ላይ ደረሱ፡፡ ድልድዩ ከወዲያ ወደዚህ ለመሻገር የሚቻለው በአንድ ጊዜ መሆኑን የድልድዩ ባለቤት ተናገረ፡፡ ከሁለቱም በኩል የመጡት በጎች በአንድ ላይ፣ ከሁለቱም በኩል የመጡት ፍየሎችም በአንድ ላይ፡፡

የሚያሳዝነው ግን ድልድዩ ሊያሳልፍ የሚችለው አንድ በግ ወይንም አንድ ፍየል ብቻ ነው፡፡ የሚፈቀደው ግን ከሁለቱም አቅጣጫ ሁለት በጎች ወይንም ሁለት ፍየሎች እንዲገቡ ነው፡፡

ምሽግ ቆፋሪዎች

እኛ ኢትዮጵያውያን ለብዙ ዘመናት ከጦርነት ጋር ኖረናል፡፡ ሀገራችንን ከባዕዳን ጠብቀን ሀገረ አግዓዝያን ለማድረግ የመጡብንን ከመከላከል የተሻለ አማራጭ አልነበረንም፡፡

ሽፍቶች ከሽፍቶች፣ ዐማፅያን ከመንግሥት፣ መንግሥት ከዐማፅያን ስንዋጋ ኖረናል፡፡ እኛም በኩራት «ጦርነትን መዋጋት ብቻ ሳይሆን ጦርነትን መሥራትም እንችልበታለን» እያልን እስከ መናገር ደርሰናል፡፡

አል ሙሳማህ

አሜሪካ፣ አትላንታ ውስጥ ነው፡፡ አንዲት ሜክሲካን እና አንዲት ኢትዮጵያዊት አብረው አንድ መሥሪያ ቤት ይሠራሉ፡፡ ኢትዮጵያዊቷ አንድ ችግር ገጥሟት ያቺ ሜክሲካን ሥራዋን እንድትሸፍንላት ትነግራትና ትቀራለች፡፡ በማግሥቱ ስትመጣ ሚክሲካኗ አልሸፈነችላትም ነበርና ተቀጣች፡፡ ይህ ነገር ወዳጃችንን አስቀየማትና ሜክሲካኗን ዘጋቻት፡፡ ሜክሲካን ሆዬ ብትል ብትሠራት የተዘጋውን ማስከፈት አልቻለችምና «ምን ሆነሽ ነው?» ብላ ወጥራ ያዘቻት፡፡ «ሥራሺን እሸፍንልሻለሁ ካልሺኝ በኋላ በመቅረትሺ አስቀጥተሽኛልና ተቀይሜሻለሁ» አለቻት፡፡ ያቺም ሚክሲካን «ሶሪ» አለቻት፡፡

ከ «ሶሪው» በኋላ ሜክሲካን ሆዬ እንደ ጥንቱ ልትጫወት ብትሞክር ነገሩ ያው ነው፡፡ ከዚያም ለሥራ ባልደረቦቿ «ምን ሆና ነው ደግሞ?» ብላ ጠየቀቻቸው፡፡ «ስላስቀጣሻት ተቀይማሻለች» ብለው ነገሯት፡፡ ያቺ ሜክሲካንም «እንዴ ለርሱማ ሶሪ ብያታለሁኮ» አለች ይባላል፡፡ እርሷ ለ «ሶሪ» ያላት ቦታ እና ወዳጃችን ያላት ቦታ ተለያይቶ ነው ችግሩ፡፡

ምን እናድርግ ክፍል ሁለት

ኃይለ ገብርኤል ከአራት ኪሎ

የተከበራችሁ ወንድሞች እና እህቶች የሕያው አምላካችን ፍፁም ሰላም ከሁላችን ጋር ይሁን፤ አሜን።

በመጀመሪያ ደረጃ ጊዜያችሁን ሰውታችሁ ፅሑፉን በማንበብ ቀጥላችሁም ነገሮችን በሁሉም አቅጣጫ በመመልከት የአካሔዱ እና የአፈፃፀሙ ሒደት እንዴት መሆን እንዳለበት በውስጣችሁ ካለው ስጋት ጭምር በግልፅ በመግለፃችሁ ቅዱስ እግዚአብሔር ቃለ ሕይወትን ያሰማልን፤ አሜን።

በጣም ደስ የሚለው ነገር ከሁሉም አስተያየት ሰጪዎች መረዳት እንደሚቻለው ሀሳብ እና ፍላጎቱ በሁላችንም ዘንድ የነበረ መሆኑ ነው። የቤተ ክርስቲያን ልጅነት ማለት እንዲህ ነው። ስለ ቅድስት ቤተ ክርስቲያን መቆርቆርና እኔም አለሁ ብሎ ከልብ መነሳሳት በእውነት ልብን በሐሤት ይሞላል። የእኛን የልጆቹን እንዲህ ከልብ መነሳሳት ሲመለከት ቅዱስ አባታችን እግዚአብሔር ትንሿን ጥረታችንን ባርኮ እና ቀድሶ ለታላቅ ቁምነገር እንደሚያበቃልን በፍፁም ልባችን እናምናለን።

ለቤተ መጻሕፍትዎ

                            ትቤ አኩስም መኑ አንተ

 

                                            (አክሱም አንተን ማነህ ትልሃለች)

አዘጋጅ      አስረስ የኔ ሰው

የኅትመት ዘመን 1951 ዓም

ገጽ    334

አስረስ የኔ ሰው በዘመናዊቷ ኢትዮጵያ ስለ ታሪካቸው፣ ሃይማኖታቸው እና ማነነታቸው በመቆርቆር ትውልዱን ለመታደግ ከተነሡ ሊቃውንት መካከል አንዱ ናቸው፡፡ ስለ ታሪክ ባህል እና ቅርስ በአማርኛ ቋንቋ ለትውልዱ የተጻፉ መጻሕፍት እጥረት በነበረበት በዚያ ዘመን አንቱ የሚያሰኝ ሥራ ሠርተዋል፡፡

ያ ዘመን አንዳንድ የውጭ ሀገር ሰዎች ለማተሚያ ቤት እና ለመረጃዎች ያላቸውን ቅርበት ተጠቅመው ሀገሪቱን በተመለከተ የተሳሳተ መረጃ ያሳትሙ ነበር፡፡ የሚያሳትሙት በራሳቸው ማተሚያ ቤት፣ ቋንቋውም አማርኛ፣ የመሸጫውም ዋጋ ርካሽ ስለነበር ወጣቱን ትውልድ ስለ ሀገሩ ያለውን ሃሳብ ለማዛባት ሞክረዋል፡፡

ምን እናድርግ ላልነው ሁሉ

ከዲያቆን ዳንኤል ክብረት

ወንድሞቼ እና እኅቶቼ ግራ ቀኙን አይታችሁ ለሰጣችሁት ሃሳብ ሁሉ እግዚአብሔር ይስጣችሁ፡፡ መቼም ማናቸውም ነገር ያለ ችግር አይኖርምና ውጤቱንም ፈተናውንም ማየታችሁ መልካም ይመስለኛል ነገር ግን በተለይ ከኢትዮጵያ ውጭ ባሉ ወንድሞች እና እኅቶች አማካኝነት አንድ ፋውንዴሽን ብናቋቁምና በዚህ ብሎግ ላይ ወጥተው ጥገና፣ እገዛ፣ ለሚያስፈልጋቸው ቅርሶች፣ ግንባታ ለሚያስፈልጋቸው ሙዝየሞች እና ዕቃ ቤቶች፣ ድጋፍ ለሚያስፈልጋቸው ሊቃውንት፣ ኅትመት ለሚያስፈልጋቸው ጥንታውያም መረጃዎች፣ ሽልማት ለሚያስፈልጋቸው ኢትዮጵያውያን አንዳች የምንችለውን ነገር ብናደርግ፡፡

እኔ ይህንን ለመሥራት ብቻዬን እቸገራለሁ፤ የኔ ድርሻ መጮኽ ቢሆን ሌሎቻችሁ ደግሞ የቀረውን ብትሠሩ፡፡ እስኪ እነ ዶ/ር ጌታቸው ዘካናዳ፣ ሌሎችም ሃሳብ ብትሰጡበትና ከንግግር ወደ ተገባር ብንለውጠው፡፡

ምን እናድርግ?

ኃይለ ገብርኤል ከአራት ኪሎ

በስመ አብ ወወልድ ወመንፈስ ቅዱስ አሐዱ አምላክ አሜን።

የአምላከ ቅዱሳን የልዑል እግዚአብሔር ሰላምና ፍቅር ከዚህ የጡመራ መድረክ ጦማሪ (ዲ/ን ዳንኤል) እና ከመላው የመድረኩ እድምተኞች ጋር ለዘላለም ፀንቶ ይኑር፤ አሜን።

የተከበራችሁ ወንድሞችና እህቶች፤ ሁላችንም እንደምናውቀው ወንድማችን ዲ/ን ዳንኤል በዚህ የጡመራ መድረኩ አማካኝነት በቅርብም በሩቅም ያለነውን ያለ ማንም ጎትጓችና ቀስቃሽ ልዑል እግዚአብሔር ባነሳሳው መጠን ደከመኝና ሰለቸኝ ሳይል ዘወትር በየሳምንቱ ማክሰኞና አርብ ከቅርቡ ጀምሮ ደግሞ ቅዳሜ አንዳዴም እንደአስፈላጊነቱ በሌሎቹም ቀናት በመጠቀም በአንዲት መአድ (የዳንኤል እይታዎች)ምግበ ነፍስና ምግበ ስጋን ሲመግበን ቆይቷል፣ አሁንም እየመገበን ይገኛል፣ እንደ እግዚአብሔር ፍቃድ ወደፊትም ከዚህ በበለጠ ያጠግበናል።

ይህንን የጡመራ መድረክ ከጀመረ ወዲህ በተለያዩ ማኅበራዊ ክንዋኔዎች እና አስተሳሰቦች ላይ በእርሱ እይታ አንጥሮ አውጥቶ ለነገሮች ያለን ግንዛቤ እንዲጎለብት እንዲሁም የአስተሳሰብ አድማሳችን እንዲሰፋ፣ በመንፈሳዊ እና በስጋዊ ተጋድሏቸው አንቱታን ያተረፉ ነገር ግን በአሁኑ ሰዓት በስጋቸው ከመቃብር በታች የሆኑ ወገኖቻችን በህይወት እያሉ የሰሯቸው በጎ ስራዎች አንፀባራቂ እንደነበሩ ሲያመላክተንና ይህ ስራቸውም ለትውልድ እንዲተላለፍ ሲተጋና እኛንም የማንነታችን መገለጫ የሆነውን ታሪካችንን ጠንቅቀን እንድናውቅ ሲያስገነዝበን፣ በመንፈሳዊ ህይወታችንም ማወቅ ያለብንን እንድናውቅ እና የሚጠበቅብንን ክርስቲያናዊ ግዴታ እንድንወጣ ሲመክረን እና ሲያነቃቃን ቆይቷል።

ብርሌ

በአንድ የገጠር ደብር አንድ ታዋቂ ሊቅ ነበሩ፡፡ እኒህ ይህ ቀረህ የማይባሉ ሊቅ ምንም ዓይነት ስሕተት አያልፉም፡፡ ባገኙት አጋጣሚ ሁሉ ስሕተቶችን ያርማሉ፡፡ እርሳቸው ለሰው ሳይሆን ለእውነት የቆሙ ነበሩ፡፡ የጎደለ ካለ ይሞላሉ፡፡ የተጣመመ ካለም ያቃናሉ፡፡ ታላቅ ነው ብለው አይፈሩም፣ታናሽ ነው ብለው አይደፍሩም፡፡

አንድ ጊዜ አንድ ተምሬያለሁ ያለ ብርሌ የሚባል ሰው እዚያ ደብር ይቀጠራል፡፡ ታድያ ብርሌ ዕውቀት በዞረበት የዞረ አይመስልም፡፡ ያልተማረውን ሳይሆን የተ ማረውን መቁጠር ይቀላል፡፡ እንኳን ምሥጢር ሊያደላድል ንባብ አይሆንለትም፡፡ ነገር ግን «አላዋቂነትን ምላስ፣ ቁስልን ልብስ ይሸፍነዋል» እንደሚባለው ነገር እንደ ተልባ የሚያንጣጣ ኃይለኛ ምላስ ነበረ፡፡ ለሊቃውንቱ የሚሆን ቢያጣ ለባልቴቶች የሚሆን ነገረ ዘርቅ ነበረውና ሠፈሩን ሁሉ በአንድ እግሩ አቆመው፡፡ ሴት ወይዘሮው ወንድ መኳንንቱ ሁሉ እጅግ ወደደው፡፡

ለቤተ መጻሕፍትዎ

         የነጋድራስ ገብረ ሕይወት ባይከዳኝ ሥራዎች

                      አሳታሚ  የአዲስ አበባ ዩኒቨርሲቲ ፕሬስ

                     ጊዜ 2002

                      የገጽ ብዛት 186
 
                                                    ዋጋ 35

ነጋድራስ ገብረ ሕይወት ባይከዳኝ የሃያኛው ክፍለ ዘመን መባቻ ኢትዮጵያ የምሁራን ቁንጮ እየተባሉ ይጠራሉ፡፡ በ1878 ዓም በአድዋ ከተማ የተወለዱት ነጋድራስ ገብረ ሕይወት ኤርትራ ምጽዋ አጠገብ ምንኩሉ በተባለ ቦታ በሚገኝ የሚሲዮን ት/ቤት የመጀመርያውን ትምህርት አገኙ፡፡ ከዚያም በመርከብ ተደብቀው ወደ አውስትርያ ተጓዙና የሕክምና ትምህርት ተማሩ፡፡ በዚያውም የምዕራቡን ዓለም የፖለቲካ ኢኮኖሚ ዕውቀት ገበዩ፡፡

እንደተመለሱ መጀመርያ የዐፄ ምኒሊክ ሐኪም ሆነው ነበር፡፡ የፈረንጅ ሐኪሞች ግርግር አልመቻቸው ሲል ወደ ሱዳን ሄዱ፡፡ በዚያም እያሉ የሱዳንን እና የኢትዮጵያን የልማት እና የኢኮኖሚ ሁኔታ ማነፃፀር ያዙ፡፡

ወደ ደረስጌ ማርያም ክፍል አራት

ዐፄ ቴዎድሮስ ንግሥናቸውን ያወጁበት ሕንፃ

አንድ ጥንታዊ ባለ ሁለት ፎቅ ሕንፃ በዚህ ቦታ ይገኛል፡፡ ወደ ሕንፃው በደረጃ በኩል ትወጣላችሁ፡፡ ከከዚያም በደረጃ ወደ መጀመርያው ፎቅ ስትወጡ በፊት ለፊቱ በኩል በረንዳ ታገኛላችሁ፡፡ ወደ በረንዳው ዝለቁ፡፡

እነሆ አሁን የኢትዮጵያን ታሪክ በቀየረ አንድ ታሪካዊ ቦታ ላይ ቆማችኋል ማለት ነው፡፡ እዚህ ሠገነት ላይ ቆመው ነበር ዐፄ ቴዎድሮስ ንጉሠ ነገሥት መሆናቸውን ያወጁት፡፡ የዘመነ መሳፍንት ማብቂያ እና ኢትዮጵያ ወደ አዲሱ ዘመን መሸጋገርዋ የታወጀው እዚህ ቦታ ላይ ነበር፡፡ ዘመናዊው የኢትዮጵያ ታሪክ የሚጀምረው ከዚህ ሠገነት ላይ ነው፡፡

ሠገነቱን ለቅቀን ካህናቱ በሰጡን መሰላል አማካይነት ወደ ላይኛው ፎቅ ወጣን፡፡ የፎቁ ወለል የሆነው እንጨት በዕድሜ ብዛት አርጅቶ ፈራርሷል፡፡ ለታሪክ ታድሎ ታሪኩን የሚረሳ እንደኛ ያለ ማነው፡፡ ይህንን የዘመናዊት ኢትዮጵያ መነሻ ሕንፃ መጠበቅ አቅቶን ይኼው ወለሉ እዚህ እና እዚያ ተለያይቷል፡፡