ወደ ደረስጌ ማርያም ክፍል ሦስት

         የደረስጌ ዕቃ ቤት

 

                           የወርቅ ከበሮ



 የደረስጌ ካህናት በአንድ ነገር ይመሰገናሉ፡፡ ደጃች ውቤ ከሰጡት ቅርስ እና ንዋያተ ቅድሳት መካከል አንድም እስካሁን አልጠፋም፡፡ በጣልያን ዘመን እንኳን ቤተ ክርስቲያንዋን ለመዝረፍ የመጣውን ጣልያን ቀጥታ ከዚህ በኋላ አልደርስም እነዲል አድርጋዋለች፡፡ በ1928 ዓም መጋቢት ሦስት ቀን ጣልያን በደብርዋ ላይ ያዘነበው የአውሮፕላን ቦንብ እንኳን እሳቱ ጢሱ አልነካትም፡፡

የወርቅ አክሊል

የቱሪዝም ቢሮ ባለሞያው አቶ አደራጀው እንደነገረን የደረስጌ ቅርስ ተሠፍሮ ተቆጥሮ በሚገባ የተመዘገበ ነው፡፡ በየዓመቱ ቆጠራ ይደረጋል፡፡ የሚገርመው ግን ቅርሱን ለመቁጠር ሁለት ወር ከአሥራ አምስት ቀን መፍጀቱ ነው፡፡ የአካባቢው ገበሬ ለቅርሱ ከፍተኛ ጥበቃ ነው የሚያደርገው፡፡ ዕቃ ቤቷ እና የያዘችው ዕቃ ሲተያዩ ወርቅን በቀዳዳ ኪስ እንደ ማስቀመጥ ነው፡፡ ከኖራ እና ከድንጋይ ተሠርታለች፡፡ ቅርሱ በቅርስ ላይ ተነባብሮ ተቀምጦባታል፡፡ በቅርቡ ደረጃውን የጠበቀ ሙዝየም ለመሥራት ዝግጅት እየተደረገ መሆኑን አቶ አደራጀው ነግሮኛል፡፡ ለማየት ያብቃን፡፡

                        የወርቅ ጽዋ

ደጃዝማች ውቤ ደረስጌ ማርያምን ሲሠሩ አንድ ምኞት ነበራቸው፡፡ ዘመነ መሳፍንትን አክትመው በደረስጌ ማርያም መንገሥ፡፡ ለዚህም አቡነ ሰላማን ከግብጽ አስመጥተው ነበር፡፡ እናም የተሟላ ንዋያተ ቅድሳት ለደብሯ አበርክተዋል፡፡ የብር እና የወርቅ ከበሮ፤ ከፋርስ እና ከግብጽ የመጡ ምንጣፎች፤ ከብር እና ከወርቅ የተሠሩ የፈረስ ኮርቻዎች፤ 70 ሳንቲ ሜትር ርዝመት ያላቸው ከጎሽ ቀንድ የተሠሩ ዋንጫዎች፤ ለደብሯ ሰጥተ ዋታል፡፡

ይህም አልበቃቸው 483 ጋሻ መሬት ለቤተ ክርስቲያኑ ከመስጠታቸውም በላይ የአካባቢውን ገበሬዎች ከማንኛውም ግብር ነጻ አድርገዋቸው ነበር፡፡ የሰው ሃሳብ እና የእግዚአብሔር ሃሳብ ይለያያል፡፡ ደጃዝማች ውቤ እና ደጃዝማች ካሣ የካቲት ሦስት ቀን 1845 ዓም ቧሂት ላይ ጦርነት አደረጉ፡፡ ደጃዝማች ውቤም ተማረኩ፡፡ ቤቴል በሚባለው አምባ ላይም ያስቀመጡት ዕቃ ሁሉ ተማረከ፡፡ ዳጃዝማች ካሣም በአቡነ ሰላማ እጅ ተቀብተው በዚህችው በደረስጌ ማርያም የካቲት አምስት ቀን 1845ዓም ዐፄ ቴዎድሮስ ተብለው ነገሡ፡፡

የዐፄ ቴዎድሮስ ዜና መዋዕል ጸሐፊ ደብተራ ዘነብ « ከአምባው ውስጥ የተገኘ የወርቅ እና የብር ዕቃ ለቁጥር አስቸገረ፤ ብርጭቆ እና ብርሌ ታናናሹ ዕቃ እንደ ሣር እንደ ሣር ቅጠል ሆነ፡፡ ሁለት መድፍ ነፍጡ ለሸክም አስቸገረ፤ ብሩም ለሠራዊትዎ ሁሉ ለመኳንንቱም ለአንዱ ሺ፣ ላንዱ መቶ፣ ላንዱ ሃምሳ፣ ለአንዱ ሃያ፣ ላንዱም አሥራ አምስት፣ ላንዱም አሥር እየሰጡለት ለምጧትም እየሰጡለት እስከ ሸዋ ድረስ ሳያልቅ ነበር» በማለት ይገልጠዋል፡፡ ታሪክ ጸሐፊው ወልደ ማርያምም «ከአምባው የተቀመጠ ገንዘብ ተራዛሚው ነፍጥ ብቻ 500 ተቆጠረ፤አረቄ መርፌም ሁለት ጋን ተገኘ ይባላል» ይላል፡፡

ደጃዝማች ውቤ ሲማረኩ ዐፄ ቴዎድሮስ ሀብትዎን ያምጡ አሏቸው፡፡ ደጃች ውቤም «ይህንን ሁሉ ገንዘቤን ለእግዝትነ ማርያም መስጠቴ የምድር እና የሰማይ መከራ እንዳታሳየኝ ነበር፤ አሁን እንዴት ላድርግ ከእርሷ ይቀበሉ እንጂ፡፡» አሏቸው፡፡ የደጃች ውቤ ሠራዊትም እየሸሸ ደረስጌ ገብቶ ደወለ፡፡ ዐፄ ቴዎድሮስም «ስለ እግዝትነ ማርያም ብዬ ምሬዋለሁ» ብለው ዐዋጅ ነገሩ፡፡



በልዩ ጌጥ የተሠራ መስቀል





   ከጎሽ ቀንድ የተሠራ ዋንጫ

 ምንም እንኳን ደጃች ውቤ በዚያ የመከራ ሰዓት አላዳነችኝም ብለው ቢፀፀቱም፤ ዐጽማቸውን አክብራ፣ታሪካቸውን አኑራ ትውልድ እንዲያስታውሳቸው ያደረገች፣ እስከ ዛሬም በጸሎተ ቅዳሴ እንዲታሰቡ ያደረገች ይህችው የደከሙላት ደረስጌ ማርያም ናት፡፡ የሰማዩንም እንደማትነሣቸው ተስፋ አደርጋለሁ፡፡

አሁን ከዕቃ ቤቱ ወጥተን ወደ ግራ በኩል እናምራ፡፡