ሕዝቤ ዕውቀት በማጣት ጠፋ (ሆሴዕ 4፣6)

ሰሎሞን ይኼይስ - ሚነሶታ

እንደ እኔ እምነት የቤተ ክርስቲያንን ችግሮች ከውጭ ሆኖ መፍታት አይቻልም፡፡ ውኃን ከውኃ ውጭ መዋኘት እንደማይቻለው ሁሉ፡፡ በውስጡ ያሉ አገልጋዮች ችግሩን ተረድተው የመፍትሔው አካል መሆን አለባቸው፡፡ እኛ ከውጭ ያለነው ድጋፍ ሰጭ ነው ልንሆን የምንችለው፡፡

በቤተ ክርስቲያናችን ውስጥ የሚገኙ ጳጳሳት፣ መነኮሳት፣ ካህናት፣ ሰባክያን፣ ዘማርያን እና የሰበካ ጉባኤ አመራሮች ሁሉ በቤተ ክርስቲያናችን ያሉ ችግሮች እንዲቀጥሉ የሚፈልጉ አይደሉም፡፡ የችግሩ ተዋንያን ጥቂቶች ተጠቂዎች ግን ብዙዎች ናቸው፡፡ በመሆኑም የመጀመርያው ነገር ዕውቀቱን እና ንቃቱን መፍጠር መሆን አለበት፡፡

በመሆኑም የሚከተሉትን ነገሮችን መጠቆም እወዳለሁ፡፡

1 ለንስሐ አባቶቻችን እና ለሰበካ ጉባኤያት ኮፒ እያደረግን ብንሰጣቸው እና ብናወያያቸው፡፡

2 ይበልጥ ደግሞ ገንዘባችንን አሰባስበን እነዚህን ጽሑፎች በመጽሐፍ መልክ አሳትመን በኢትዮጵያ ውስጥ ያሉ አባቶች እና  አገልጋዮች እንዲደርሳቸው ብናደርግ

ይህ ኅትመት ደግሞ በቀላሉ እንዲዳረስ ከፈለግን የኅትመቱን ወጭ እኛ በመሸፈን በነጻ ወይንም በርካሽ እንዲያገኙት ብናደርግ ጥሩ ነው፡፡

3 የመንግሥት አካላት እነዚህን ሃሳቦች እንዲያገኟቸው መንገዶችን ብናመቻች፡፡ እንደኔ ሃሳብ የመንግሥት አካላት ሁሉ ችግሩን ይፈልጉታል ተብሎ መታመን የለበትም፡፡ ከባለሥልጣናትም ኮ የቤተ ክርስቲያን ነገር የሚያሳስባቸው ይኖራሉ፡፡

4 ሚዲያዎችም እነዚህን ሃሳቦች እንዲያንፀባርቁና ከእነዚህም የተሻሉ ሃሳቦችን እንዲያቀርቡ ብናበረታታቸው፡፡