ጉዞ ወደ ደረስጌ

የስሜን ተራሮች

  ከጎንደር ተነሣን፤ እኔና ሙሉቀን ዘጎንደር፡፡ አንዳንዶቹ የልደታ ምክትል መልአከ ስብሐት ይሉታል፡፡ የሰበካ ጉባኤው ምክትል ሊቀ መንበር ስለሆነ፡፡ የምንጓዝበትን መኪና ያመቻቸልኝ የአዲስ አበባው ሙጨ ነው፡፡ ምንም እንኳን 3500 ቢያስሰክፉንም፡፡ ከጎንደር ወደ ጃናሞራ መውጫው በር ብልኮ ይባላል፡፡

መኪናችንን አስፈታትሸን እና ነዳጅ ሞልተን ከብልኮ ከጠዋቱ ሁለት ሰዓት ተነሣን፡፡ እስከ ዳባት ያለው መንገድ ከጎንደር ተራሮች አንፃር እንደሜዳ የሚቆጠር ነው፡፡ ሜዳ በሌለበት ዳገት ሜዳ ይሆናል ሲባል አልሰማችሁም፡፡

ፀሐይ እና ብርድ ለማሸነፍ ይፎካከራሉ፡፡ በመካከል እኛ ካፖርት በመልበስ እና በማሞቅ ዕንቆቅልሽ እንሠራለን፡፡ የወገራ ወረዳ ዋና ከተማ የሆነችውን አምባ ጊዮርጊስን አለፍናት፡፡ መኪናዋ እህም፣ እህም፣ እህም እያለች ታዘግማለች፡፡ ቻይና እዚህም አለች፡፡ ይህንን የስሜን መንገድ እንደ ጨጓራ ትገለብጠዋለች፡፡ ከጎንደር ወደ ደባርቅ የሚወስደው መንገድ በአዲስ መልኩ እየተሠራ በመሆኑ በተለዋጭ መንገድ እንፈጨዋለን፡፡

ዝንጀሮ አቋረጠን ምን እንሆን ይሆን?

ገደብዬን አለፍናት፡፡ ከጎናችን በላንድ ክሩዘር የፈረንጅ ዘር ከነ ግልገሉ እንዳትቀር የተባለ ይመስል እየጣለን ይፈስሳል፡፡ ከአዲስ አበባ 830 ኪሎ ሜትር ተጉዘን ይኼው ዳባት ላይ ተገኘን፡፡ የደጃዝማች አያሌው ብሩ ቤተ መንግሥት የሚገኘው እዚህ ነው፡፡ የስሜንን ተራሮች ለማየት የምትጓዙ ሳታዩት አትለፉ፡፡ የወረዳው መስተዳድር በከተማዋ ያሉትን የሚጎበኙ ቦታዎች በቢል ቦርድ መንገዱ ዳር መስቀሉ ያስመሰግነዋል፡፡ ለጎብኚዎች መረጃው ይጠቅማልና፡፡

በምቃራ በኩል አልፈን 830ኛው ኪሎ ሜትር ላይ ደባርቅ ላይ ወረድን፡፡ ምሳ የሚበላው እዚያ ነው፡፡ የወረዳው የማኅበረ ቅዱሳን አባላት ምሳ ጋበዙን፡፡ ሜዳው እዚህ ያበቃል፡፡ መንገዱም ለሁለት ይከፈላል፡፡ ወደ ሽሬ እና ወደ ጃናሞራ፡፡

ሊማሊሞን ዳገት ወጣሁት በዳዴ

እንደ ዘጠኝ ወር ልጅ አርግዤህ በሆዴ

የጭላዳ ዝንጀሮ ማኅበር

ተብሎ የተዘፈነለት የሊማሊሞ ገደል በሽሬው መንገድ ላይ ይገኛል፡፡ ሊማሊሞ መንገዱን የገነባው ጣልያናዊ መሐንዲስ ስም ነው፡፡ የታደለ ጣልያን መንገድ ሠርቶ ስሙን ተክሎ ሄደ፡፡ የሊማሊሞ መንገድ ሊቀር ነው ይባላል፡፡ አሁን የሚሠራው አዲሱ የሽሬ መንገድ በሊማሊሞ በኩል አይሄድም፡፡ ቦታውን ግን የቱሪስት መዳረሻ ለማድረግ መታሰቡን ሰምቻለሁ፡፡ ሊማሊሞን ያላያችሁ ይሄኔ ነው ማየት፡፡ በኋላ የቱሪስት መዳረሻ ብቻ ከሆነ በብር መክፈላችሁ ቀርቶ በዶላር መክፈላችሁ አይቀርም፡፡ ቱሪስት በሚባ ዛባቸው የሀገራችን ቦታዎች ያለው አንዱ ችግር ሁሉንም በዶላር የማሰብ አባዜ ነው፡፡ እዚያ የምት ተነፍሱትም በዶላር ነው፡፡

ከደባርቅ ወጣን፡፡ የደባርቅን ጉልት ገበያ አቋረጥናት፡፡ የጃን አሞራን መንገድ ያዝነው፡፡ ታዋቂው ስሜን ብሔራዊ ፓርክ የሚገኘው በዚህ ነው፡፡ አንድ ሃያ ኪሎ ሜትር እንደሄድን ወደ ፓርኩ ክልል ገባን፡፡ መኪናችንን እህህ ማለት ትታ፣ አዬዬ እያለች ማማረር ጀመረች፡፡ ለዝንጀሮ የተዘጋጀን ተራራ ይህች ያረጀች መኪና በምን ልቧ ትውጣው፡፡ በግራ በኩል ከሰማይ ጋር የተሳሳመው ተራራ ይታያል፡፡ በቀኝ በኩልም የርሱ መንትያ ተገትሯል፡፡ በአንዳንድ አካባቢዎች የገበሬዎች እርሻ ቢታይም አካባቢው ግን ከሰው መኖርያነት ነጻ የሆነ ይመስላል፡፡



የቧሂት ተራራ

 እነሆ ጭላዳ ዝንጀሮ ማኅበር ሲጠጣ አገኘነው፡፡ ዕድር ይሆን ዕቁብ አላወቅንም እንጂ ከሊቅ እስከ ደቂቅ ግልብጥ ብሎ ወጥቶ ጭላዳ ማኅበር ይጠጣላችኋል፡፡ አንዳንዶቹ መሬት ይጭራሉ፤ ሌሎቹ ይቃለዳሉ፤ ሌሎቹም ልጆቻቸውን ይቀምላሉ፤ አንዳንዶቹ ደግሞ ልጆቻቸውን አዝለዋል፡፡ የማኅበሩ ሙሴ የሚመስለው ግመሬ ዝንጀሮ መሐል ላይ ገብቶ ጎምለል ጎምለል ይላል፡፡

እኛን ሲያዩ ወደ ዳገታቸው ሸሸት ሸሸት አሉ፡፡

ከእነርሱ እልፍ ብሎ ለቱሪስቶች የተዘጋጁ ሎጆች አሉ፡፡ እዚያው ሲጎበኙ ውሎ፣ እዚ ያው አምሽቶ እዚያው ማደር ይቻላል፡፡

መኪናችን እያማጠች እያ እየተመሰጥን ጉዞ ቀጠልን፡፡ እነሆ ዋልያ፡፡ ሁለት ጓደኛሞች የት እንደቆዩ አይታወቅም ከተራራው ላይ እየተጫወቱ ወረዱ፡፡ እኛ ስናያቸው መንገዱን አቋርጠው ፈረጠጡ፡፡ ካሜራዬ ግን አንዱን ሲዘል ያዘችው፡፡ ዋልያን ከነ ሕይወቱ ሳየው የመጀመርያዬ ነው፡፡

ስሜን ተራራ በኢትዮጵያ ታሪክ ዝናው ከፍ ያለ ነው፡፡ የጎንደር ሥርወ መንግሥት መሥራች ዐፄ ሠርጸ ድንግል ከአካባቢው ፈላሾች ጋር ብዙ ውጊያዎች አድርገውበታል፡፡ የጦር አዛዣቸው ዮናኤል በ1572 ዓም ረዳኢ ከተባለው የፈላሾች መሪ ጋር የተዋጋው እዚህ ቦታ ነው፡፡ በኋላም በ1579 ዓም ጎሼን ወግቶበታል፡፡

ማደን ክልክል ስለሆነ በካሜራ አደንናት

ታኅሣሥ 6 ቀን አባ ንዋይ የተባሉ ከወላይታ የመጡ ካህን ታቦተ ኢየሱስን ይዘው በድንኳን የቀደሱት እዚህ ቦታ ነበር፡፡ ንጉሡ ጎሼ የተባለውን የፈላሾች መሪ  ሲያሸንፈውም በዚሁ ቦታ ታቦተ ኢየሱስ አምባ መሸኻ ወደተባለው አምባ ወጥተው ዘምረዋል፡፡ ይኼው ታቦት ነው በኋላ ዘመን ጎንደር ላይ ተተክሎ አደባባይ ኢየሱስ የተባለው፡፡ ታቦቱ የመጣው ከወላይታ መሆኑን የዐፄ ሠርፀ ድንግል ዜና መዋዕል ይናገራል፡፡ እንግዲህ ጎንደሬም ወላይቴ፣ ወላይቴም ጎንደሬ ነው ማለት ነው፡፡ ስለ ስሜን እና ስሜነኞች በሚገባ ማወቅ የፈለገ «ስሜን እና ስሜነኞች» የተሰኘውን የጋዜጠኛ ካህሳይ ገብረ እግዚአብሔር ጽሑፍ ቢያነብ መልካም ነው፡፡ ጽሑፉ በኅብረ ነገር የመጀመርያ መጽሐፉ ላይ ይገኛል፡፡

በግራ በኩል በማዶ የጠመጠመ የሰሜን ካህን መስሎ ራስ ደጀን ይታያል፡፡ እኔ ወደዚያ ለመድረስ ጊዜ አልነበረኝምና በሩቁ ተሳልሜው አለፍኩ፡፡

አሁን ቧሂትን እያለፍነው ነው፡፡ ዐፄ ቴዎድሮስ ከደጃች ውቤ ጦር ጋር ተዋግተው ያሸነፉበት አስቸጋሪው ተራራ ነው ቧሂት፡፡ የደጃች ውቤ ጦር በጃን አሞራ ሲከትም ደጃዝማች ካሣ «ስሜን ስሜን እነግርሃለሁ» ብለው ነበር አሉ ወታደር ያስከተቱት፡፡ እንዳሉትም ቧሂት ላይ ተዋግተው ስማቸውን ስሜን ላይ ነገሩት፡፡



ዋልያ ከነ ቤተሰቡ፣ ከሩቁ

 ከቧሂት ወደዚያ የተሻለ ሜዳ ነው፡፡ ሜዳ ከተባለ፡፡ መኪናችንም እዬዬ ከማለት እምምም ወደማለት ተሸጋግራለች፡፡ ከፊት ለፊታችን የጃን አሞራ ወረዳ ዋና ከተማ መካነ ብርሃን ትታየናለች፡፡ ወደ እርሷ ከመግባታችን በፊት «ድል ተራራ» የተባለው የደጃች ውቤ ተራራ ይገኛል፡፡ መሣርያቸውን አከማችተውበት የነበረው ቦታ መሆን አለበት፡፡

መካነ ብርሃን ገባን፡፡ ከቀኑ አሥር ሰዓት ሆኗል፡፡ የዚህ ሀገር ፀሐይ ደግሞ ካልገባሁ እያለች ነው፡፡ መብራት እነደ ልብ ባለበት ከተማ ቀስ ብላ የምትገባው ፀሐይ እዚህ ምን ልሁን ብላ ትቸኩላለች፡፡ «ሰው ሆይ አፈር ነህና ወደ አፈር ትመለሳለህ» ለተባለው ቃል የሰነድ ማስረጃ መስለናል፡፡ አሁን ተሠርተን ገና ጭቃችን የደረቀ ይመስላል፡፡



የመካነ ብርሃን ኪዳነ ምሕረት ቤተ ክርስቲያን የሠርክ ጉባኤ፣ በትልቅ ዋርካ ሥር



እኛና ውኃ ተገናኝተን ስንለቃለቅ አስራ አንድ ሰዓት ሆነ፡፡ በመካነ ብርሃን ኪዳነ ምሕረት ቤተ ክርስቲያን የሠርክ ጉባኤ ለመካፈል ወደዚያው ሄድን፡፡ እንዲህ ዓይነት የሠርክ ጉባኤ ካየሁ ብዙ ዘመን ሆኖኛል፡፡ ከአንድ ትልቅ ዋርካ ሥር በተጋደሙ እንጨቶች ምእመናኑ ተሰብስበዋል፡፡ እዚያው እየተማርን እዚያው መሸ፡፡

ብሉ ነገ ደረስጌ ላይ እንገናኝ፡፡ ደኅና እደሩ፡፡

በነገራች ላይ


ከዳያል አፕ ኢንተርኔት ወደ ኤቪዶ እንድሸጋገር የላስ ቬጋስ ልጆች ድጋፍ በማድረጋቸው ይሄው ፎቶዎችን ትኮመኩማላችሁ፡፡ እስኪ እግዜር ይስጣችሁ በሏቸው፡፡